Gdańsk 交前一个城市 Poznań 相𫝛有 tsuē-tsuē 濟皂壁，遮 ê 有交 tsuē-tsuē 角勢有伊特別 ê 意義 mā 有伊無兜無梢牽山伴林 ê 藝術發想。我是藝術悾戇人，看無藝術深含 ê 14 總是這張圖我知捌伊 tuì 波蘭交規个 hōo 惡霸關 tī 櫳仔內底 ê 人 ê 意義，就請東南西北分 ē 明 ê 翁𤆬我坐輕鐵過站斬路來到 Zaspa 看這張皂壁，順紲巡規个社區 ê 皂壁。
Zaspa tī 歐戰進前是一搭人口大約 1800 ê 田庄，因為軍事需求起造機場 tī 1914 畫入 Gdańsk 行政區。 1923 Zaspa 機場成做前往北歐丹麥、瑞典、挪威重要 ê 轉機機場。
二戰結束，因為城市土地無法度繼續提供機場楦闊計劃，1974 Zaspa 機場閉鎖。 Zaspa 目今 ê 建築多數起造 tī 1980，建築物頂 ê 皂壁出現 tī Y2K 2000 這跤兜。波蘭 ê 皂壁大四界，第一任總統 Lech Wałęsa 交教宗聖保祿二世 ê 畫像抑是銅像 tī 波蘭 mā 滿四界，呔討專門愛來遮看首圖皂壁？
江湖一點訣，講破無價值 ê 若無人講我想 tsuē-tsuē 人合該然交我相𫝛 tuì 這張圖 buē 有啥物特別 ê 感想。我承認我低路人需要虛華成做引𤆬雞才有才調揣交引路人 gún 翁𤆬我來遮行踏。
遮是 Lech Wałęsa ê 徛家社區，Solidarność 團結工聯 1987.6 教宗聖保祿二世來遮交探訪 Lech Wałęsa。
Zaspa 上出名 ê 觀光景點是伊大甲若跤球場 ê 公園，Lech Wałęsa ê 向時徛家敢徛位 tī 公園內底，我無一个認捌，不過獨獨踅這个社區就 hōo 我一日貼貼無才調想別搭。
行踏 Gdańsk 進前，gún 翁驚惶 tuì 公里數無概念 ê 牽手青磅白磅開喙 tuì 伊講「波蘭交臺灣相比並，波蘭交德國是厝邊，按呢咱就順紲來波蘭首都 Warszawa 行跤花」就一路洗腦你嫌柏林䆀 Warszawa 愈䆀 m̄ 值一逝路走到遐，像 H 佮 G 按呢。
翁 ê 朋友𪜶是城市都市組離開繁華人生隨烏白 ê buē 生活，所致行踏波蘭 kan-ta Warszawa 佮 Kraków 我理解，總是我 m̄ 是城市都市組，伊按呢竹篙鬥菜刀，押尾成做刣死家己 ê 彼支刀。
「華沙䆀 tsi-tsi 恁德國人愛負責任」我手那指風格若 1920 Bitwa warszawska(戰火烈愛，2011) ê 皂壁那講 mā 斡頭行向規張壁我 kan-na 看有鸚哥 ê 皂壁。
「恁兜興鸚哥 ê 幻想世界，我無興飼鸚哥 mā 無興理解鸚哥 ê 世界，歹勢，總是我 buē 烏白濫糝要求別人做寡違背伊家己意願 ê 代誌，特別是我從來 m̄ 捌有這个想法，起因看過 1920 Bitwa warszawska 交目今 ê 新聞畫面鬥做伙，比 Warszawa 閣較有意思 ê 城市等我探訪，結束。」
掠做跟綴厝內傳統 kā 傳家佛經世世(踅踅)唸就有才調避險 hōo 銀兩免做水沖 ê 伊，想 buē 到 hōo 家己埋 tī 塗石流內底。
我知影 tsuē-tsuē 人行踏一个國家，一个國家 ê 首都無去拜訪誠無彩工，總是目今 ê 旅行方式交向時無相𫝛，目今 ê 交通利便甲愛去 Mallorca 就飛去 Mallorca， 愛去 Faro 就飛去 Faro hōo 旅者一屑仔時間齊無討債 ê 按 A 到 B，像 ドラえもん 任意門利便甲。另外，窒倒街 ê 網路訊息 mā 無料提供厚甲若蠓 ê 智慧 hōo 人做選擇，按呢綿精承爸母佛經真正 hōo 我厭𤺪，無 kā 日本剾刀攑出來 kā 剾剾，我會著蛆。
凡勢遮是抵抗洗腦 ê 徛地，所致著蛆事件一敨放，這張隨人觀賞隨人主意 ê 圖 mā 交我相借問。
「我 m̄ 知影你按怎看這張圖，總是我個人認為伊有兩个意義，一个是爸母掌控囡仔 ê 意識，一个是爸母跟綴囡仔 ê 世界調整𪜶看世界 ê 角度，𫝛時 mā kā 𪜶 ê 人生智慧交經驗分張 hōo 囡仔，一个人 ê 態度是一个家庭 ê 延續」我拚勢揣角勢掠我意愛 ê 色緻，總是徛位東海天僫得紺色色緻 ê Gdańsk m̄ 管我按怎揣角度，翕出來 ê 色緻就是殕色，不過有修圖 APP hōo 敨放我 Chopin ê 愛。
無人佮意別人講家己 ê 爸母，翁 mā 知機我 ê 日本剾洗猶原攑牢牢，牽手佮爸母跳落海先救 Tsiâ，伊選擇救牽手就馬耳東風，一耳空入，一耳空出，保持和平。
Chopin tuì 波蘭 ê 重要性宛然教宗聖保祿，這个理解是行踏波蘭 tsuē 斗 tsiah 得著 ê 智慧。
俗語講大隻雞慢啼，我是細隻雞 buē 曉啼，總是戲館邊 ê 豬母，buē 曉歕簫 mā-ē 拍拍，自第一斗行踏波蘭搪著 Chopin m̄ 知伊 tuì 波蘭 ê 重要性，到今沓沓仔理解人生在世短短 39 冬 ê 伊，tuì 波蘭交佮意古典音樂 ê 人呔討遮爾仔重要。
雖罔，我認捌 ê 故事猶原無夠半額 ê 連豬屎籃仔 mā 無才調提出來品並。
順皂壁巡禮 mā 順皂壁生智慧，「咱敢會使得莫成做別人娛樂 ê 對象? 」當我行到這幅皂壁，我想著猶未徙岫前 ê 一耳空入，一耳空出 ê 和平是目今 ê 癌症。
「是你一直講 gún 爸母 m̄ 是」翁 ê 紲話成做這斗快樂出帆，成做駐水無救 ê 火引，總是天公疼戇人 hōo 我 tī 這幅圖看著問題，無想 bueh 綿豉 kā 美好時間匪類 tī 交我一屑仔齊無底 ê 人。
「拄仔咱有見著兩蕊目睭，目睭看起來若看𫝛位，總是認真看會使得看出一蕊目睭已經無 tī 現場，賰時間敨放伊自由，我目今有才調 ê 態度就是恬靜甲掃塗跤 kā 家己 ê 環境摒 hōo 清氣啖啖」微微仔笑 kā 別人兜 ê 問題送走 hōo gún-ê 時間留 hōo 孤人 ê 恬靜並餾眼前所見過 ê 圖。
序大摒掃這張按德國來 ê 皂壁是規个社區我上佮意 ê 一幅，規張壁 kan-ta 這位序大無別 ê 配圖。
圖像 ê 序大是經過裁圖 tsiah 有法度見著伊 tī 曠闊 ê 土地恬靜摒掃。
序四摒掃表示，世間闊莽莽甲咱無法度規个角勢摒盪甲 tsiâu-tsn̂g，總是上重要 ê 彼塊地需要好好摒掃。
咱人屬群居動物，咱有有才調一个人跳舞，總是兩个人跳舞 ê 快樂 tsuē 過孤一人，咱每一對舞者有屬於家己 ê 舞步，好好仔跳家己意愛 ê 舞步，比要意別人意愛 ê 舞步閣較重要。
田無溝，水無流 ê 2 冬𪜶猶原 bueh 來做水沖，這款龍鳳生活 m̄ 是我有才調控制，畢竟球 tī gún 翁 ê 手頭，伊 bueh 跳 Walzer 抑是 bueh 跳 Breaking 霹靂舞是伊個人選擇，起因我個人清楚知影我猶 teh 來回泅水揣答案。
遮 ê 皂壁晝家多數按波蘭來 mā 融合按德國抑是其他國家來 ê 畫家，因為德文是英文掠外我較慣勢 ê 語言，所致我 ê CPU 按 2021 行到 2025 猶原 kan-ta 保持佗幾張圖是德國畫家 ê 作品。
Win or lose 猶 ē 記持 1999 歐元發行，我歡喜甲 buē 顧，起因頇顢認錢 ê 我總算會使得敨放這是意大利 Lira，彼是西班牙 Peseta，這是德國 Mark，目今數念往過 ê 頇顢。我非經濟學者，總是按國內生產毛額 GDP 購買(kòo-bué) PPP 來表達我 tuì 歐元區 ê 想法，民生消費本底比德國俗價 ê 希臘、意大利、西班牙等等民生物價齊漲懸價 hōo 我按本底兩手空空到位改做箱仔儘量楔甲飽滇 tsiah 出門。
歐元 ê 設立是 uī-tio̍h 交美金相比並，總是美金 kan-ta 需要照顧美國，歐元卻 m̄ 是。舉俗麭 ê 例，無使用歐元 ê 波蘭交捷克𪜶 ê 俗麭價數交德國無啥無相𫝛，大約 tī 0.89€ ~ 2.29€ 這跤兜(看牌子)，2022 希臘露營車日子，每一搭超市所搪著 ê 超市品牌一條上俗價 2€ 起跳閣無地選擇全麥口味。希臘敢無食麭？呔討希臘 ê 俗麭框金閣包銀？
波羅的海 3 國 ê 衛生棉愈譀古，譀古甲 hōo 我講，這是刁意故處罰女性。平平一包 20 塊無翼股 ê 衛生棉德國賣 0.99€(超市品牌)，波羅的海 3 國上平價 ê 印象是 3€ 左右。歐洲五彩十色 ê 龍銀變做齊一色是好抑是䆀？我非歐洲人無才調 uī 𪜶開喙，畢竟我徛 ê 角勢平均消費較實比別搭俗價 hōo 我有才調出門成做下跤這張圖，以少少 ê 錢自在飛自在享受。
波蘭敢捌討論加入歐元區，這个議題我無研究，總是我 tuì 翁講「一日波蘭交捷克齊 bueh 加入歐元區，𪜶 ê 人民 bueh 上街抗議，我 mā bueh 參加。」
歐元 tuì 頇顢 kā 數字換來換去 ê 我唯一 ê 益處是，當我見著相𫝛 ê 物有才調隨交德國物價相比並，然後褒嗦抑是成做茶鈷呻。
行踏波蘭捷克這冬，我 ê 面冊人生 mā 拄好搪著我呔討需要 kā 生份人 ê 情緒捾 tī 手頭，然後一直窞倕(thām-thuī) ê 問題，紲落來閣成做羅馬競技場交獅、虎、豹、熊拚性命 ê 人。
「咱生活 tī 自由 ê 空間，無人逼咱行入羅馬競技場，總是這陣 ê 我卻㧎 tī 競技場走 buē 開跤 mā tuì 家己叨撚」行到羅馬競技場想著 Gladiator，想著喙講 This is not Sparta 卻是 This is Sparta ê 平民百姓得著一隻德國豬➀ hōo 演算法成做頭人 ê 巴禮講道，家己攏著，是 m̄ 是 Sparta 齊伊講了算𤆬 hōo 我 ê 齷齪，喙無法無成做茶鈷呻一睏。
「離開遐 ê 䆀就好」翁建議。
「我 mā 知離開遐 ê 䆀就是聰明，總是遐 ê 䆀猶原交我相黏蒂帶」我笑講。
我 ê 面冊自本無到十个朋友，因為朋友四界交朋友，伊 ê 朋友迵過伊 ê 口座交我成做朋友。早前搪著遮 ê 交我一屑仔攏無底代 ê 面冊朋友，我齊無聲拒絕，總是咱人是情感動物 buē 堪得 hōo 朋友講無夠朋友，就一路交朋友交到倚 bueh 60 个 ê 10 是我自頭到尾齊熟似 ê 朋友，50 个齊 m̄ 知生做啥物生張 ê 朋友。遮 ê 面冊朋友有一部份 mā 是驚失人禮加入面冊社團，一个搝一个 ê 朋友。我佮意我家己 ê 面冊環境，總是自遮 ê 交我無底代 ê 人出現，我開始驚上面冊，特別是參加面冊社團以後，一个無揤讚隨有人來關心。行踏波蘭見著這張圖，我是我家己面冊唯一交朋友清楚知機互相生做啥物生張 ê 人，其他 50 个齊是白影抑是烏影啥物齊看無 ê 人，tī 這逝行跤花 kā 朋友講我 buaih 閣使用面冊就隨 kā 口座刪除到今 m̄ 捌翻頭起造新口座。
「Gdańsk 是海港」離開皂壁社區翁無頭無尾出這句，我 mā 順家己當下 ê 想法應講「我敢有青盲？」伊驚甲隨講我無彼个意思，我 mā 隨捎著問題隨搭伊胸坎講「我 mā 無彼个意思，咱齊食著恁爸母 ê 毒，咱愛做陣改毒。」
Gún 翁𪜶爸母認為家己是引底里，萬項事驚低路人 m̄ 捌字閣 buē 曉看告示，一餾閣餾，餾甲臭臊抑是 m̄ 捌一箍呼猶是伊上知 ê 講 hōo 你捌。
「我想 bueh 看德國起 ê 燈塔，敢有興趣？」伊好禮仔請教。
「燈塔探訪結束，咱敢會使得去食下昏頓？」我 mā 好禮仔請教。
「燈塔彼附近有一間紹介講當地人灶跤 ê 波蘭水餃店 Pierogi，你敢有興趣？」
「只要莫叫我轉去食麭，我齊有興趣」我刁意故 kā 伊要求我跟綴𪜶兜傳統 ê 臭酸代款出來講。
「你無綴我姓」翁笑應。
翁 ê 願望達成，請輕鐵送我到當地人 ê 灶跤。
「正港是當地人 ê 灶跤，無半个外國語文」我看齊是 ABCDEFG m̄ 閣鬥做伙 m̄ 捌半字 ê 波蘭文講。
Gún 翁拚勢以離線 APP 翻譯菜單，翻甲一粒頭兩粒大總算願意放下，擔頭 tuì 我講我 kan-ta 捌「Pierogi 一味。」
我擔頭看廚房，廚房有工作人員，m̄-koh 無半个人出來交我挨拶，我喙隨食 Lê-bóng 講「蘇聯無去，猶閣保持蘇聯態度，這 mā 蓋有底氣 m̄ 驚趁無錢。」
「遮應當是手面趁食交 Breslau➁無相𫝛。」
著--hooh，呔無想著這點，Lê-bóng 擲掉換食蜂蜜兼青盲掠龍順 Pierogi 「點」菜。
菜點好，揣桌坐，翁驚點著龜怪物隨手抄菜名紲落來傱去有公共 Wifi ê 輕鐵揣答案，tī 伊猶未轉來進前 gún 點 ê 菜色已經上桌。
「咱若點著套餐--neh」我講。
「M̄ 知影，不過 Pierogi 是包菠薐仔」翁 kā 翻譯成果分張 hōo 我看。
「按皮看色水確實是菠薐仔，按外形推斷伊 mā 是手工包 ê Pierogi」我講。
「按呢決定好味素」翁講。
「送入喙 tsiah 知影答案」我𥍉一下目，翁知影我 teh 剾洗𪜶老母笑甲吭跤翹紲喙講「Gún 兜彼位較特殊。」
是「咱敢會使得莫成做別人娛樂 ê 對象? 」tī 伊 ê 心肝穎沓沓仔發穎抑是，我 m̄ 知影，總是我講 ê 代誌是事實，tī 𪜶兜手工做 ê 物件從來 m̄ 捌好味素過。
我無確定這間店敢誠實手面趁食，畢竟手面趁食 buē 遮爾仔厚工家己研皮包餡，像 Breslau 店東按呢。不過這間猶原蘇聯味 ê 當地人灶跤正港好味素 hōo 我數念到今。
整理這段記持寫著蘇聯風格「烏克蘭」三个字步頻出現，這間無服務態度 ê 店凡勢是烏克蘭經營 ê 店。
波蘭就有 tsuē-tsuē 烏克蘭人 tī 遐生活做穡。
➀ 德文俗諺 Schwein gehabt，好字運
➁ 德文 Breslau, 波蘭文 Wrocław
2021.08.30
