亂讀新聞(二十)
2024年2月27及28日
1. 開始之前，都係例牌頭盔架喇，英國新聞我係自己譯，所有正確既報導以原文為準啊吓。(今次都係懶到直接copy and paste之前果句，哈哈。)
2. Skynews at Ten既頭條係有關保守黨議員Lee Anderson上星期既言論風波。佢上星期響一啲支持巴勒斯坦既遊行(somehow有少少暴力喇)之後，話倫敦同埋佢既市長Sadiq Khan已經比伊斯蘭份子同埋(Khan都係伊斯蘭教徒)控制咗，搞到自己比人攻擊話佢咁樣係種族歧視，工黨更加要求首相辛偉誠暫停佢既黨鞭職務。Lee Anderson拒絕道歉，話自己既言論係有啲笨拙，但並唔係錯，係錯既先會道歉，呢個就係佢唔肯say sorry既原因。(Skynews, the Guardian)
3. 最新既發展就係Lee Anderson已經被暫停佢保守黨既黨員身份，而首相辛偉誠都開口話Lee既言論係錯誤同埋不可接受既，不過Khan就梗係話唔夠喇，佢就話辛偉誠政府冇認真對待呢個咁種族主意既意見。(BBC)
4. 不過我發覺所有既報道好似都冇講佢會咁樣講既原因，其實倫敦成日有呢啲咁既支持巴勒斯坦示威，好多時警察都唔會點郁佢哋。Suella Braverman，前英國內政大臣，就係因為講過啲警察響示威期間太過偏坦啲巴勒斯坦支持者已被辛偉誠炒魷。英國左膠當道，真係唔係講笑。
5. 一個叫Scarlet Blake既變性女人(?)，響牛津River Cherwell, Parson's Pleasure謀殺一個唔識既西班牙BMW工程師Jorge Martin Carreno被判謀殺罪名成立，判終身監禁。(Skynews)
6. 呢單嘢都幾恐怖，呢個Scarlet Blake既不男又不女既人(佢只係打扮似女人，唔係真係變性，但英國會用"she"黎形容佢)係真係因為自己屎忽痕想殺人，而響條街度求其搵個人落手。Jorge Martin Carreno只係咁啱唔好彩比佢揀中，行行下用佢酒樽爆佢頭再推佢落河浸死咗。
7. 再恐怖係呢個Scarlet Blake本身心理已經好變態，試過殺咗隻貓再用攪拌機攪碎條屍，而佢今次真係因為想滿足自己既性興奮(個法官真係咁讀)而去殺人，係個極危險既人，對社會極其危險。(Skynews, BBC)
8. 又去返俄烏戰爭，法國總統馬克龍表示，幫助烏克蘭響俄烏戰爭之中取勝，係歐洲防衛入面最重要既一個環節，唔能夠排除任何形式既幫助，包括派軍隊加入戰爭。不過佢既北約盟友明顯就唔係咁諗，包括英、美、德就表示佢哋唔會派軍隊過去。最近烏克蘭既戰情真係唔係幾好，俄軍響前線取得勝利，逼使烏克蘭再次向盟友要求武器同軍事資援。(BBC)
9. 坦白講，已經開始有唔少分析覺得烏克蘭會輸，如果佢既盟友唔支援，其實情況只會越黎越差，但我又會明白點解英美佢哋唔想直接派兵參戰，因為咁樣隨時引起連鎖效應，就好似一戰時咁，搞到爆發第三次世界大戰。繼續觀望喇，唔係都冇計。
10. 英國哈利王子(我都係鍾意咁叫佢，哈哈)響就住佢響英國既保安措施既案件輸咗，事緣係佢響脫離咗皇室之後，返到英國之後佢既人身安全保安唔再同皇室相同level，而係就住每次情況黎評估，佢條氣唔順，覺得話唔公平，所以就將呢件事帶上法庭，不過今次既判決相信會令佢好失望，因為法庭話睇唔出呢個決定有咩問題，亦唔見得有任何不公，執筆時哈利王子仲未有回應。(BBC)
11. 呢次佢仲唔係求仁得仁？唔想要皇室光環想要私隱，亦都唔再履行皇室職務，咁就唔好要皇室既待遇。同埋Home Office唔係話唔向你提供護衛保安服務，只係按照一個case by case既做法去做咋嘛，我相信佢哋都唔會夠膽唔派人去保護你喇？之後究竟哈利王子會唔會上訴？真係要拭目而待。
12. 講埋佢兄弟威廉王子(一樣，我都係鍾意咁叫佢)，佢請假缺席溫沙堡舉行悼念活動，話係私人理由，但就令人聯想到Kate既病情係咪有咩惡化呢？希望冇事喇。
13. 最近風雲谷，陶傑同鮑偉聰兩位主持深入咁探討緊香港而家響二十三條立法再即既氣氛下，一啲批評政府既言論自由，究竟收窄到幾多，同埋建制派之間既內鬥。佢哋首先討論吓幾日曾鈺成講咗啲好溫和既說話去講出對二十三條既憂慮，都比工聯會既陳穎欣話佢準備作反，加上之前謝偉俊對政府施政既言論比李家超話諗起黑暴，響而家所有民主派消失晒既政壇之下，佢哋唯有鬥自己人，而佢哋成日拎國安法黎耍，都好難相信二十三條立法之後會有言論自由。(風雲谷)
14. 又好似阿反駁隊隊長咁，佢話自由亞洲電台引述緊評論係抹黑緊二十三條，有記者問咁算唔算犯咗境外勢力煽動罪，佢都要話case by case去睇，咁之後究竟傳媒報道新聞既時候要點界定批評定煽動呢？又，言論自由係咪收窄咗呢？(風雲谷)
15. 最後今日陳茂波發表咗財政預算案，主要係樓市全面撤辣、計劃推出債券去搞北部都會區、連續兩年得千億赤字，不過波叔話冇問題，兩年之後會有返盈餘咁話喎。(RTHK)
#不專業專欄 #亂讀新聞 #英國新聞 #香港新聞
#skynews #BBC #風雲谷 #RTHK #港台 #千億赤字
#財政預算案 #LeeAnderson #London #俄烏戰爭 #哈利王子 #威廉王子
#廿三條
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
