今仔日搭856去澳底，我的老爸的老家。
先開起去九份、金瓜石，佇山路頂彎來斡去。人實在是真𠢕，山頂四界起厝，司機嘛厲害，大台客運佇窄窄的山路相閃車，有的所在閃會過，我看有的所在應該無法度，若是２大台客運，抑是遊覽車拄著，毋知欲按怎？我共我家己講：「彼是開車的人的代誌，毋免我煩惱。」
水湳洞過去，就行海邊，海水誠媠，我誠久沒來，台２線車真濟，有的所在敢若咧修理路，車排隊等欲過。
有一站，有一个查某人起來，正爿２塊椅仔是空的，伊來坐倒邊我的邊仔，可能正爿有日頭曝入來。伊提一領長手䘼仔的薄衫咧穿，伊講伊去𬦰山，有流汗，會寒，愛加穿一領。我佮伊罔講話，伊講伊自板橋來，去𬦰啥物山，伊問我欲去佗位？我講澳底。講講一下，我問伊欲佇佗位落車？「福隆，欲去福隆食飯，閣坐車去XＸ。」
咧欲到澳底的時，我問伊：「我看有幾仔站，這幫車無停，我毋知影到佗位的時愛揤鈴。」
「咧欲到矣！愛揤鈴，你有揤無？」
「猶未。」伊幫我揤鈴，伊講：「這幫車干焦停大站，小站無停，791每一站攏有停。」
「就是干焦停頂懸出現的車站名？」
「是，其他的攏無停。」
我講：「我倒轉來的時欲坐791。」
我落車了後，斟酌看，坐轉去的車站拄好佇澳底國小頭前，按呢若欲用手機仔揣的時較好揣。我頭前的街仔路行行一下，越頭，後面行行一下，我頭一擺坐台２線的公車來，猶閣幾若十年無來，佮我想的完全無仝款，揣無我會記得的彼間廟。
斡入去一條街仔，看著「零售市場」佮圖書館，內底應該有便所。毋著，市場的鐵門關著，無開，邊仔有電梯，寫２樓是活動中心，３樓是圖書館，我揤３樓，入去看覓。閣一棟，佇市內邊邊仔起一棟市場佮活動中心、圖書館，市場沒生理，關門，誠無彩，瑞芳的市場嘛按呢，毋是佇市中心，生理無好，干焦賰幾若攤咧做生理，頂懸猶有其他的公共設施。
入去圖書館，我先揣便所。出來了後，踅踅看看，干焦有一个人咧看手機仔，櫃台坐一个工作人員。圖書館攢有好看的冊，佮電腦、網路、視聽片，毋過無人來用，誠傷心。我進前的工課就是佇圖書館啦！毋過是大間的，濟人用。
出來，行原路出去，先食飯才閣講。落車的邊仔有２間海產店，猶未行到遐的時，看著一間，賣較簡單幾若種飯的，我入去食。
食煞，查791，猶有半點鐘會到，無想欲問頭家娘彼間廟欲按怎行？往頭前閣行一擺，看著一間名產店，入去看覓，頭家娘一直叫我試食，龍蝦Ｘ餅，我食半塊，我講我袂使食甜的，伊講有鹹的，我講鹹的嘛有摻糖，伊講這个金棗無摻糖，一直叫我試食，「叫你試食，毋是叫你買。」我只好提一包，２粒的，我講：「金棗我厝內猶有。買一包，誠久嘛食袂完。」「是矣！一个人食誠慢。」本來想欲買一罐干貝醬，毋著，我這馬無食肉。
欲走進前，問頭家娘彼間廟欲按怎行？
「佗一間？什麼名？有幾若間廟。」
「自早就有的。」
「這幾若間廟攏自早就好，遐有一間，較遠的有一間。」
「佇市內的。」
「頭前有一間，你去看覓。」好，我去看覓。是，是我想的彼間，毋過邊仔的模樣我毋捌，阿叔兜佇佗位？欲按怎行？完全毋知影。
轉去查，下擺才閣來。趕緊去車牌仔位等車。
791來矣！下一站是澳底漁港，下擺應該佇漁港落車才著，附近行行，看揣有我會記得的路無？其實，路佮厝應該攏無仝款矣！
其實阿叔佮阮老爸自細漢蹛的彼間老厝已經賣矣！阿叔嘛無去矣！阿叔的大漢後生猶蹛佇澳底，２年前我有佮我的兄弟來培墓，我幾若十年無來，一來我無閒，二來，小弟開的車坐袂落去，我誠久無來。培墓煞，有去彼个小弟的厝內食飯。
791坐到八斗子火車頭站，落車，遮的風景遐爾仔媠，若毋是欲換車，我是袂撥工坐火車到八斗子車頭的。查時間，火車咧欲開矣！先去坐車，下擺才閣來。
下擺拍算佇八斗子火車頭換791，抑是先坐公車去瑞濱，換791，毋免去踅山路，踅甲頭殼眩眩。
（2025.10.17.）
查教育部台語辭典
