亂讀新聞(二十八)

亂讀新聞(二十八)

2024年3月25日

1. 開始之前，都係例牌頭盔架喇，英國新聞我係自己譯，所有正確既報導以原文為準啊吓。(今次都係懶到直接copy and paste之前果句，哈哈。)

2. 上星期3月22日發生既莫斯科音樂廳恐怖襲擊震驚全球，造成超過130人死亡，相信大家都已經耳有所聞，我睇開既BBC同埋Skynews都將佢哋放響top stories報道，最新既消息，就係俄羅斯方面宣稱，已經將捉到既果4個疑犯帶上庭，其中兩個已經承認恐怖活動控罪，但要留意既係，佢哋響出庭既時候，全身都係嚴重既傷痕，其中一個仲要坐住輪椅出黎。(BBC, Skynews)

3. BBC既報道仲有形容到四個疑犯既傷勢，包括一個響之前流出既片段中疑似遭受電擊、一個隻耳仔被割等等，坐輪椅果個出庭既時候係冇意識既。(BBC)

4. 伊斯蘭國早前已經承認咗責任，係今次恐怖襲擊既策劃者，並且附上咗唔少佐證既片段，最令人吃驚既，係佢哋發放埋四個兇手安然無恙既照片，如果屬實既話，出庭果四個究竟又係乜嘢人呢？

5. 不過俄羅斯既官方由頭到尾都冇回應過ISIS既宣言，仲指控呢次指控係烏克蘭有份策劃，但係當然比唔到啲乜嘢實質證據，對此，烏克蘭總統澤連斯基當然係予以否認。(BBC)

6. 其實美國情報網似乎一早已經收到情報，呼籲國民唔好去俄羅斯參加啲公共集會，亦有唔少西方大使館和應，不過俄羅斯總統普京就梗係對呢啲講法嗤之以鼻，話佢哋係西方社會要黎影響俄羅斯社會穩定既戰略喎。(香港01)

7. 不過，連法國總統馬克龍都表示，其實法國既情報網都話收到過情報，話法國其實都係ISIS既目標，而今次恐怖襲擊發生之後，佢哋都已經將恐襲警告提升至最高級別。(Skynews)

8. 暫時睇黎，最可信既就係ISIS策劃呢次既襲擊，而西方國家都一早收到晒情報。俄羅斯方面有冇收到情報呢，我真係唔敢講，因為就算普京表面對西方既警告嗤之以鼻啫，但實際上應該點會有做好調查求個安心啩？純粹陰謀論咁講，以普京響乜嘢都未查明既時候就已經指責烏克蘭黎講，佢會唔會其實一早已經有心用呢樣嘢黎做藉口，將向烏克蘭加重軍事攻勢正當化呢？

9. 嗱，呢個我鳩UP架咋，不過以普京政敵近年既下場，好似普里格津飛機自爆、拿華利獄中神秘死亡呢啲，都好難唔令人陰謀論呢件事，對普京黎講，人命並唔係啲咩一回事。但當然，都無謂跟車太貼，而呢個講法都係陰謀論黎，係永遠冇辦法證實到既。

10. 講起俄烏戰爭，最近俄羅斯既攻勢大順，攻佔咗烏克蘭東面唔少地方，而Skynews既軍事專家Sean Bell分析指，烏克蘭單靠西方國家供應武器係好難打得贏，而家既形勢更加險惡，因為戰事長久既關係，西方國家提供既資源已經開始減少。(Skynews)

11. Sean Bell續指如果俄羅斯真係響呢仗贏咗，佢係唔會收手，到時歐洲咁多個國家會受到好大既威脅，而有唔少既歐洲國家領袖開始慢慢意識到呢件事，但佢驚已經太遲。(Skynews)

12. 美國駐英大使Jane Hartley都持相同意見，認為俄羅斯係唔會收手，所以佢哋必須要支持烏克蘭打贏呢場仗。(Skynews)

13. 比起大半年前烏軍大反攻，其實好多西方國家都悲觀咗唔少，甚至越黎越多分析認為烏克蘭最終應該係會輸呢場仗…

更多唔同既專欄內容︰https://www.leafopenleafopen.com/unprofessional9up

#不專業專欄 #亂讀新聞 #英國新聞 #香港新聞 #專欄 #時事 #時事專欄

#BBC #Skynews #香港01 #伊斯蘭國 #俄羅斯 #莫斯科音樂廳恐怖襲擊

#美國 #莫斯科 #法國 #烏克蘭 #法國 #馬克龍 #恐怖襲擊

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938