拖延呢個問題，講真幾乎每個人都中過招。無論係搞創作、做生意、寫 proposal、覆 email，總有啲 moment 會忍唔住諗：「不如陣間先啦……」老實講，我都成日拖延。呢篇 blog 其實係我拖咗第 N 次 ( 以年計 ) 之後，終於開咗個 Notion 檔開始寫嘅。點解我會拖？你又點解會拖？
拖延唔一定係「懶」，好多時只係你嘅腦想保護你——避開壓力、避開恐懼、避開未知嘅東西。但問題係：拖得耐，你會開始懷疑自己，甚至唔敢再開始。你有冇察覺「拖延」點樣影響你嘅工作，以至整個人生？吓？你未試過拖延？不如花兩三分鐘睇吓以下內容：
🧠 拖延的真相：你唔係唔夠勤力，而係太想做得好好多人以為自己懶，其實唔係。
我發現拖延背後通常有三種情況：
1. 想做得 perfect，反而唔敢開始 (完美主義)
想寫篇 blog，但覺得開場唔夠吸引，就卡住
想出個 IG post，但唔知邊張圖先啱，就唔出
➡ 結果就不斷醞釀、準備、雕琢、打磨，磨咗九廿幾世都未肯開始。
2. 驚自己唔夠資格做 (自我懷疑 / 恐懼失敗)
「我寫呢啲，邊個想睇呀？」
「人到中年，仲有咩資格講創業？」
➡ 拖延就變成咗保護機制：唔開始 = 唔失敗。
3. 任務太大，太混亂，唔知點入手
成日話「我要做啲嘢」，但實際上係咩？諗起要做個新 project 🥴，要 launch 一啲新產品，要 create 新內容 😵，一大堆嘢未 plan 清楚唔知邊度入手 😵💫 ……講咗幾日都仲未開頭。
➡ 腦入面「Overload」 🤯，最易轉向去碌 IG／煲劇／打機 / 行街 / 飲茶。
4. 缺乏即時回報 ( 孤單感覺 / 倦怠 / 失去動力 )
創業、寫作、創作內容，好多都係一個人長期作戰。冇人即刻鼓掌👏 畀 like 👍 畀 feedbacks，好容易會冇晒動力。( 唔該晒各位師兄師姐，睇完畀個 🤍 同留言，再追蹤埋我，萬分感激🙏 )
✋ 「拖延」其實唔係壞人，佢只係想保護你，佢係嚟提醒你「避開痛苦」
你嘅大腦唔係想你失敗，所以佢用拖延呢招，令你 唔洗面對不確定、唔洗即刻冒險。
但問題係：你會越拖越怕，越怕越唔敢郁。
我發現一個轉念好重要：
「拖延唔係敵人，而係一個訊號，係我哋嘅貴人。」
佢可能係提醒緊你「攰需要休息」、「方向唔清楚」、或者「太過完美」。
💡 Kevin-style 反拖延行動方案（Beta 版）
🔸 第一層：覺察拖延
拖延唔係壞習慣，係訊號，搵出佢背後嘅意思先。
每日 Check-in 問自己：
• 我依家唔想開始，係因為咩？（太複雜？驚？唔知點做？）
• 我可以用「好奇心」代替壓力嗎？（例如：「試吓咁做會點？」）
🔸 第二層：做事變簡單
✅ STEP 1: 任務碎片化（Chunk it down）
「唔好寫 blog，淨係開個 Notion page 同寫 title」
「唔好整個 IG carousel，先畫 3 張手稿」
🔧 小任務例子：
• 開咗個檔案就當完成
• 記低 3 個重點就當開始
• 搵 1 張 reference 圖就算有交代
( 我以前成日諗住 “aim high, fly high”，結果 high 得濟搞到好似遙不可及，而家識得將啲行動 chop 細佢，每次只做一小部份，容易掌握得多！)
✅ STEP 2: 計劃用「時段」唔用「結果」
唔係要做到幾多，而係投入幾耐
建議試用：
• 「番茄鐘法」：25 分鐘專注 / 5 分鐘休息
• 「90 分鐘深度工作 + 30 分鐘咀嚼時間」
( 可以配合埋 “5分鐘法則” + Step 1 - 通常你開始咗，就會繼續。例如 set 3 個鐘頭要睇晒成本書會覺得好大壓力，5 分鐘睇兩頁就輕鬆好多！)
🔸 第三層：創造動力與支持
🔁 建立創作 / 工作「儀式感」
開工前固定做一件事，例如泡杯茶、開 Spotify playlist、開 Notion。
讓身體知道「我準備開波」。
🤝 找 Accountability Buddy / Co-working
同一個 friend 或 IG follower 約定：今晚9點一齊 co-work + 做完 post 成果。
有眼望住就唔會死托。
🧠 用「回報」獎勵自己
完成咗 25 分鐘任務，就可以睇片 / 飲杯靚茶 / 食件甜品
令大腦習慣「開始＝會有好嘢」
🔸 第四層：自我安撫與重設
記住一句話：
拖延唔係失敗，而係你需要休息、支持，或者方法需要改變。
✅ 睇清「今日做唔到 ≠ 你唔夠好」
✅ 放過自己，明日再嚟
✅ 有時 reset 比執著更有效
Kevin-style 反拖延行動方案
🧭 結尾：行第一步，先至有第二步
寫完呢篇 blog，其實我都仲有少少驚——驚你唔鍾意、驚冇人睇
但我 remind 自己：「未出，就一定冇人知你想講咩；出咗，最少有機會連結到一個人。」
拖延會繼續出現，但你每次選擇行一小步，就已經喺打破舊有迴圈。
✨ Ask Yourself 問問自己
• 你最近有咩任務一直拖緊？不如留個言或者私訊，我陪你拆解
• 如果你想開波但唔知點開始，可以試下持續修煉以上「反拖延」四大行動
• 想 join 我一齊 co-working／co-create / 玩出商機？快啲嚟參加我哋嘅工作坊啦！
—
我係 Kevin，一人創業者，呢個係我嘅創業修行筆記📝。每日我會分享我嘅創業心得同埋挑戰，希望可以同大家一齊玩，一齊成長。
