《大士爺厚火氣》第九集：紅線

看大道公遐爾仔無閒，挩窗哈囉感覺真歹勢，毋敢攪吵，佇廟角那啉青草茶那參詳：「敢講咱落空逝，大道公叫袂贏啊！」挩窗真煩惱。

「大道公做代誌綿爛，無到十全袂煞。伊的俗名叫吳本，為著欲救濟病、老、幼、弱，四界去揣草藥仔，無張持跋落山崁死去。上天帶念伊的德行，助伊得道升天，做醫藥之神……。」哈囉講。

規个保生大帝廟空lo-lo、恬tsih-tsih，干焦聽著挩窗共茶吞落嚨喉空的聲，廟的烏暗的上內底干焦一葩火，傳來大道公攑筆寫病歷的窸窸窣窣……。

「大道公毋但是醫藥之神，閣是阮虎仔兄弟的恩情人……。」哈囉𤆬挩窗來到壁堵的石雕頭前，那欣賞那開破：「彼時，大道公為著挽藥仔行入去內山斗底，暴憑一隻虎傱出來，生做白額金睛，面橫霸霸……原來，彼隻為非散做的食人虎踢著鐵枋，嚨喉空去予人的骨頭哽著，艱苦甲佇塗跤滾絞！大道公就佮虎品予好，以後袂當閣食人，才燒符仔水灌入喉，骨頭化去，阮的虎仔兄弟才共命救轉來。自彼工開始，升做大道公的坐騎，就是烏虎將軍。」

「這我知！阮阿無村的鐵牛伯仔講過，這叫『醫虎喉』，敢若閣有龍的款……。」挩窗一時想袂起來。

「點龍眼……。」哈囉𤆬挩窗行到龍爿，仝款有一塊石雕：「某乜人來揣大道公看病，講目睭無蓋爽快，大道公隨共拆破，講你毋是人！神龍隨現出原形！大道公就攑毛筆共點目睭，神龍的病就好矣！真正是看會清、看會明！」

「喔！鐵牛伯仔講伊目睭濛霧，會澀會驚光，醫生講伊白內障，仝款的症頭，像龍彼種神獸，活千千萬萬年，規工佇天頂飛，日頭赤焱焱目睭仁熟去，嘛著白內障矣。」挩窗按呢想。

「你閣真𠢕講，會當去做醫生啦！」哈囉共刮。