紅魔鬼賽後評 英超 曼聯 1-2 富咸 (24-2-2024)
紅魔鬼賽後評
英超 曼聯 1-2 富咸 (24-2-2024)
1. 其實想寫呢樣賽後評好耐架喇，不過最尾都係寫咗其他嘢，又或者係忙咗其他嘢先，結果而家有少少多出黎既時間的起心肝寫既第一場波就係講曼聯輸波，屌。
2. 講明先，呢場波我係帶緊小朋友去學嘢既時候用電話睇，所以有啲細節位可能睇得冇咁清楚，再加上我冇識波牌又唔專業，都唔諗住引用啲乜嘢數據，純粹係印象流，所以當聽下個癲佬吹下水既心態黎睇呢篇文會好啲。
3. 挾住英超加足總盃五連勝兼2024年不敗既聲勢，曼聯主場出擊對住富咸可以睇高一線………本來係咁既，但響比賽既前一日之前賀龍既受傷，加埋上場梳爾受傷離場要抖成十二個星期，老實講嘞，真係唔係馬後炮，我響見到賀龍要抖兩、三個星期果陣已經覺得都幾大暗湧架嘞。
4. 點解咁講呢？首先今季有Shaw響左閘既時候，無論攻守曼聯都起碼上升咗一個層次，替工連迪路夫係做唔到佢既工作，但左閘冇人可以用既情況之下，坦克都冇辦法要焗用。而更大鑊既係賀龍受傷，唔止係佢腳風大順，近6場英超入咗7球，有啲嘢其實唔駛睇數據，今季就算係上半季佢英超未開齋既時候，其實真係有睇波既球迷應該都睇得出佢有幾大作用。佢可以接應長傳、做足柱躉中鋒既工作、set波二傳，再加上佢速度唔錯，仲肯不惜氣力咁去逼搶，佢既作用係遠比入波助攻呢啲數據重要。
5. 根據轉會大神Fabrizio Romano表示，曼聯本身係可以響一月之後續租列古朗既。我真係唔知邊個天才響馬拉西亞捉完手術康復緊、雲比沙卡十二月開始受傷、Shaw果個恐怖既傷患紀錄下仲選擇放走佢…佢本身都已經響度架喇喎，應該唔受FFP影響吓嘛？
6. OK OK，開波之前見到出個新仔科臣，佢響對狼隊同Newport既時候都踢過前鋒，我以為今場坦克都叫做擺佢正前，咁樣既話，之前運作都算良好既左華右祖(加拿祖)都仲keep得到響度，點知一出場完全唔係果回事，而係將福仔擺正箭頭、加拿祖打左翼、科臣打右翼…唉屌，呢個雖然係有啲馬後炮，但見到科臣今場咁既表現…我寧願你擺麥湯做正中鋒…又或者右面出安東尼、戴亞路是旦一個。
7. 但姑勿論點都好，曼聯係應該要贏既，唔可以瀨晒傷兵，最後輸一比二，比起個結果，我覺得成隊既表現仲更加肉酸。
8. 前面福仔打正中鋒隱形(which I expected，但唔知點解雲高爾手下出道既時候佢明明打得幾好，可能而家角色唔同啩，冇識波牌唔知啊)，右面科臣好似又冇威脅，左面既加拿祖已經算係咁，但始終冇響右面既時候咁有威脅。呢樣嘢唔係季第一次發生，坦克可能係賭緊科臣會唔會大爆發？我唔知。
9. 上半場兩隊都各有攻勢，但係富咸既明顯係有威脅好多，後防死球既時候多次走甩對手比人任頂，連迪路夫又五五波之後比Muniz搶晒身位再起腳中柱，全靠奧拿拿今場表現得好神勇，先至令曼聯可以保住零比零返更衣室。相反曼聯最入威脅只係黎自達洛治既遠射中柱最有威脅。其實我覺得曼聯最有威脅既果一球，反而係卡斯米路完半場之前果球長傳，本身比福仔就單刀直入架嘞，點知般奴突然殺咗出黎同福仔相撞果球。
10. 雪上加霜既係，換邊之後冇幾耐卡斯米路同對手相撞然後疑似因為腦震盪而需要換出，比賽一度暫停咗好耐，之後坦克用艾歷臣同麥湯文尼入替佢同埋科臣。唔敢講係咪呢個調動出事，但呢個調動之後，去到六十幾分鐘，曼聯總共比人射咗八次咁多，而佢哋係一次射門都冇。傷愈之後冇乜點出過場既艾歷臣明顯久梳戰陣，多次五五波身體對抗下比人搶走個波，而佢既傳送都冇上季咁犀利。
11. 守久必失，又係死球出事，今次好明顯係華拉尼走甩人，比奇雲巴斯連射兩次射破奧拿拿既大門，曼聯首先落後一比零。
12. 之後富咸全軍退守，但係曼聯受制於對方既密集防守，攻勢上都唔係佔得好多甜頭，不過今場表現得非常出色既麥佳亞響帶點幸運既情況之下，將被利奴救出既般奴既遠射執雞補射入網。
13. 追平之後既曼聯氣勢如虹，創造咗唔少機會，但無論係麥湯文尼響一次前場反擊後殺入禁區射出界又好，定係般奴一次人多打人少既情況之下無端端遠射都好，呢啲決定全部都係操之過急，全部個腦都唔夠冷靜上晒頭咁。
14. 結果？你把握唔到就到人哋一次反擊把握到，由查奧爾硬爆落右路再傳比伊禾比，後者響禁區入面對住Dalot同Amad竟然都仲可以輕鬆起腳射個割草式地波，仲要係射左下角貼柱射入。呢下除咗Dalot同埋Amad有責任之外，艾歷臣同埋麥佳亞都有責任，尤其係前者，因為兩個其實係失球比人打反擊既時候都有機會犯規去阻止查奧爾，麥佳亞都仲話因為身上已經有一張黃牌而唔敢落腳，但前者真係應該硬食黃牌都要戰術犯規。
15. 有人屌鳩奧拿拿唔郁，但老實講呢球我覺得唔關佢事，個波又近又有角度射得又夠晒力，望住個波入網都冇計架喎。唔係幫奧拿拿講嘢，佢今季尤其是頭半季，真係好多閪波要負責，甚至係歐聯出局既最大罪人，但一單還一單，今場佢踢得好好，失既呢球都唔關佢事。當然有人唔認同都冇問題，我講過我冇識波牌響度鳩UP咋嘛。
16. 最慘係最尾冰人同埋般奴都好似拉傷咗咁…冰人更加係直接被換出…而般奴…佢今場係差架喇，佢啲決定好急躁，而且好似好亂咁，無論係傳、射都好，都冇乜分寸，但響傷士兵滿營既情況下，佢如果真係受傷，咁對於而家既曼聯黎講，真係好大既打擊…
17. 不過都慣架喇，啲傷兵問題都困擾咗曼聯成大半季，每次一有主力出得返，轉過頭又會傷幾件主力…如果尚算齊腳既時候，即係踢出五連勝果段時間，由後場build up三寶Shaw、馬天尼斯加埋卡斯路真係好唔錯，再連結埋中前場既年輕三寶Mainoo、賀龍、加拿祖…
18. 其實今季都半放棄架喇，甚至乎前四都奢求唔黎，唯有希望之後自己踢好啲喇，尤其是係如果啲傷兵好得返出得切，可以比我睇返啱啱果幾場勉強叫做齊腳既時候既表現喇…
19. 至於而家？冇乜期望喇…下星期唔好比曼城大炒已經要還神，唔好話諗乜嘢作客攞到分…其實傷兵一多就好考領隊功力，尤其是傷埋啲主力球員添，所以我係唔會盲叫坦克走人乜乜乜，我係希望佢帶住隊波有進步既，但呢一刻既坦克，又真係未比我睇得到有克服傷潮既功力…
#不專業足球筆記 #我愛紅魔鬼 #英超
#紅魔鬼賽後評 #MUNFUL #曼聯 #富咸
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
你可能也想看
