進前，澳底是一个誠散赤的漁村，大部份的人攏咧掠魚，寡婦真濟，因為查埔人出海，定定拄著風颱，無轉來。
台２線，濱海公路開通了後，慢慢仔有人開餐廳，外口來的遊客來遮食海產，做生理的人較有賺錢；漁船的設備，天氣預報嘛較好，逐家的生活變較好。有一年，阮老母咧講：「三叔仔最近掠有魚仔，in囡仔過年攏買新衫。」出海無一定掠有魚，有一擺，阮囡仔去港口，接in轉來，in落船了後，有一个人手提一尾魚仔予逐家看，轉來到厝，我才知影，in今仔日出海，干焦掠著彼尾魚仔。
阮細漢的時，年節仔，抑是大拜拜，厝內有代誌的時，全家愛轉去。先坐火車，佇貢寮落車，落車了後，大人緊去拆票，車來了後，愛趕緊上車，搶位，車頂有夠𤲍（kheh／khueh），坐車的人真濟，車本身舊，路無平，一路硞來硞去，誠艱苦。
厝內賰三叔彼家，抑有別房的親情，我攏毋捌。中央有廳，囥神明佮祖先的牌位，兩爿邊仔有房間幾若間，阮兜是上正爿這幾若間房，有一个客廳，佮神明廳的中間閣有一戶，是別的親情蹛的，逐家會使佇每一房的房間外面行來行去，有通道，是通的，就是阮會使經過別人的房間頭前，行到神明廳，閣行去彼爿的房間，神明廳彼爿的房間我毋捌去過。
有一擺佮叔伯小弟in去海邊，我看著一个老母，尻脊骿（kha-tsiah-phiann）偝（āinn/iāng）一个嬰仔，划一隻細隻船仔，雙手拋網仔去海水內底，應該咧網魚仔，我想，有掠著魚仔，才有通食，伊有翁無？按怎家己偝嬰仔來網魚仔？抑是翁出海，伊家己來網下暗欲食的菜？
有一擺，經過巷仔內，看著一個鐵籠仔圍起來的所在，有一个查某人，頭毛長長，坐佇塗跤，咧食一个酸菜頭，伊那嚙那用長長的指甲擘（peh—剝），看起來是「無正常」的人，予人關佇遮，這馬講是「身心障礙」，以早，厝內面只好按呢做，有予伊食飯就好。好佳哉，這馬有真濟資源通用。庄仔內定定看著可憐的人。
阮的三叔，啥物代誌攏會曉做，伊講：「代誌袂予我看著，我看著我就會曉做。」原本房間的隔間是舊舊、烏烏的柴枋，塗跤是土，沒平，懸懸低低，濟年了後，三叔家己成格（tshiânn-keh—裝潢），做甲較現代款。
（2025.10.20.）
查教育部台語辭典
