創業第一步，唔係開公司、租地方同請人，呢啲可以等到驗證咗有生意先搞；亦都唔使改定名、搞 logo、整網站同開 IG。最緊要係——搵到一個值得你去做嘅生意點子。
但好多人一聽到「搵生意 idea」，就即刻頭痛：
「我又唔係 Elon Musk，唔識發明啲乜。」「冇乜天才創意，點做生意呀？」
其實，最有潛力嘅點子，往往唔係天外飛仙，而係你每日生活入面發現到嘅痛點、興趣同能力。加少少觀察力同創意，就可以變成機會。你可能而家已經具備足夠條件開一門生意，淨係未發掘到當中細節！
最近同一位朋友傾偈，佢話諗緊搞個新生意，但係計嚟計去都計唔掂條數：租金太貴，租得太大驚用唔晒，租得太細又唔抵，唔知點算好。我問佢：「客人點解要幫襯你呢個生意？」佢一時間講唔出個所以然。於是我建議佢不如試下將諗緊嘅嘢寫低，整理晒啲意念，用 Mind Map 將呢啲「點子」圖像化，睇下可唔可以砌到個似樣嘅商業模式。
以下就係我慣用、亦推介畀一人創業者做練習嘅一套「生意點子發掘流程」：
🔍 1. 由「問題」開始：你幫到人，就係值錢
好生意 = 解決問題。
你可以問下自己：
- 日常生活入面有冇啲煩惱搞到你火滾？
- 身邊朋友經常喊苦或者搵你幫手嘅係啲咩嘢？
- 有冇啲服務或者產品令你諗「我一定可以做得更好」？
📝 小練習：
寫低最近遇到嘅 3 個最唔爽嘅經歷（痛點），睇下當中有冇改善空間。
例子：
- 「成日搵唔到啱用嘅 Notion 模板」→ 製作模板＋教學班
- 「朋友成日問我點樣整理 IG feed」→ 推出 IG content 小工具包
🙋 進階問題：
- 我可以為對方帶嚟咩價值？
- 我嘅參與可以點樣改善呢個「痛點」？
🧠 2. 由你自己出發：你擅長／鍾意嘅，就係起點
你係咪經常幫人整簡報？又或者閒時會整網頁、煮嘢食、教人寫文案？
記住：你嘅興趣＋技能＋市場需求，就可以變成一盤生意。
📝 小練習：
諗下以下幾點（諗到就即刻寫低）：
- 你特別擅長啲乜嘢？
- 身邊邊啲人經常搵你幫手？
- 你做過咩 project／分享過咩知識最令人留下深刻印象？
舉個例：
- 你鍾意畫畫，又識 marketing → 幫中小品牌設計社交媒體插圖
- 你識 Excel → 教創業者用 Excel 做報表同現金流管理
（留意呢啲傳統技能將會畀 AI 取代，以上兩個例子都可能好快會過時）
- 你鍾意學習／識用 AI 工具 → 幫中小企業運用 AI 工具提升生產力
🙋 進階問題：
- 我可以為客人創造到咩價值？
- 點解客人願意畀錢買你呢個產品／服務？
🌍 3. 由市場觀察入手：世界轉緊，靈感喺四周
好多人話：「啲生意 idea 啲人做晒喇！」
但事實係，時代變好快，每日都有新問題、新需要等緊你去解決。
👀 觀察位：
- 近年邊啲人群變得活躍？（例如 SLASH 族、中年轉型者、在職創業者）
- 生活方式有咩改變？（WFH、多平台自媒體、AI 工具潮）
- 社交平台上面大家成日討論／抱怨啲乜？
當人哋開始適應新嘅生活方式，自然就會需要新嘅產品／服務／工具／支援／社群。
例：
- 疫情後，大家習慣咗用 Zoom → 網上補習／教學／咨詢／輔導／顧問服務大量普及
- 疫情期間少咗去餐廳＋經濟差 → 兩餸飯／純外賣興起
🙋 進階問題：
- AI 浪潮會令咩工種消失？我哋生活習慣會有咩改變？會衍生咩新需求？
- 世界生產供應鏈大洗牌，關我哋咩事？有咩機會？
- 經濟差、心情差，會帶來咩新需求？
🎯 4. Mix & Match：創意唔一定要原創，可以係組合
（溝埋嚟做瀨尿牛丸，吖笨！）
你鍾意煮嘢食，朋友又成日話冇時間整飯 →「一人份量健康便當食譜＋食材包」
你識寫內容，又熟 Notion →「創業者 Notion 模板＋寫作指南」
用「你識做嘅嘢」＋「一個市場痛點」，就可以諗到好多可能性。
（呢部分最好玩，稍後會詳細講解）
🗂️ Bonus：建立你自己嘅「點子倉庫」(非常重要‼️)
我成日鼓勵創業者整個「Idea Bank」：
唔使每個 idea 都即刻落手做，但一定要記低晒，因為有啲點子今日睇落唔啱，半年後時機到就啱用㗎喇。唔記低嘅話，好嘅靈感就會白白流失。
我自己會用 Notion 分類收埋所有閃過嘅靈感，唔一定即刻實行，但需要嘅時候就可以攞出嚟發展。
✅ 總結：生意點子，其實一直喺你身邊
你唔使「諗爆頭」先至叫創業。
你淨係需要睇清楚自己識啲乜、鍾意啲乜、同埋身邊發生緊啲乜，然後踏出第一步。
🔸 幫人解決問題
🔸 善用你嘅能力同熱情
🔸 留意生活細節
🔸 慢慢建立屬於你嘅生意雛形
創業就係咁樣開始㗎。
如果你想有系統咁搵點子，我整咗一份《生意點子發掘練習工作紙》，歡迎 DM／留言，我可以 send 畀你 📩
你最近有冇閃過咩靈感，但未有時間發展？留言同我傾下，等我幫你諗下點樣將個 idea 變得更完整啦 🔥
—
我係 Kevin，一人創業者，呢個係我嘅創業修行筆記📝。每日我會分享我嘅創業心得同埋挑戰，希望可以同大家一齊行，一齊玩，一齊成長。
