紅魔鬼賽後評 足總盃 高雲地利 5(3)-(3)7 曼聯 (21-4-2024)

紅魔鬼賽後評

足總盃 高雲地利 5(3)-(3)7 曼聯 (21-4-2024)

1. 我個仔同我一齊睇波，完場既時候佢好開心咁笑咗出黎（始終太細個贏波就開心，佢唔知對面其實有幾屎），但我真係一啲都高興唔起黎。係，我哋係有好多傷兵，連中堅新仔甘比華拉都傷埋，要麥佳亞拍住卡斯米路，曼治、安拉拔又無端加入十字軍，但係，喂，對面係英冠第8咋，仲要一度領先三球啊，71分鐘領先緊三球啊，你哋班大帝踢得曼聯既，都唔應該對住隊咁既波輸返三粒喇吓嘛？

2. 睇波既時候，個旁述係咁話足總盃既魅力係爆冷既溫床，呢場波踢成3比3當然係爆冷，但與其話高雲地利踢得好，不如話呢個冷係曼聯自己爆出黎既。有果句講果句，對賓福特、般尼茅夫既時候，我會覺得呢兩隊踢得好，值得擊敗曼聯，而唔係打和各得一分，但如果有睇今場波既，其實高雲地利既表現響法定時間之內係咪真係值得入三球，我諗真係見仁見智。

3. 頭70分鐘，高雲地利根本連一腳中龍既射門都冇，甚至乎係連波皮都掂唔到，偶而解圍上前半場，都係一逼就甩，下半場好返少少，但基本上都冇乜威脅，連混亂都做唔到，其實得罪講句，真係英冠質素黎。見啲人話高雲地利踢得好應該晉級，我又真係唔覺佢哋踢得幾好，我會調返轉講曼聯自己踢到咁撚樣，係唔值得晉級。

4. 自己入果三球唔講喇，真係質素上面已經有分別，睇到71分鐘，見到高雲地利咁既表現，都應該坐定粒六，諗定入到決賽點踢。

5. 不過，曼聯就係曼聯。今季既曼聯，對花生友黎講驚喜萬分，對曼迷黎講，係驚嚇萬分。尤其是坦克換入艾歷臣同埋安東尼，換走文奴同埋加拿祖，更加係埋下連失三球既伏線。

6. 坦克換入艾歷臣應該係想增加中場控場既能力，但係艾歷臣自從傷愈回歸之後，表現真係好反覆，進攻還好，偶有佳作，但防守上面，佢既身體對抗性唔夠fit好似顯露晒出黎，今場響禁區入面起碼有兩次比對手輕鬆起到腳，其中加時果球中楣爭啲累到球隊輸埋波。

7. 至於換入安東尼唔係問題，但點解係換加拿祖？唔係肢體語言話你知佢想快啲返更衣室沖涼既華舒福？

8. 當然，坦克啲調動有問題，但我覺得啲場上面既球員先係最大問題。喂，你著住曼聯件波衫架，對手係今場表現都發揮得唔係好出色既高雲地利咋，點解會突然之間崩盤？係咪想證明比大家睇，曼聯只係得英冠level？

9. 失果三球，全部都係自爆。第一球，個個都係眼神防守，其實呢球波，客串中堅既卡斯米路責任最大，一路退後既時候，一路退錯位，形成對手無人看管（附近真係一個人都冇！）下近門任射，屌你唔好真係當英冠係垃圾先得架？無人看管下咁近射埋去，我阿嫲都射得入喇。

10. 第二球，安東尼攻門鳩射比人擋出，人哋打個反擊黎個遠射，雲比沙卡折射對手射門笠死奧拿拿。呢球有啲冇運，但奧拿拿都有責任。奧拿拿最近既表現真係有所回升幾穩定，even今場總體黎講都算唔錯，十二碼階段做埋英雄添。但係！呢球波同之前果啲折射唔同，雲比沙卡改變既方向，就係奧拿拿移緊既方向，而且球速都唔算快，佢似係以為個波會彈出界，所以就企定定響度望。如果佢真係反應唔切既，我只能夠講，我阿嫲反應都快過佢。

11. 雲比沙卡既惡夢仲未完。事實上即使高雲地利狗屎撞棍追返兩球，其實都唔算組織到乜嘢有效攻門，但就響呢個時候，雲比沙卡決定自製高潮，面對對手傳中，佢選擇用大字型攤開雙手既姿勢去迎波，結果個波打落佢手上，唔駛問，一定十二碼。

12. 當然，都唔可以抹殺高雲地利本身既努力，佢哋可以入到三球，除咗曼聯自己送禮之外，都要佢哋唔放棄先得。

13. 可能係補時追返三比三既關係，加時既高雲地利好似啪咗雞血咁，加上曼聯正選班友體能嚴重下降，後備出黎果啲又冇撚用，曼聯佢哋亂鳩咁谷上去，反而令到高雲地利有唔少反擊機會。

14. 如果係要話高雲地利踢得好既，或者都只係加時下半場某段時間而已。

15. 曼聯成班大帝都冇晒力咁，諗住換入艾歷臣去控場，但加時黎講，個中場完全係失勢，其實捱到十二碼已經好好彩。尤其是最尾爭啲比高雲地利絕殺，只係好彩雲比沙卡企得前咗一個手掌位咋。其實雲比沙卡傷愈之後一樣係去到七十分鐘已經冇氣，散唔切出黎包越位已經唔係第一次，今次算佢好彩，因為唔夠氣跑慢咗少少，如果真係連續三球都係輸佢。

16. 十二碼冇嘢好講喇，都係運氣成份高少少。至於點評價曼聯既表現？我會用災難級黎形容。有睇場波既，鬥心同埋態度唔計，只講場上既表現我諗應該唔會話對面踢得好啩？但係坦克既換人好似起晒反效果咁（其實後備席冇人啱使而場上run得幾好既時候真係冇人搵枝槍逼你換人架），更甚既係曼聯落場果班大帝交咗啲乜嘢貨出黎？19分鐘時間，領先3球，送返3球比人！我老喇，心臟負荷唔到啊，唔好再嚇鳩我喇，好唔好？

17. 最慘既係，呢場之後，華舒福同埋麥湯文尼又再次加入十字軍行列…少數表現抬得起頭既麥佳亞都話自己係帶傷上陣…咁搞落去，下場對錫菲聯零中堅出賽不是夢。

18. 屌，唔撚講喇！

#不專業足球筆記 #足球專欄 #專欄 #我愛紅魔鬼 #英超 #足總盃

#紅魔鬼賽後評 #COVMUN #曼聯 #高雲地利 #足球 #賽後評

#英超賽後評

更多專欄內容︰ https://www.leafopenleafopen.com/unprofessional9up

更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938