你係咪都試過，諗好晒成個宏大藍圖，但就卡喺「改名」呢個決定生死嘅步驟？一個好嘅名，可以幫你慳返好多廣告費；一個錯嘅名，可能會令你所有努力付諸流水。你信唔信？
我唔係咩命名大師，只係一個鍾意講故仔、做導演嘅香港創作人。由一個美麗嘅錯誤誕生嘅《奇蹟故事館》、植根於一句金句嘅《小麥子創富號漂流記》，到將尋找心靈救贖的生活態度變成品牌嘅《千禧散步 麥田日誌》... 我嘅每一個項目，個名都係一個故事嘅開始，一個世界觀嘅入口。
今日，我唔講理論，只講故仔。睇完呢篇文章，你唔會學到咩命名公式，但你會得到一套更有溫度、有畫面、有靈魂嘅命名「思路」，仲會有一份實戰檢查清單，同埋一個可以同我麥田健二直接交流嘅機會。
點解一個好名，真係咁重要？
喺資訊爆炸嘅年代，注意力係最寶貴嘅貨幣。一個好名，就係你爭取注意力嘅第一張皇牌。
- 第一印象： 佢係客戶第一個接觸到你嘅嘢，決定咗佢對你嘅第一觀感。
- 品牌故事嘅濃縮： 一個好名本身就識講故仔，將你嘅核心價值濃縮喺幾個字入面。
- 記憶點與傳播力： 容易記、容易讀，先會有人同人分享，形成口碑效應。
我嘅命名四大原則
呢度就係我嘅獨門心法，全部嚟自我嘅實戰經驗。
原則一：故事性 (Story-driven) — 每個名，都係一個世界觀嘅入口
一個好嘅品牌名，背後必須要有一個你想講嘅故仔。
- 我的案例：《奇蹟故事館》— 從一個「美麗的錯誤」開始
最初，我想服務長者，透過鏡頭及AI表揚佢哋嘅人生「耆績」，所以叫《耆績故事館》。但無論係語音輸入定係人哋口傳，都成日變咗「奇蹟」。我冇去糾正，反而去擁抱呢個「錯誤」。因為我發現，每個人嘅生命，不論年齡，本身就係一個獨一無二嘅「奇蹟」。呢個意外，令我嘅品牌格局由服務一個年齡層，擴大到擁抱所有人。 - 心法提煉： 靈活變通，順勢而為。有時市場俾你嘅反應，比你最初嘅固執更有價值。
原則二：畫面感 (Visual) — 用導演思維去命名
我係導演出身，所以我改名嘅時候，腦海入面一定會有畫面，甚至會諗埋個 Logo 設計。當人哋聽到你個名，腦海能唔能夠即刻浮現一個畫面？有畫面感嘅名，記憶會更深刻。
- 我的案例：《小麥子創富號漂流記》
聽到呢個名，你諗到咩？我睇到嘅係：一個好似「麥子」咁渺小但堅韌嘅主角，登上咗一艘叫做「創富號」嘅星際戰艦，喺浩瀚宇宙中「漂流」冒險。呢個名充滿動感、色彩同想像空間，未睇故仔，已經有戲。同時這故事正正延伸原本「耆績故事館」的使命，講述小麥子開著創富號飛越銀河星際，拯救不同「人」的遣憾與宿命！ - 我的案例：《千禧散步 麥田日誌》(Millennial Walk)
呢個品牌概念，源於近年流行嘅「Millennial Walk」——一種帶住覺察力去散步嘅生活態度。我將佢同我個人嘅成長記憶結合，腦海浮現嘅畫面係：一個千禧世代嘅年輕人，戴住耳機，喺手機裏播放住當年最愛嘅廣東歌，重返熟悉又陌生嘅中大校園漫步。每一步，都係一次同過去嘅自己重逢與和解。呢個名，本身就係一幅充滿懷舊人文氣息嘅畫。
而《麥田日誌》，就係呢場心靈散步嘅精神延伸同文字記錄。當我喺方格子用文字遊走世界、分享觀察時，就好似麥田健二呢個筆下嘅旅人，喺一片廣闊嘅麥田中，將沿途嘅風景同感悟，逐一寫入日誌。兩者結合，就係一場「身」與「心」嘅同步漫遊。 - 心法提煉： 閉上眼，想像你嘅品牌如果係一部電影，第一幕會係咩畫面？將呢個畫面嘅核心元素，變成你嘅名。
原則三：獨特性與關聯性 (Unique & Relevant) — 既要與眾不同，又要一脈相承
個名要夠特別，唔好同人撞，但同時又要同你做嘅嘢有關係。
- 我的案例：《創尚星匯》— 品牌宇宙的組合邏輯
有時改名唔一定只靠靈感，都可以好理性。當我需要為旗下四個互相協作嘅實體業務建立一個母品牌時，我運用咗「組合式命名法」。呢四個子品牌本身嘅名，已經蘊含咗佢哋嘅核心價值： - 《創映像》：核心在於「創造影像」，強調我哋唔只係記錄，而係為品牌「創造」有溫度嘅視覺故事。
- 《尚策營》：核心在於「崇尚策略」，代表我哋以頂層「策略」為先，再輔以創意同執行力嘅整合營銷理念。
- 《星領域》：核心在於「星光領域」，寓意每個人都係一顆獨特嘅「星」，我哋嘅使命係發掘內在光芒，為你打造專屬嘅發光「領域」。
- 《尚映匯》：核心在「崇尚輝映」與「精英匯聚」，專為處於轉折點嘅精英，提供深度諮詢，讓人生與事業互相「輝映」，同時亦係一個精英「匯」聚嘅地方。 為咗體現呢個互相協作嘅生態系統，我從每個品牌名中抽取一個核心字，組合成主品牌——《創尚星匯》。呢個名唔單止結構清晰，更直接話俾人知：呢度係一個匯聚咗「創造力」、「策略」、「明星潛能」同「精英」嘅地方。
- 心法提煉： 如果你有多個產品線，可以考慮用「組合式命名法」，創造一個有向心力嘅母品牌，強化品牌家族嘅整體感。
原則四：植根核心信念 (Rooted in Belief) — 讓名字擁有靈魂
一個名如果只係好聽，冇靈魂，就好易被忘記。
- 我的案例：《小麥子》— 源於一句影響一生的金句
《小麥子創富號漂流記》個名，源於一句深深影響我嘅聖經金句：「一粒麥子不落在地裏死了，仍舊是一粒，若是死了，就結出許多子粒來。」（約翰福音 12:24）
呢句金句代表住「犧牲與重生」、「渺小與豐盛」。所以，我將主角設定為一個好似麥子咁微小但充滿生命力嘅小女孩，佢透過冒險同付出，最終成就他人、救贖情感。呢個名，就係我整個故仔嘅世界觀同價值觀嘅濃縮，係佢嘅靈魂所在。 - 心法提煉： 回歸內心，搵出你生命中嘅「金句」或不變嘅座右銘。將佢變成你品牌嘅精神內核，個名自然有不可撼動嘅力量。
實戰練習：麥田健二的獨門命名檢查清單
好，理論講完，點樣落地？呢份 Checklist 係我每次改名都會用嘅，而家同你分享：
- 故事性： 我個名有冇故事可以講？（10秒內講唔講得明？）
- 畫面感： 聽到個名，腦海有冇畫面？（個畫面係黑白定彩色？）
- 聲音測試 (廣東話)： 用廣東話大聲讀出嚟，順唔順口？有冇唔好嘅諧音？（叫你朋友試下讀一次，睇下佢有咩反應。）
- 市場調查： 上網 search 一下，有冇好多人用緊類似嘅名？（Google、Facebook、IG、YouTube 都要查！）
- 數碼資產： 呢個名可唔可以註冊做網址 (domain name) 同社交媒體帳號？（最好全部平台統一。）
- 負面聯想： 呢個名會唔會有任何負面、老土或者令人誤會嘅聯想？
改名，從來都唔係一件容易嘅事，但佢絕對係一件值得你投入時間同心力嘅事。希望今日分享嘅四大原則同檢查清單，可以俾到你一啲靈感。
但係，我最想做嘅，唔只係分享。
- 如果你正為改名而煩惱，需要一個「戰友」同你一齊分擔...
歡迎你將你嘅諗法、你嘅煩惱，電郵到 [kkinseed@gmail.com]。當係朋友傾偈，我會盡我所能，同你一齊腦力激盪，為你嘅夢想搵一個好名。 - 如果你對《小麥子》嘅世界充滿好奇...
一個品牌名點樣可以成為吸引讀者嘅鉤？喺《小麥子創富號漂流記》嘅第三篇**《麥穗之女》入面，我就透過主角嘅經歷，完整咁揭示咗「小麥子」呢個名嘅深層意義。好多讀者睇完之後話，佢哋唔只係明白咗一個名嘅由來，更從中得到咗為自己事業命名嘅勇氣。 我誠意邀請你，[立即點擊呢度，跳轉去《麥穗之女》嘅世界]**，親身體驗一下，一個好故仔，點樣由一個好名開始。 - 想體驗更多我嘅故事宇宙？
「如果你對《奇蹟故事館》背後嘅故事感興趣，想睇吓入面收藏咗啲咩奇蹟，歡迎你嚟到我嘅小麥子小說平台 。」
「想體驗一場線上嘅《千禧散步》，回味一下香港嘅集體回憶？我嘅方格子專欄 《千禧散步 麥田日誌》 有更多散文等緊你。」
最後，留個懸念！
你可能會好奇，《小麥子》個故仔入面，點解個女的名叫「琪琪」？「木星星雲38區」個「38」又有咩特別含意？甚至，點解作者我是一個土生土長嘅香港人，會改一個四個字嘅日本名叫「麥田健二」？
呢啲，都係我「麥田健二」命名系統嘅一部分。
下回分解。 密切留意我下一篇分享！
