不專業足球筆記（十一）

不專業足球筆記（十一）

1. 上一期我哋啱啱就講到有四個港將北上外流，估唔到其中既孫銘謙第一場中超既比賽就正選上陣踢左翼衞，而且仲要踢足九十分鐘，只係可惜佢效力既滄州雄獅主場以零比二不敵中超傳統勁旅北京國安。

2. 我冇睇場波，冇得講佢踢成點，不過觀乎唔同傳媒對佢既報道，都係形容佢表現活躍，防守冇大錯，而且更加試過殺入禁區接應隊友傳中射門，可惜唔中龍啫。

3. 孫銘點睇自己既表現？佢對住傳媒話中超既強度當然係比港超高，佢真係「無時無刻都保持高度集中」，而自己啱啱加入球隊，都仲需要時間適應。不過佢覺得自己經過亞洲盃決賽周、亞運呢啲高強度既比賽之後，覺得自己既速率有所提升，不過仍然唔足夠，仲需要響啲細微既地方做得更好先可以融入得更加好。

4. 其他中超港將新兵方面，先講下安永佳，佢效力既深圳新鵬城作客對住有另一名已經成功響中超立足既外流港將梁諾恆在陣既浙江隊，就以零比一落敗。

5. 兩位港隊成員今場都係先列後備，不過安永佳響52分鐘就入替球隊既西班牙外援，而細佬都有後備上陣，兩者一攻一守上演咗香港打吡，亦都有過唔頭鎚攻門機會，總算完成咗中超既處子登場。

6. 安永佳表示佢好高興完成咗響中超呢個舞台登場既奮鬥目標，黎緊就係希望可以響中超爭取上陣時間，同埋爭取更加多入球，證明自己可以響中超立足。

7. 周緣德呢？佢響河南酒祖杜康既第一場比賽就坐後備坐足全場，暫時未有機會登場，中超地標戰就仲要等一等喇。

8. 另外記唔記得由香港U23北上既杜國樑？佢終於官宣加盟中甲既南京城，正如網上既消息一樣。

9. 返到黎香港，有場港超賽果真係嚇咗你一跳，深水埗第一次響歷史性響港超聯賽入面擊敗非香港U23既球隊，佢哋憑住尼高拉斯連中三元，以三比一擊敗咗流浪，取得今季港超既第一勝。

10. 我聽過唔少新聞或者訪，亦有一啲媒體對深水埗呢隊波既睇法，就係佢哋其實係有心搞波既，只係搞不得其法，呢啲嘢可能真係要慢慢吸收經驗，呢隊港超既二年生，由上年尾轉咗做陳浩然做主教練，再不斷增兵換血加外援，都睇得出隊波有進步。佢哋今年已經響非聯賽贏過南區(十二碼)、港會，睇黎都有機會慢慢改善表現，弱隊呢個名就短期內走唔甩架喇，但係至少唔會比人覺得佢哋係一隊同其他對手(除咗U23)係完全冇得踢先。

11. 歐洲波方面，比較值得一提既係皇馬對華倫西亞踢成二比二呢場比賽，皇馬響補時99分鐘由比寧咸頂入致勝既一球，但球證以已經吹咗完場雞為由，話呢個入波唔計。

12. 其實哨子聲都幾明顯，而華倫西亞既球員都明顯收晒步，比寧咸先會頂得咁輕鬆，如果球證真係比呢一球計數既話，對華倫西亞反而唔係幾公平。

13. 我自己就覺得呢下皇馬其實仲攻緊既時候，球證係應該酌情比佢哋攻埋既，但場波其實已經係補上補，球證吹完場雞其實都冇得話唔啱架喎。

14. 比寧咸就戇鳩喇，對住球證fuck，之前基達菲既格連活特已經試過一次咁樣對住球證講個fuck字領紅(雖然後尾打甩咗)，結果呢場食紅之餘仲要停兩場(仲有魯迪加都係)。皇馬方面當然有幫佢提出上訴，但佢就冇綠木咁好彩嘞，總之呢兩場停賽走唔甩。

15. 今季比寧咸已經為貢獻咗20球同8個助攻，話佢係皇馬既核心球員都不為過，黎緊對切爾達同奧沙辛拿佢會缺陣，對於皇馬爭標會唔會有暗湧呢？

#不專業足球筆記 #專欄 #足球專欄

#香港隊 #安永佳 #周緣德 #孫銘謙 #杜國樑

#深水埗 #流浪 #首勝 #皇馬 #皇家馬德里 #停賽

#比寧咸 #西甲 #講粗口 #華倫西亞

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938