《打鼻鼾嘅人》

《打鼻鼾嘅人》

世界上有兩種人，瞓覺打鼻鼾嘅人同瞓覺唔打鼻鼾嘅人。

呢個係經歷咗唔知幾多百萬年生物進化論所得出嘅結果。唔打鼻鼾嘅人就係唔打鼻鼾，就算你打到佢個鼻變成蜂巢佢都係唔會打鼻鼾。

我喺一個唔打鼻鼾嘅人。企喺一個唔打鼻鼾人物種，即係homo Ng-snorpiens嘅角度，我梗係覺得打鼻鼾嘅人係低等生物。不過問題係我老豆老母。我老母唔打鼻鼾 ，no problem。Problem係我老豆，佢係 homo snorpines。

你可能會問唔同物種都可以交配嘅咩，唔同物種梗係可以交配，你冇睇過條片係隻海獅強姦隻企鵝咩？問題係生唔生到下一代。

好無奈係得嘅，homo Ng-snorpiens同 homo snorpiens係同種唔同屬，簡單啲嚟講即係我哋嘅生物結構好近，係可以交配生到下一代，不過通常呢啲雜種後代係冇生育能力嘅...

PK

唔係話我好想生仔，但係冇得生咪好蝕底?

凌晨四點39分 隔住房門我都聽到老豆嘅鼻鼾聲，我喺度諗緊人生大事佢就喺度打鼻鼾。

突然之間我諗到個理論。打鼻鼾除咗聆聽到打鼻鼾嘅人好想打交打鼻鼾嘅人係有佢嘅作用㗎。打鼻鼾嘅人利用打鼻鼾發出嘅特定頻率可以引起homo Ng-snorpiens嘅大腦製造荷爾蒙，吸引homo Ng-snorpiens之後同佢哋交配生出生唔到下一代嘅雜種...

佢地想令homo Ng-snorpines絕種！

好野，一個低等生物竟然有咁高明嘅手段，利用打鼻鼾好黑人憎呢一點cover佢嘅實際作用，拉高等生物落水攬炒。我都好奇我老豆係點溝到我阿媽㗎啦

呢個時候我耳邊有陣好熟悉又好討厭嘅聲音響起...

鼻鼾聲!

唔係，我老豆嘅鼻鼾聲仲係出面。咁會係啲咩呢？我唔敢擰轉頭，一諗起呢把聲同鼻鼾聲好似，我就諗起homo snorpines嘅絕地反攻攬炒計劃，而我就係其中一個受害者。

喺我畀恐懼吞噬時候，我feel到我個鼻上面有啲野。

係一隻蜜蜂。

Dllm，我懷疑呢間屋係畀人落咗降頭我住26樓嘅大佬但係成日啲蚊呀飛蛾呀烏蠅呀飛蟻呀曱甴呀識飛嘅野都會飛入嚟樓下有咁多家人你唔飛淨係飛呢一間上一手係咪有個整蠱嘅薩滿住—

””””””””””””””””””””””””””

又嚟啦。我真係好憎昆蟲飛嘅時候拍翼嘅聲，可能係我血液裡面反homo snorpines嘅基因令我抗拒呢種聲音...

唔係，呢次真係鼻鼾聲，仲要喺我個鼻哥窿裏面傳出嚟。

隻蜜蜂呢？

唔通...呢個世界根本就冇咩homo Ng-snorpiens同homo snorpines，我嘅推理由一開始就啱！係蜜蜂，一切嘅原兇都係蜜蜂......

---------------------------------------------------------------------------------------------------------------------

Free writing筆留手《打鼻鼾的人》

04/01/2022