背景
是咁的，話說當年喺香港都有行吓山，喺各大郊野公園留低咗唔少腳毛。
有一年心血來潮，搵咗三位隊友，就參加咗第一次「毅行者」。「毅行者」係一個舉辦咗40年嘅大型籌款活動，規則係四個人一隊，要由麥理浩徑起點行到終點（即係香港新界由東至西嘅山脈⛰️），全程100公里，要上落幾座山峰，最高一座有九百幾米。呢個活動特別重視團隊精神，隊友之間要互相支持，四個人一條心先可以完成。過程係非常之辛苦，係體能、意志力同埋情緒嘅極限挑戰！同時，就係因為經歷咗呢啲艱辛，完成之後先會有咁大嘅滿足感同成就感！第一次完成「毅行者」之後，就完全上咗癮，開始迷上呢類長途行山活動，年年都想參加，想挑戰自己，嘗試唔同類型嘅「山賽」🏃
其中有個活動印象特別深刻，就係叫「山頭霸王」。呢個活動係兩日一夜，夜晚會喺 campsite 紮營，要孭晒所有裝備上身，唔似「毅行者」咁有補給同 support team。最癲嘅位唔係要孭住幾十 K 裝備行山，而係個活動冇特定路線！每年路線都唔同，活動開始前幾日先公布集合地點，連開始咗都唔知條路點行！因為玩法係會俾提示你下一個 checkpoint 喺邊，你就要同隊友一齊商量點行——係咪sure真係要去嗰個位置？係要行穩陣路線定係抄捷徑追時間？完全靠大家即場決定！如是者行過好幾個 checkpoints，如果順利嘅話（冇盪失路、冇跌落山、冇嗌交反面、冇人提早離隊），就會去到預備好嘅 campsite 休息。雖然呢個時候筋疲力盡，但係反而係最美好嘅時光——一班隊友享受緊整日嘅成果，回味路途上嘅甜酸苦辣，仲要興奮雀躍咁議論第二日嘅策略！呢個咁特別嘅經歷，其實同我哋創業係極之相似！我哋好多時都係開始咗，行咗一陣，慢慢先搞清楚我哋其實係要行去邊！Uncertainties 就係精髓！再次出發
經歷過近10年嘅休養生息，噚日我又重新出發啦！我參加咗 Ultra Challenge 搞嘅 Easter 50 - 25K 徒步挑戰，連同兩位隊友，由溫莎堡 (Windsor Castle) 附近出發，沿住泰晤士河 (River Thames) 圍繞溫莎堡周邊行一圈。當日天氣超好，風景好靚，氣氛都好正，但老實講——呢條路唔係想像中咁輕鬆。
嗰25公里，就好似一段創業路。你會期待、會痛苦、會掙扎、會想放棄，但只要你一路行，一路留意周圍環境嘅變化同埋自己身體嘅反應，順應變化去調整同回應，你就會發現——原來自己唔單止行得到，仲可能會有意想不到嘅收穫。
1｜出發前：以為簡單，點知一行就知唔講得笑
起步時好開心，風光明媚，氣氛又正，見到 Windsor Castle 喺陽光下閃閃發亮，真係覺得自己今次做咗一個非常明智嘅選擇。
不過行咗幾公里，我就開始發現——「原來真係唔易頂」。可能係太耐無行，疏於練習；可能係年紀大咗，體力下降；可能係太過自信，睇小25K，可能係之一晚趕稿，冇乜點瞓。
同創業一樣，頭先出發嗰種興奮感，撐唔到一半；發現冇體力、唔夠水、冇戴帽冇防曬、腳板底開始痛，全部都好實在。
2｜沿路掙扎：我幾次真係好想放棄，尤其見到間pub…
行到中段太陽越曬越猛，我自己又拎唔夠水，條路開始覺得沒完沒了，嗰種「唔知仲有幾遠」嘅感覺，真係好折磨。
我記得經過一間 pub，心入面閃起一個念頭：「不如入去飲返杯冰凍 IPA 吖？！」
但另一個聲音好理性：「你一坐低，就唔會再起得返身。」
就係咁，我繼續行。但我冇硬撐——好彩隊友有準備啲小小 reward 俾我：朱古力、鹽糖、energy gel。
每行完一小段，我就俾自己食一粒，好似一個 checkpoint，鼓勵自己：「你做到㗎，食完再行多一小段。」
創業都一樣，有時就靠一杯靚酒、一個 short break、一句鼓勵，幫自己撐過去。
3｜想跟人行，但最後都要行自己條路
沿路有兩位靚女行得幾 steady，我一度想跟住佢哋行，希望可以一齊傾下偈、分散注意力。
但行咗一陣我發現——大家步伐唔同，跟人哋反而搞亂咗自己節奏。
最後我選擇跟返自己步伐，寧願一個人行得自在，都唔想勉強。
就好似創業，見到身邊啲人做得好想追，但你唔知佢哋背後付出咗幾多，又唔一定適合你走果條路。
按自己節奏去行，先行得遠。
4｜支援系統堅重要：兩塊膠布救咗對腳
行到 checkpoint 時我真係頂唔順，要搵 first aid 幫手。
喺嗰一刻我係有啲猶豫——「都頂咗一半路，唔掙在嗰一半，不如頂埋佢啦！」「唔好搞咁多嘢，一陣搞完可能仲衰」「我邊有咁流呀！100K 都行過咁多次，小問題啫，冇事嘅！」就喺呢啲小聲音彈出嚟嘅瞬間，隊長講咗句：「我去廁所先，你埋去 first aid 搞搞佢！」咁我就好自然行咗埋去，咁啱又有位靚女 first-aider 喺度 stand-by，結果佢幫我腳板底貼咗兩塊大膠布。當時都唔覺得有咩特別，依家行完先知呢兩塊膠布真心救命，無佢我唔知點行埋尾段。就算頂到落尾，對腳肯定慘不忍睹！
仲有我嘅隊長 Ralph 同隊友阿健，佢兩位沿路都好照顧我，不停 check in 我嘅狀態，問我夠唔夠水、需唔需要停、使唔使食粒糖咁。
創業路上，呢啲支援系統超級重要，可能係你嘅拍檔、mentor、社群、朋友。佢哋唔一定要做啲好偉大嘅事，但只要夠溫暖、夠穩定，就已經可以令我哋行得更遠。
5｜最後幾公里：行到癲，但好感動
最後幾公里係最難行，但亦係最感動。身體明明好攰，但你知終點就喺前面。
每一步都係靠意志同信念頂住，唔係靠體力。
成條 route 最精彩嘅一段，就係 Windsor Castle 後面嗰段 The Long Walk。由 King George III 騎馬銅像開始，一條大直路直入溫莎堡。呢條係我見過最長嘅大直路，沿途冇遮冇掩，要喺溫暖陽光底下行足四公里！喺英國難得見到咁好嘅天氣，我要不停淋水降溫。睇住前面嘅溫莎堡慢慢放大，知道終點就喺前面，係一個好好嘅提醒。每次轉頭望返個銅像，越來越遠，亦畀到我好大鼓勵，原來我已經行咗好遠啦！
The Long Walk
臨近終點，見到有位路過嘅街坊婆婆，好感動咁為我哋打氣。佢睇嚟知道呢個係慈善活動，覺得我哋好有heart。佢嘅真誠打氣，令我都感到好窩心。
行到終點果刻，唔只係完成目標，而係真心覺得：「原來我又升咗呢 (level) 啦！」
結語｜創業不只是衝線，而是一路行一路成長
25K，我行完咗。
唔係為咗行得快、唔係為咗睇起嚟有型，而係用自己嘅方式同節奏，同隊友一齊行到終點。
創業都係咁。你會攰、會想放棄、會幻想衝入間 pub 飲杯 IPA，但只要你有啲小 reward 獎勵自己、有善心人幫你貼膠布、有可靠嘅隊友喺身邊、仲有路人為你打氣，你就可以一步一步行到下一個 checkpoint，最後去到你想去嘅遠方。
💬 你最近有冇行緊一段屬於你自己嘅「毅行路」？唔一定係創業，可能係轉工、轉型、人生方向轉彎。
歡迎留言同我分享，或者…揀一日，一齊出去行下 5K，當係熱身😉
P.S. 喺我寫緊呢篇文之際，隊長已經吹雞六月再行！長跑、長途山賽同創業一樣，就係有呢種魔力，試過一次之後，就會好想再玩！喺呢度我要感謝隊長 Ralph 同隊友阿健，亦特別感謝我首次毅行隊友、亦係今次活動吹雞者 Philip，以及感謝過往陪我一齊行過嘅每位朋友。
—
我係 Kevin，一人創業者，呢個係我嘅創業毅行筆記📝。每日我會分享我嘅創業心得同埋挑戰，希望可以同大家一齊行，一齊玩，一齊成長。
