我細漢的時，捌綴我的外媽去九份仔的親情兜。以in叫外媽阿姑來看，應該算是外媽的外家，雖然佮外媽仝沿的攏無去矣，逐家嘛對外媽誠客氣，用心款待，逐頓攏煮甲誠腥臊。頭一暗，欲睏的時，有一个少年家提一包糕仔來阮房間，講看外媽暗頓食遐少，半暝仔若腹肚枵，才有物仔通食。
in兜的查某囡仔來佮我耍、講話，有一个講：「伊的正名是ＸＸ，倒名毋知是啥物？」有這種講法？伊可能共「正」佮「倒」（華語的「右」、「左」）囥做伙，才有這个問題，「正名」是去讀冊、報戶口的名，有人佇厝內叫另外一個名（華語：小名、暱稱），我嘛無問伊是啥物意思？我看客廳有唱機，問in：「有唱片無？唱片佇佗位？」in聽無，我講規晡，閣用手比，有一个雄雄講：「是曲盤啦！」曲盤我聽知影意思，緊講：「是啦！是啦！」in共曲盤提出來，放予我聽。
有一工中畫，有幾若个查埔囡仔講欲𤆬我去金瓜石，阿媽聽著，講：「透中晝，天氣遐熱，金瓜石無啥物好看，毋moo去。」in就無去，其實我想欲去，「金瓜石」這个所在是生做啥物款的？聽阿媽按呢講，我嘛無講話。
阿媽無教我叫人，遐的大人我愛叫啥物？我攏毋知，我是囡仔，嘛無人插我。有一工，我聽阿媽咧共人開講，我暫時叫伊阿妗（我佇頭殼底踅幾若輾，想半晡，in叫我的外媽阿姑，就是我老母的表兄弟，我應該叫阿舅，阿舅的某是阿妗），阿妗講：「昨昏才閣提錢去。」
「人若挖著一屑仔，in逐家分分一下，敢會交出來？」阿媽講。
「ＸＸ講in有咒誓。」ＸＸ應該是阿妗的翁，阿舅。
我聽著的是，雖然九份仔講無金仔，做這途的人大部份離開，毋過金仔嘛是猶有，只是較少，有人繼續咧挖。愛倩人做，挖有挖無？無一定，工錢愛照時間發。彼个阿妗心肝內可能咧想：「提出去的錢，趁會轉來袂？」
In毋是蹛佇老街的厝內，是較頂懸，較邊仔的所在，門口有一塊埕，有一个少年家佇厝外口起雞籠仔飼雞，伊平時佇別位上班，歇睏日轉來，飼雞的代誌是幾若个查埔囡仔做，伊轉來管理，應該是當做副業，加趁錢。
有一工，有一个阿兄，抑是阿叔阿舅（是飼雞彼个？），𤆬阮幾若个囡仔去瑞濱海水浴場耍水，坐公車去。耍甲誠歡喜。耍煞，沖水、換衫，轉來。暗頓食煞，阿妗叫一个查某囡仔去洗身軀，伊講伊洗過矣，隨去房間睏，看伊已經忝甲洗身軀嘛無氣力，緊去睏較重要。這可能是我細漢的時，干焦一擺去海水浴場耍水。
彼當陣仔，九份仔用的是水道水，毋過毋是規工攏有水來，定定無水，停水，In兜，抑是隔壁，有一个阿媽，若發現水來矣！就趕緊叫囡仔捾水，捾去灶跤的水缸內，才有水通用。囡仔咧耍，抑是咧做in的代誌，無插阿媽，叫袂振動，阿媽一直叫，囡仔就佮阿媽相罵，冤家。
我咧寫的時，想著一件代誌，彼當陣仔外公猶有佇咧無？去九份仔應該是我小學的時，外公是我國中的時過身，按怎是外媽家己去？可能是轉去外家，家己轉去。閣有，應該是歇熱，暑假的時間，我才會使蹛遐爾濟工，in兜的囡仔嘛攏咧厝內。
時間：60年前
（2025.10.16.）
查教育部台語辭典
