不專業足球筆記（二十一）︰陳肇鈞榮獲四料足球先生 安達臣辭任港隊主教練
不專業足球筆記（二十一）︰陳肇鈞榮獲四料足球先生 安達臣辭任港隊主教練
1. 話咁快，2023至2024年度既港超聯球季又黎到尾聲喇，主要錦標除咗足總盃決賽未踢之外，其他三個錦標已經各自名花有主，剩低落黎既，就係每年一度既香港足球明星選舉，亦都可以話係球員自己既個人成績表。
2. 算唔算驚奇定係預計之中呢？頒獎禮之前響公眾投票入面領先既，就係今季無論響港隊定球會都有出色表現，效力緊大埔既中場陳肇鈞。唔止足球先生，佢仲係港超最佳十一人(中場)、最受球迷歡迎球星，同埋最佳港隊成員，一次過拎晒四個獎，認真威水。
3. 不過雖然話少爺仔一路都響公眾投票之中領先，而且大埔今季既成績都真係幾喜出望外，最後勇奪港超亞軍，排名比起班霸傑志仲要高，但係香港足球先生呢個獎項，絕大多數時間都係頒比聯賽冠軍既，而且理文雖然好多時比賽都係表現麻麻，但係佢哋全季不敗既戰績又真係唔係呃返黎，聯賽雙殺傑志唔係隊隊都做到，假如足球先生真係響理文陣中選出，並唔係一件意外既事，好似安尼亞佢既表現就非常唔錯。
4. 少爺仔當然有好多加分位，除咗球會表現出色之外，佢響港隊既表現一樣搶鏡，為港隊響亞洲盃決賽週分組賽入面射入唯一一球入波，而且又係土生土長既華將，我諗呢啲全部都係加分位，而陳肇鈞最後亦都如公眾投票所願成功響職業生涯入面第一次取得香港足球先生既獎項，亦係繼2015至2016年葉鴻輝之後再一次由香港球員奪得呢項殊榮。
5. 其他獎唔特別講太多，大家一google就搵到，比較想提吓既，係最佳教練又再一次落響東方既盧比度手上。我覺得盧比度拎呢個獎真係實至名歸，上季東方踢得好唔錯，咁其實一隊青春班踢得好就一定會有唔少主力(好似胡晉銘同孫銘謙咁)比人掘角，但佢哋仲可以keep到水準，季尾兩次重要對碰都可以打贏傑志，直接令傑志喪失下季亞洲賽既資格，將一股青春風暴帶上港超，黎緊足總盃仲叫緊糊，盧比度可以話係功高至上。
6. 不過響香港足球明星選舉頒獎禮完結之後既第二日，即刻接二連三咁傳出不同既壞消息，第一個壞消息就係港隊既主教練安達臣辭職。
7. 其實由巨sir佢之前受訪既時候對足總既批評，都估到佢對而家既工作環境唔係幾滿意，畢竟佢一個人好似做好多唔同既工作，條team又多人part time，足總既支持又唔係好夠，所以雖然佢把口話如果唔係有啲更好條件既聘約，佢都會留響港隊，但講堅，當你講得出呢句既時候，其實你心入面多多少少已經有想走人既諗法，所以當傳出佢會離任既消息時，其實我只係覺得，呢一刻終於都係要黎。
8. 唔好誤會，人望高處，我唔係屌巨sir，有份好過香港教頭十倍既工，比著我都補錢即走喇。教練又好、球員又好，可以響香港球圈呢個小地方得到外面賞識其實都唔係壞事，至少證明，響香港投身足球唔一定係死路一條。
9. 對於巨sir帶領香港時所採用既逼搶戰術，雖然主流都係欣賞居多，但其實都有唔少聲音話港隊班球員唔啱咁踢，而係應該打返穩守突擊。對於我黎講，我反而唔係執著戰術，而係覺得巨sir對港足最大既貢獻係佢將一種「其實你哋做得到」既信念灌輸咗比班球員，等佢哋落到場既時候唔會怯、唔會淆、唔會一開始就打定輸數。亞洲盃決賽周、亞運四強、省港盃班小港腳，佢哋落到場既時候，表現出黎既都係一種「屌你放馬過黎，我唔撚驚你架」既感覺，姑勿論最後比賽出黎既結果係點(對住強隊打逼搶可能真係輸鑊甘)，總之就係改變咗球員既精神面貌，呢點真係我由細到大睇港隊比較少見既一面。
10. 結果就係所有重要比賽，港隊都踢得超晒水準，同時都引起唔少香港人留意港隊，所以如果問巨sir功多定過多，我答一定係功，亞洲盃分組賽、亞運四強，呢啲全部都會載入史冊。
11. 至於另一單消息就比起巨sir離任嚴重得多，就係港超聯同埋乙組球隊懷疑有人打假波。
12. 雖然ICAC仲未公佈係邊幾隊打假、邊啲人涉案，但係坊間已經有好多猜測，好多消息流出。綜合傳媒報導既消息，均業北區同埋佢既主帥梁志榮仲有佢哋既球員應該都有份。繼上次踢斷港會莊文歷隻腳之後又爆單打假波出黎，真係引起唔少球迷反感，紛紛湧上佢哋既社交網站留言。
13. 而家響香港搞波已經唔易，難得港隊近年引起咗唔少正面既關注，真係唔希望再有呢啲假波出現…
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄 #足球 #港超聯 #足球先生 #香港足球先生
#傑志 #理文 #香港隊勁揪 #陳肇鈞 #安達臣 #香港隊 #港隊教練
#假波 #均業北區 #梁志榮 #最佳教練 #盧比度 #東方 #大埔
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
