香城回憶錄003：水城區遊行

Mandy喝了一口茶，開始幽幽地說道：「就由響去水城區嘅捷運上，我發到嗰三個夢講起啦。」

第一個夢，是小學時第一次認識音然的過程。 「喂！我哋最近唔夠錢使，可唔可以借住啲錢使吓？」兩個比我高大，應該是雙胞胎的男生問道。 「我…我無錢呀。」我驚恐地答道。 「點會？你個髮夾咁靚，肯定有好多零用錢使啦。」其中一個男生一邊扯著我的髮夾，一邊說道，痛得我都哭了。因為太害怕了，所以沒有逃跑。 「喂！你兩個做乜嘢呀！」一把女聲從遠處傳來。 當她走了過來，見我淚流滿面，兩個男生還不肯放開我，就快速地向他們踢了兩下。 「痛！」「痛！」兩個男生一先一後喊道。 當我回過神來，兩個男生已經跪在地上，原來她踢中了他們的蛋蛋。 老師這時候才趕到，結果兩個男生被記了缺點，幫助我的女生更被記了大過。 第二天再遇到她，是小息的時候。 「你對手臂…」 「俾阿媽打囉。」 「對唔住呀音然，對唔住呀，係我累咗你。」昨天老師了解事情經過前，先問我們的名字，所以我知道她叫音然。 「唔緊要喎，我俾我阿媽由細打到大，都慣㗎啦。」音然瀟灑地揮揮手，答道。 「咁丫，你想食乜嘢？我去小賣部買俾你啦。」我問道。 「真係唔使喎。」 「唔好客氣啦。」 本來我以為她個子小小，食量應該不大，豈料，她竟然把我這個月的零用錢都吃光了。 自此之後，音然和我就做了好朋友，一個月最少會有兩次到對方家中玩，原來音然家中除了父母，還有一個比她大兩年的哥哥，名叫方希古，別名Hugo。 我和音然，就像一把尺上的兩個極端。我呢，喜歡看書，性格和身體都比較柔弱，父母都忙於工作，所以精通烹調和家務；音然呢，考試很多時候都是勉強合格，性格又火爆，但運動萬能，田徑隊游泳隊籃球隊都有她的身影，還有一副好嗓子，經常在合唱團負責獨唱部分。

第二個夢，是中學派位時的夢。 「好嘢！Mandy同我讀同一間中學！」音然歡呼道。 因為父母剛好到外地公幹，陪著我派位的是音然和她的哥哥Hugo，還有他們的母親。 「萌惠你正一傻女！明明個成績應該可以入到Hugo間名校。」音然和Hugo的母親無奈地說道，Hugo看似也有點失落。「一日最衰都係個死女包，成日都話要你同佢讀埋一間中學。」 音然因為運動和唱歌表現優異，所以在自行分配學位時，就知道被這間中學取錄了。 「唔緊要啦，Auntie，都係Band 1啫，我爹哋媽咪又唔介意。」我說道。 「係囉，Mandy都話唔介意咯。」音然對著她的母親吼道。 「小音你真係丫，Mandy佢唔想你俾阿媽責怪，幫你講嘢咋。」Hugo感覺到火藥味，圓場道。小音是Hugo對音然的稱呼，亦只有Hugo可以這樣做。 「唓！阿哥你夠成日幫Mandy咯，係咪鍾意咗人呀？」音然知道自己理虧，轉換話題道。 「邊…邊度係喎！」Hugo面一紅，說道。這時我才發覺，Hugo原來對我有意思。 「你兩個唔好嘈啦！有車啦，上車！」Auntie一邊大叫著，一邊揮手叫我們上巴士。

回到音然和Hugo的家，他們的母親忙於準備晚飯，Hugo練習泰拳去了，所以我和音然一起在她房間談心。 「Mandy，你上到中學，有邊個男仔蝦你呃你，要即刻同我講呀，我幫你出頭！」音然手握拳頭說道。 「你唔驚又記大過呀。」我笑道。「況且依間中學係Band 1，應該唔會有咁差嘅男仔嘅…」 「Mandy你太天真嘞。」音然一邊搖頭，一邊走到我的背後說道。 然後，她雙手一伸，竟然抓住了我的胸部。 「Mandy你發育得咁好，個樣又清純，吸引到好多男仔㗎。」音然一邊捏著，一邊說道。「好似我阿哥咁…」 我一聽到音然說起Hugo，耳根一紅。 「性格仲要咁溫柔，又易氹，我真係好擔心呀…」音然說著，手捏得越來越大力。 「音…音然，停手啦，我…我抖唔到氣啦。」我說著。 音然把雙手一縮，道歉說：「對唔住呀！Mandy，我唔記得咗你細個嗰陣有過哮喘症狀，醫生講過唔可以對胸部有太大刺激…」 接著伸一伸舌，手臂又從我的腋下伸進來，調皮地說道：「不過細細力應該無問題嘅…」 「唔…唔好咁啦，音然，唔好咁啦。」我一邊掙扎，一邊說道。音然雖然體重比我輕，但因為經常運動，力氣卻比我大。

結果，之後幾年，幾個本來對我有意思的男同學，都在音然「熱烈的」問候下，都打了退堂鼓。但音然怎樣也料不到，Hugo在被中心大學取錄後，一鼓作氣地向我表白，我亦答應了，他們的父母還特地買了一個蛋糕，慶祝他表白成功。而我亦在兩年之後，入讀了中心大學醫藥系，音然則去了松立基學院讀幼兒教育。

第三個夢，是在我父母車禍去世後的殮房，和之後的葬禮。 「爹哋！媽咪！唔好揼低Mandy呀！唔好！」我抱著被白布覆蓋著的父母，放聲哭喊著。 「Mandy，冷靜啲，你咁樣佢哋都會走得唔安落。」Hugo嘗試安慰著我。 然後，想緒一閃而過，到了父母葬禮的現場。 「Mandy，節哀順變。」是音然，她剛剛完成田徑賽就趕來參加我父母的葬禮，見到我哭腫了的眼睛，安慰道。 「點解會咁㗎！明明早一日見面仲好地地，竟然第二日就因為車禍走咗。佢哋兩公婆一向都好好人，個女又乖又生性，今年先啱啱入左中心大學讀書。」一位親戚語帶無奈地嘆道。 葬禮完成後，跟Hugo、音然和他們的父母道別的一刻。 「萌惠，之後你有乜嘢需要，記住同我哋講，你同音然識咗咁耐，又係希古個女朋友，我同老公已經當咗你係我哋個女咁㗎啦。你一向身體都比較弱，唔舒服要即刻打俾我哋呀。」安慰我的 ，是Hugo和音然的母親。「如果你覺得寂寞嘅話，隨時可以上嚟我哋到食飯，多個人多雙筷啫。」 「係呀，萌惠。我仲記得小學嗰陣，音然第一次帶你上嚟玩嗰陣，我同老婆都嚇咗一跳。本來諗住音然咁鬼百厭，個朋友肯定會一模一樣，我哋驚搞到間屋好似打風咁，所以就收起哂啲容易打爛嘅嘢。點知竟然係個又文靜又溫柔嘅女仔。」他們的父親憶起往事，說道。 「食完飯仲幫我手洗碗添，唔係好似個衰女咁，食完飯就拖住阿哥落街打波。」他們的母親插嘴道。 「好啦好啦！阿爸阿媽你哋唔好講埋啲咸豐年間嘅事啦。」音然聽到母親說起自己的糗事，連忙岔開話題。 「總之呢，萌惠你有乜嘢需要就打個電話搵我哋啦，唔使客氣㗎！」他們的父親總結道。我點頭。

「Mandy，醒啦，過多兩個站就到水城區啦。」一把剛中帶柔的聲音從我耳邊響起，喚醒我的，是Hugo。 從夢中驚醒，夢裡父母的葬禮，已經是上年的事了，這一年來幸好有Hugo、音然陪伴著我，有時還會帶Samuel、Saki和阿Ling來我家吃飯。他們三個其實與我和音然讀同一所中學，不過因為我是回家學會的忠實會員，所以除了同班同學，認識的朋友實在不算多，更遑論其他年級的學生了。 Samuel和Hugo在學泰拳時認識，他和他的龍鳳胎姐姐Saki是是應屆Joint Matriculation Examination的考生，Samuel和Saki因為父親早亡，母親忙於工作，養活他們，甚少吃到住家飯，所以我每逢知道他們會上來，我都會特別準備多幾道菜。阿Ling則是音然在合唱團認識的好友，今年讀中四。他們第一次各自帶Samuel和阿Ling來我家時，大家都嚇了一跳，原來Samuel和阿Ling正在交往，而Hugo和音然竟然都不知道。 「Mandy你發惡夢？眼眨淚光咁嘅？」細心的阿Ling問道。 「嗯，最後夢到爸爸媽媽過身同葬禮嘅情況。」我答道。 「咁有啲不妙喎，係凶兆！」音然故作神祕地說道。 「你個烏鴉口音然，唔好講埋啲衰嘢！」Samuel答道。「Hugo同Mandy第一次嚟參加遊行，唔好嚇佢哋！」 「係囉，明知你個好朋友都係第一次參加，仲幫大家準備咗飯盒，小音你淨係幫我買單程飛都有嘅？」Hugo笑道。 「咁我諗住Mandy有睇神燈啲post嘛…」音然不忿，嘟起嘴說道。 「等等…Mandy你幫我哋全部人準備哂飯盒？今次有食神啦！」阿Ling很喜歡吃我的飯菜，自然高興起來。 「嗯。」我點頭道。「我準備咗六個，點知Saki唔舒服…」 「唉呀，唔係佢唔舒服，我同阿Ling忙住照顧佢嘅話，就會記得幫Mandy買單程飛啦。」Samuel說道。 「唔緊要啦，我回程嗰陣買咪得囉。」我圓場道，捷運也到達水城區了。

「光復香城，時代革命！」 「六大訴求，缺一不可！」 一離開水城區的捷運站，到處都是穿著黑色衣服的人，叫喊的聲音此起彼落。 「記住拖住一齊行呀，阿哥，Mandy，唔係好易走散㗎。」經驗豐富的音然，對著第一次來參加遊行的我和Hugo說道。 「知道。」Hugo和我異口同聲地回答道。

我們在途中找個地方吃完飯盒後，就繼續隨著人潮，終於走到了俗稱鑊底的議會廳。由於實在太多人，本來半小時的路程，要走了四個多小時才完成。 當我們正準備找地方休息時，突然聽到音然在後面大叫了一聲。 「對唔住呀，對唔住。」一名戴著漁夫帽的男人向著音然說道。 原來音然被那個男人撞到，腳也扭傷了。 「唔緊要，我見你好快咁衝埋嚟，避都避唔切，你趕時間嘅話，就走先啦！」音然輕鬆地向男人說道。 「好，不過真係對唔住啦…」男人一邊走一邊說道。

「反正都就嚟6點咯，我哋就嚟到依度就算，返歸囉？」Hugo問道。 「我無問題。」「我都係，反正我都準備番去睇吓Saki情況點。」阿Ling和Samuel先後答道。 「音然你扭親，不如我哋搭的士番去？」我擔心音然的傷勢，提議道。 「唔好啦，我上個月開始俾阿媽經濟封鎖，都係靠阿哥同阿Ling接濟咋，而且我仲行得走得，都係搭捷運啦。」音然回答道。 接著，我們就一起去搭捷運打道回府了。

「快！快啲啦！Mandy，車就開喇！」阿Ling呼叫著。 「就快出到飛啦！等埋我！」我著急了。 第一次參加大型遊行，去程的時候我用七達通，但回程時就沒有用它。Hugo雖然都是第一次來，但因為妹妹音然是遊行的常客，所以她早早就替Hugo買單程票了。至於阿Ling同Samuel，雖然不算是遊行常客，但因為經常閱讀神燈的帖子，所以他們都很清楚各種規則，也預先買下單程票。結果，就只有我需要在回程時買單程票，因為太久沒有碰售票機，所以弄了一會才成功買票。

最後，我們成功趕上了那班捷運。當時我們都不知道，那班捷運通往的地方，不是溫暖的家，而是滿佈刀劍的地獄。

如果，如果，音然腳踝沒有扭傷… 如果，如果，當初我堅持大家搭計程車回家… 如果，如果，我們沒有趕上那班捷運… 大概，大概，之後發生的一連串慘劇就不會發生了。 不對，不對，墮進地獄是早已註定的事，只是時間和形式的問題而已。