2021-02-07|閱讀時間 ‧ 約 2 分鐘

【奧運經典】申雅嵐與決賽最遙遠的距離　計時員失誤成永恆的痛

縱然東京奧運能否順利舉辦至今仍是謎，但都不妨重溫當年精彩嘅奧運經典賽事。一秒鐘，究竟有幾耐？講唔出實則幾耐，但正常都會覺得一秒眨下眼就過，簡單講，即係好短。

2012年倫敦奧運女子重劍個人賽4強，彷彿重新定義「一秒」究竟有幾耐。韓國劍手申雅嵐挑戰衛冕冠軍德國好手海迪曼（Britta Heidemann），二人力戰3節未分勝負，打成5：5平手，需要進入即時死亡的「決一劍」分勝負，申雅嵐取得優先權（Priority），只要捱得過最後1分鐘，就可以殺入決賽。

Priority在手，申雅嵐唔急，時間一分一秒過去，海迪曼愈來愈急，話晒都係冠軍級人馬，雖然急依然保持不慌不忙，最後24秒狂攻，申雅嵐招架得住，20秒內5劍雙燈。

賽事進入最後一秒鐘，就是全場高潮，申雅嵐距離決賽只差一秒。海迪曼未有放棄，餘下一秒依然狂攻，竟然3劍雙燈之後，大鐘依然維持1秒。裁判同樣覺得奇怪，所以問計時員係咪有故障，測試過後發現無問題，但大鐘就要重設至1秒，變相申雅嵐白捱3劍，佢都開始顯得唔耐煩，而韓國隊教練當然不滿立即投訴，可惜不果，海迪曼彷彿重獲新生，以一劍擊打進攻取得單燈。

申雅嵐隨即哭成淚人，而韓國團隊再作投訴，擾攘一段時間後，裁判維持原判，申雅嵐無緣決賽，佢隨即崩潰再度落淚，劍道上坐底，賴死唔走，70分鐘依然留底，多番勸籲下才離開。申雅嵐最終銅牌戰不敵中國劍手孫玉潔，屈居殿軍。

一面奧運獎牌從申雅嵐手上溜走，成為奧運劍擊史上最大爭議，申雅嵐賽後直言裁判做法唔公平，「一秒一早完咗，我應該贏咗，賽後1小時我都難以接受呢個事實，唔敢相信呢件事會發生。」

申雅嵐案例特別，國際劍聯有見及此，希望以特別獎牌彌補申雅嵐失獎之痛，但佢斷言拒絕，皆因呢一面唔係奧運獎牌，而錯亦都不在佢身上。