不專業足球筆記（十九）︰流浪挫傑志菁英盃奪冠 理文成軍七年首奪超聯

不專業足球筆記（十九）︰流浪挫傑志菁英盃奪冠 理文成軍七年首奪超聯

1. 香港球壇響一個星期入面決定咗兩個冠軍，首先有標準流浪響上星期三以一比零擊敗傑志奪得球會二十九年以黎第一個錦標，而理文響星期日就以六比一大炒深水埗提前一輪奪得港超聯冠軍。

2. 賽前已經公佈咗，呢場菁英盃既決賽會係兩位征戰沙場多年既前港腳林嘉緯同埋盧均宜既最後一戰，林嘉緯呢場以隊長身份正選上陣，而盧均宜都響下半場後備上陣，最後呢場波標準流浪都成功以冠軍黎送別呢兩位近代港足既老大哥。

3. 呢場決賽雖然全場比傑志控制戰局，但係標準流浪既突擊更有威脅，如果唔係傑志U22門將石皓心救咗兩球有威脅既埋門，都唔駛等到40分鐘由伊巴謙接應上形洋介既傳中先失波。

4. 下半場戰局其實冇改變，標準流浪甚至踢得更加保守，傑志面對泊大巴既標準流浪，改用高空攻勢進襲，但呢度要讚一讚流浪既門將陳冠燊，唔止有精彩既撲救，響啲高波係咁轟埋龍門口既時候佢完全唔驚傑志啲大隻鬼佬，好肯出黎打手鎚、迎高波，係最後力保不失既功臣。

5. 講起呢位門將，上半場其實有啲騰雞，但係下半場既演出認真精彩。我都留意咗佢半季，佢雖然有少少海鮮波，但係潛質係唔錯，希望佢繼續可以keep住進步，先得19歲仔，至少未來幾年都仲會響精液盃有出場機會，期待佢往後既成長！

6. 另外，流浪既中場趙正宇都唔錯，雖然細粒，但佢既技術比到一種紮實同埋好有一種靈氣(我知好抽象)既感覺我。呢名林嘉緯點名既接班人其實好似話仲有DSE未考完，同樣期望佢未來可以大放異彩！

7. 響球員生涯最後一場比賽奪得菁英盃冠軍，相信盧均宜同林嘉緯都冇乜遺憾架喇。球迷都係，睇直播既時候，好多兩位既球迷好落力打氣，鏡頭最尾仲影住林太大嗌︰「頂住！」果一份熱血，真係好令人感動。除非兩位好似基藍馬咁彈出彈入話退又唔退架啫，如果唔係相信要到名宿比賽先可以再見到兩位既風采！講堅，如果我仲響香港，呢場都一定入場啊。

8. 至於港超方面，亦都同時響呢一個星期決定出冠軍，雖然傑志以三比零作客擊敗冠忠南區，但依然無阻翌日以六比一大勝深水埗既理文奪得佢球會創會七年以黎既第一個聯賽錦標。

9. 知恥近乎勇既理文同上場足總盃四強被淘汰既時候判若兩隊，如果唔係李毅凱最尾既時候有少少揸流灘冇拍晒埋去既話，相信深水埗連蛋都破唔到，不過咁樣比深水埗破咗蛋，自己又贏波，兩面一齊happy都幾好吖。

10. 其實都好替理文班主李文恩開心，響年年都fing錢落海交學費之下，終於都拎到聯賽冠軍。佢話會繼續招兵買馬，以挑戰亞洲賽會目標，佢都話會同保利臣同埋安尼亞呢兩個超級外援傾續約。安尼亞真係好勁，我都希望佢留低，但保利臣真係有啲保留，佢好似逐漸港超化咁，如果有更好既選擇，換咗佢都唔係咩壞事。

11. 比較令人有少少失望既係佢宣佈教練曾昭達會留任。老老豆豆，揸住隊咁既人腳，但達sir教出黎既表現真係唔似一隊班霸既表現，當然佢哋聯賽16勝3和暫時不敗既成績唔係呃返黎，但係佢哋好多時踢出黎既表現其實都冇乜霸氣，冇前幾年傑志或者以前羅傑承全盛期南華果種君臨天下既氣勢。而以佢哋既班費同人腳，我會覺得呢個表現係唔夠。如果留任達sir既話，真係要睇下佢下年啲戰術會唔會有進步，如果唔係，理文想好似傑志、南華，或者再早啲既東方、精工(甚至冰河時期既晨曦)咁創立到一個皇朝出黎，都真係幾難。

12. 而今季表現算係幾肉酸既傑志，佢哋既領隊伍健表示來季會大改革，而仲唔會係溫和同埋年輕化喎。見到Football Analyst專頁對呢個諗法提出質疑，佢話傑志近季最屈機既係，就係平均最大既一季2021/2022，憑住高齡四十既丹恩奴域屈機，闖入亞冠十六強，而今季既後生仔包括陳晉一同埋潘沛軒，其實都踢得幾差。

13. 作為花生球迷，就睇下一隊矢志改革既班霸同一隊少修少補既新興強隊，下季會點樣大鬥法喇。

14. 榜尾方面，今週一樣幾刺激，晉峰面對第三既大埔，雖然全場比大埔圍攻，但憑住一球十二碼，逼和大埔，以一分之微壓過香港U23升上尾二。

15. 諗住香港U23咁屎，對咩對手都係養份球隊，晉峰今次應該執返身彩唔駛包尾喇啩？點知世事就係咁奇妙，香港U23憑住隊長林學曦把握北區門將張桂華失誤甩手射入全場唯一入球，而U23門將雲天樂既表現亦都非常出色守住勝果，為香港U23取得聯賽第二勝，全取三分之後再一次反壓晉峰升上返上尾二。

16. 唔知係咪仲係受到上場北區條何浚皓剷到人哋斷腳影響，見到北區輸波真係幾心涼，上場佢哋主帥梁志榮走去屌球證冇事，今次到佢哋個龍門教練何國泉屌，屌多幾嘢比人紅埋，真係以為屌人老母唔駛付出代價咩。

17. 港超冠軍已經分出咗勝負，反而邊隊包尾仲有得睇，香港U23會對大埔，而晉峰會對南區，正常情況下我會覺得會兩隊都會輸，但係而家到季尾，大埔同南區既鬥心又剩返幾多呢？比起場褪色既天王山之戰，呢兩場波可能仲有睇頭。

更多專欄內容︰ https://www.leafopenleafopen.com/unprofessional9up

更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio

#不專業足球筆記 #專欄 #足球專欄 #足球 #港超聯 #冠軍 #港超冠軍

#傑志 #理文 #晉峰 #標準流浪 #菁英盃 #盧均宜 #林嘉緯

#香港U23 #均業北區 #深水埗

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938