不專業足球筆記（十七）︰理文四蛋贈北區伍健港超認輸 香港U23雲天樂撰文抒絕望感
1. 港超爭標戰進入最後直路，理文只要響最後一輪聯賽對傑志之前，對住均業北區同埋深水埗全取六分，就可以唔需要理會傑志果邊踢成點，可以提早袋走港超聯冠軍。
2. 結果今週理文對北區既比賽，雖然上半場理文有少許吃力，射極都射唔入咁款，但響上半場補時交段憑住基華利頓響混戰中射入打開紀錄之後，下半場既比賽理文就順利好多，荷西安祖、胡晉銘同埋保利臣一人一球，最後理文以四比零大勝北區。
3. 呢場全取三分之後，只要響下場對深水埗唔輸波既話，就可以歷史性響港超封王。
4. 深水埗響下半季進步唔少，但同佢哋同理文既實力其實真係有段距離，只要理文唔係自爆既話，要取得呢三分應該唔係乜嘢問題。都係果句，如果理文連對深水埗都輸波一分都拎唔到，真係冇資格拎港超冠軍。
5. 面對而家咁既情況，傑志會長伍健響菁英盃決賽記者會上面，都親口承認話聯賽響佢哋心目中已經係輸咗，專心爭兩個盃賽咁話。
6. 究竟伍健咁講係咪放棄聯賽呢？唔好唔記得，由5月12號開始到5月18號，傑志要響七日之內應付三場比賽，其中一場係菁英盃決賽對標準流浪，呢場一定唔會留力；而足總四強既對手就係兩個循環都令到傑志吃盡苦頭既東方；港超聯下場既對手係黑馬之一既冠忠南區，真係隊隊都唔弱，呢三場波傑志會唔會有取捨？定係全部強陣出擊？真係要拭目而待。
7. 關於傑志，仲有另一粒場外花生，話說有位球迷響面書傑志討論區出PO屌鳩傑志太子女Jessica，話佢要為簽咗水貨前南韓國腳金信煜負責，點知引咗老豆伍健出黎駁斥，其實我諗網上亂咁屌球員、高層或者教練都唔少，但屌到自己個寶貝女，我自己都係做人老豆(雖然小朋友仲好細)，都有啲明白點解佢會嬲到真係回應個po既。
8. 而今週有另一場另類既矚目大戰，由聯賽已經十一連敗既晉峰主場迎戰近況都叫唔錯(響養份球隊既水平黎講)既深水埗。呢場榜末既大戰，我諗住深水埗可以小勝，點知上半場反而係晉峰既攻勢有威脅啲，但佢哋既埋門一腳實在處理得太差，比深水埗既門將09梁興傑輕易化解。下半場深水埗攻勢多返啲，但晉峰既門將龐焯熙Bear表現認真唔錯救咗唔少波，雙方最後零比零各得一分。
9. 雖然晉峰成功拎到一分，但係佢哋因為對賽成績唔及香港U23，所以仍然排響榜尾，而佢哋最後兩場，分別係對南區同大埔兩支有實力既球隊，如無意外應該一分都拎唔到，包尾都好大機會走唔甩。
10. 點都好喇，希望下季港超仍然見到佢哋喇。
11. 上一次先響度講緊香港U23應唔應該繼續玩落去，今個星期就有香港U23既球員門將雲天樂就響自己既社交媒體上面，寫咗一段長文，去抒發自己既感受。
12. 唔講唔知，原來雲天樂14歲已經去咗英國留學，爭兩年就拎到英國passport，真係為咗追求自己既足球夢而不顧家人既反對，返咗香港踢職業波，但求圓夢，同埋力求有機會可以入選到香港隊。
13. 呢份熱血本身好令人佩服，但佢自己就話加盟咗香港U23先感覺到現實既殘酷，要香港U23呢隊冇外援既年青球隊去踢港超聯，就好似中一就去考DSE咁，場場都比人大炒，場場都係好絕望。
14. 「摧毀夢想，磨滅意志」呢八個字就係雲天樂講既，佢仲話︰「我常以為踢波會帶來歡樂和團結，但結果只有失望。我討厭自己內心正在慢慢熄滅的那團火，也不好意思告訴別人我在踢波，這都是我的痛和重擔。」
15. 其實香港U23成立既意思我覺得真係唔錯，用一個「三年計劃」去培養年青球員，但正如我上一集都講過，雖然球隊係比到年青球員上陣，但係場場四、五、六咁樣對佢哋既成長真係好咩？
16. 我依然係維持返自己上一集既結論︰希望下季仲見到香港U23，但同時唔好搞咁多限制，響確保到有潛質既年青球員有機會落場既前提下，請返啲有水準既外援同有經驗既本地球員，咁先至可以教到、帶得起班年青球員，而唔係靠港超二年生去帶領另一班新人，咁樣同摧毀一班幼苗冇分別。
17. 我唔係香港U23既球員，只係一個普通球迷，但我都希望祝福雲天樂，同埋其他既U23球員，如果真係夢想踢港隊既，唔好灰心，加油比心機，總會有人支持你哋。
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄 #足球 #菁英盃
#大埔 #傑志 #理文 #南區 #東方 #晉峰 #雲天樂
#深水埗 #香港U23 #港超聯 #伍健 #冠忠南區 #足總盃
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
