我的阿母

一年一改的生日閣欲到矣！每一冬到這咧時陣，嘛是我上懷念的日子。

我的阿母佇我三十歲彼年的熱天，因為醫生的疏失，煞來過身去。伊用行的入去病院，用䖙的轉來；活活一个人入去，轉來厝裡已經無氣。我毋敢佇伊的身軀邊吼，驚共伊吵著，驚伊傷心，綴我流目屎，所以我走甲遠遠，佇阮兜上後壁遐，我跍蹛遐輾目屎。

伊離開後的幾若年，逐擺我轉來到厝，佇厝內每一个所在，攏有伊的形影，毋但是灶跤抑是樓梯頭，佇客廳抑是房間內，我攏親像看會著伊。就是按呢，予我無法度閣留踮舊厝裡，因為我的目屎會流袂離。

送伊出山的第二工，我綴著兄嫂來到集集火葬場。佇遐做工課的人，共阮講阮阿母就是佇遐。聽候我行過去，我干焦看著白色的骨頭佮骨頭烌……「啊！我的阿母啊……您是按怎會變成按呢？」

「母啊！您到底是佇佗位咧？」

佇我生日這工，請恁莫祝我生日快樂！因為這工是阮阿母生我上艱苦的日子，佇這工，就予我恬恬仔懷念伊，感謝伊就好。(2022.06.20)