紅魔鬼賽後評 英超 曼聯 2-2 利物浦 (7-4-2024)

紅魔鬼賽後評

英超 曼聯 2-2 利物浦 (7-4-2024)

1. 先講感受︰上半場既表現，執到一分都已經要還神、耶穌顯靈；但下半場既表現，輸返球咁既十二碼令到三分變得一分又有啲唔抵。

2. 上篇我講過，今場得一個一隊中堅，麥隊要拍住既係青年軍升上黎既甘比華拉，跟住中場又傷多個後備奇兵麥湯文尼，落後時候連變陣既本錢都冇，自己最近兩場又補時失埋啲智障波，士氣大受影響，利物浦最近氣勢如虹，此消彼長之下，冇得用返足總盃八強把尺去預計呢場波，我真係本住輸少當贏既心態去睇呢場波。

3. 上半場既表現印證咗我既想法，除咗頭十分鐘係控得住個波之外，之後接近連個波都搶唔到，不幸之中既大幸係除咗輸果球角球之外，曼聯既防線仲頂得住，加上奧拿拿持續到近期唔錯既表現，利物浦自己有幾次黃金機會又自己把握唔到，踢到咁真係落後一球已經好唔錯。

4. 輸果球又係今季既寫照，已經唔知輸幾多次死球係跟漏人，比人無人看管下射/頂入。今次罪人係文奴，佢跟跟下迪亞斯突然間唔跟，令到後者都幾輕鬆近門撞入。我唔知練波果陣係點，但已經成季喇差唔多，可唔可以有少少進步黎睇下啊？

5. 上半場有幾差？係一腳射門都冇，一腳都冇！最有威脅已經係卡斯米路接應死球頭鎚回後門前掠過，如果有任何人掂到應該都足夠改變方向彈入。

6. 下半場一出黎既時候頭幾分鐘，睇落暫時未有咩起色，但估唔到既係對手一次犯錯幫我哋手打咗支雞血，昆沙一次橫傳失誤，般奴把握機會中場起腳射個世界波為曼聯莫名其妙地扳平一比一。

7. 呢支雞血都真係打得及時，如果冇呢球叫醒返曼聯班球員，下半場仲係踢到頭45分鐘咁，唔比人四、五、六已經偷笑，但因為呢球，令曼聯個氣勢完全扭傳，雖然講唔上係咩控制戰局，但係就創造咗唔少射門。

8. 之後卡斯米路一次倒掛傳送，由文奴策動攻勢，交比左面加拿祖再傳比雲比沙卡再回傳返比文奴，射個超級世界波入網，呢球波真係由第一下傳送開始都好流暢，組織得美妙，文奴將功補過射得好靚，算係近期曼聯少見賞心悅目既一幕。

9. 其實下半場既表現曼聯真係唔錯，防守做到嘢，比唔到太多空位對手射波，又或者靠自己後防鐵血防守頂住對面既射門，再加上間中黎個反擊，呢段時間既曼聯同上半場可以話係判若兩隊。

10. 上場屌過坦克啲調動，今場其實算係咁，76分鐘換入安拉拔加強防守我覺得OK，但對象係咪加拿祖我就有少少保留，畢竟加拿祖係我哋隊波入面最有威脅果個，而且防守都好賣力，問我既話，我可能寧願換賀龍，佢今場做前線支點黎講其實都算合格，但多次同雲迪積克既對碰就差唔多全部輸晒，相比之下，加拿祖響反擊既時候都更加有威脅。

11. 不過如果唔係雲比沙卡魯莽落腳輸十二碼，話唔定坦克呢個死守既如意算盤可以打得響。可惜既係，剷球命中率通常都有九成既雲比沙卡，響禁區入面充滿住隊友協防既情況下，個勢好肉酸咁剷落去，儘管其實接觸得唔大，但艾利洛梗係話之你即刻跌，就係咁輸咗球十二碼比沙拿射入。

12. 呢球十二碼其實冇上場對車路士果兩球咁大complaint既，畢竟呢下雲比沙卡個勢真係肉酸，大脾係有同艾利洛有接觸…而被追成二比二既曼聯，場上面陷入咗好被動既局勢，進攻上面冇咗加拿祖，儘管後面有幾次突擊機會，但都處理得唔夠好，安東尼臨完場之前有機會絕殺，但又射得太正比龍門接實。

13. 防守方面冇乜大問題，卡斯米路速度上係唔太夠快，但佢啲防守落腳捕位依然係好重要。不過防線最尾時刻走漏迪亞斯爭啲又鑄成大錯，好彩佢自己射咗個藍天射球。

14. 我同一齊睇波既朋友講，如果一早話我知場波係和局，我可能唔止收貨，而且應該係喜出望外，但見到下半場既表現，咁樣輸球魯莽既十二碼，真係好唔抵。

15. 不過講到尾，兩隊踢咗半場好波，和波各得一分，都算合理既。

16. 最後講講臨危受命既第六中堅甘比華拉，今場雖然都有少少失誤，但全場既表現都幾惹人好感，當然對手把握得唔算太好，不過佢既表現都毫不怯場，一啲都唔似一個因為今季傷兵潮下而臨危受命先出得幾場既新仔，幾次身體對抗都不落下風，仲搶埋對手既腳下球。

17. 其實曼聯今季都打起咗幾個青年軍上黎既後生仔，加拿祖唔駛講，文奴抖咗半季一復出就即刻搶咗個正選，而且表現非常搶眼，而今場又打起咗個甘比華拉。唔好講佢哋既實力係點住，後生仔，仲有大把進步空間，但講鬥心，佢哋分分鐘係成隊最有鬥心果幾個。

18. 老實講，真係既喜且悲，本身應該挺身而出既係一班收高薪既一線球員，但到最後竟然係要靠一班後生仔臨危受命去帶起隊波，隊中某啲落到場都睇得出冇乜鬥心既球員有冇覺得慚愧…

#不專業足球筆記 #足球專欄 #專欄 #我愛紅魔鬼 #英超

#紅魔鬼賽後評 #MUNLIV #曼聯 #利物浦 #足球 #賽後評

#英超賽後評

更多專欄內容︰ https://www.leafopenleafopen.com/unprofessional9up

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938