01-06.08.2024|Salzburg_Vienna| 音樂之都與我的距離

歐遊第二擊！這一趟旅程在出發去工作假期前已經開始計劃，當時已知道女朋友與她的家人會在暑假期間到歐洲旅遊，所以我都打算加入他們的旅程，但是在出發前我還未預訂任何的行程，一嚟未到達英國，二嚟唔清楚到時我工作的情況。直至在英搵到工作，所有事情都安定下來，就開始計劃行程了。最後就決定加入他們在奧地利及克羅地亞為期10天的行程。

這趟旅行的感受與平時在英國本地旅行，甚至與之前在德國獨遊不一樣，獨自旅遊讓我大開眼界，探索世界。而這趟旅程最大的感受係終於見到我女朋友與他的家人了！已經接近三個半月冇見佢哋啦！（不經不覺青春廿八都過左田四個月）雖然科技一日千里，距離和時差都不是問題，但係真人見面與隔住電話的感覺是不能相比的。

出發前，我覺得奧地利係一個比較沈悶，與德國無論語言，文化相似的國家。但當知道舉世知名的國王湖鄰近薩爾斯堡後，就對奧地利的行程期待起來。

「在歐洲遇到了很多人。我甚至遇到了我自己」

薩爾斯堡(Salzburg)

1. 國王湖(Königssee)

這趟旅程的重點行程之一。在出發前已經十分期待，看過網上的照片就覺得國王湖像個人間仙境。親身到訪後就感受到國王湖的神奇和震撼，心想為何這世界有呢啲咁靚嘅地方。

當日我哋晨早出發，目標是去晒上湖及下湖(國王湖分為上下湖兩個湖區)。在坐船前住上湖期間，突然落起大雨，當時都有啲擔心天公不缺美。坐船期間，船長會在不同的地方講解湖上的景色。在船接近駛至下湖碼頭時，他更拎起號角吹奏樂曲，展示湖上的回音。

經過半小時多的船程後，就到達左國王湖的上湖。天色慢慢好轉，去到上湖的牛奶小屋時，更開始放晴，陽光將四周的環境折射到湖上，風景簡直如畫一樣。

國王湖的路徑大致上都有好好的規劃，只是中間有一段路比較崎嶇，需要行一些碎石的山路。由於當日落過雨，地下比較濕滑及佈滿泥濘。我平時行開山都覺得不是太容易行，但是我們一行五人最後都完成到，要俾一個讚我們^^

國王湖的風景真係令我感到讚嘆! 如果沒有親身到訪，都難以相信世界上有如此優美的地方。如果你們計劃去德國或者奧地利旅行，誠意推介安排一日去國王湖參觀。

2. 米拉貝爾公園(Schloss Mirabell)

米拉貝爾公園係著名電影仙樂飄飄處處聞的拍攝地方。雖然呢套電影不是我年代的作品，但係耳熟能詳的Do-Re-Mi就是出自這一套電影。到達米拉貝爾公園的閘門時，腦海就浮現出這一套到電影的畫面。呢一種感覺都頗神奇的，有種終於來到奧地利的感覺

公園不是很大，但種滿不同顏色，不同種類的鮮花以及有一些噴泉和建築。呢度係我同女朋友重遇和第一次歐遊去的地方，這花園裹的一草一木已經記入我的記憶當中。

3. 舊城區和高地要塞(Festung Hohensalzburg)

薩爾斯堡主要分為新城區同舊城區，而舊城區係當地最繁華的地方。無論是跨國的品牌，本地的著名小店，以及不同種類的餐廳都林立於舊城區。舊城區讓我有種在古城中穿梭的感覺，歷史的建築以及新穎的品牌融為一體。奧地利是以音樂聞名的國家，舊城區有莫札特的紀念雕像以及他的故居供遊人參觀。

街頭上都有不少的表演者演唱及吹奏樂曲，他們表演的水平是非常高。欣賞時見到一個小插曲，當表演者見到有人拍攝，但是沒有打賞的時候，就停止表演，直至人離開後才重新表演，我諗表演者覺得他們沒有尊重他們，所以就停下來。

沿着舊城區行上去就會去到另一個著名景點高地要塞。前往高地要塞可以選擇步行或者坐纜車。當日乘坐纜車前，天氣還是風和日麗的，但是搭完短短幾分鐘的纜車後突然風雲色變，落起滂沱大雨，我們只可留在室內地方等待天氣好轉，只可以說這就是歐洲的天氣。

天氣好轉後，我們就在要塞不同的景點穿梭。高地要塞就像一座城堡，入面的展覽主要講返以前城堡的歷史，以及在戰爭時如何保護這一座城市。而我們可以從這一座城堡俯瞰整個薩爾斯堡，頓時覺得薩爾斯堡其實都好靚。

4. 音樂劇(Salzburg Festival 2024)

適逢薩爾斯堡節，我們去了莫札特歌劇院睇一場音樂劇。出發前我們做資料蒐集，知道需要盛裝出席這些音樂節，但是去旅行行李的空間有限，我們沒有帶上晚裝，只是穿上恤衫和長褲到訪。

去到歌劇院附近，見到大部份出席的人穿上盛裝，就有種站著如嘍囉的感覺，只想快啲去到自己的位置，等待欣賞音樂劇。

我們欣賞的是一場以莫札特樂曲編寫的音樂劇，節目表演前覺得這是以古代題材的音樂劇。當布幕一開，見到舞台上的是現代寫字樓的擺設，就覺得好似之前喺香港睇過啲舞台劇一樣。

表演者用意大利文唱出對白，在舞台上方的位置有英文翻譯，讓我這些不懂得意大利文的人都可以明白劇情。但係我就覺得表演有點冗長，佢哋不斷將啲劇情同埋對白重重複複咁樣唱出嚟，所以我哋睇咗半場大約一個多小時後便離開。不過我覺得呢個都係幾好嘅體驗，嚟到音樂之都感受吓當地人喜歡音樂的氣氛。

蕯爾斯堡飲食

在蕯爾斯堡都食過唔同國家的菜式，例如傳統的德國餐，高級酒店天台的早餐，以及亞洲菜等等

1. 德國餐

由於奧地利在德國旁邊，語言和飲食文化都十分相近。今次在薩爾斯堡的四天就食咗兩餐德國餐，主要都係食炸豬扒，腸仔以及好似香港燒臘舖的燒腩仔，而今次就冇食豬手啦，上次喺德國已經食咗。

德國餐食物味道都算不錯，但有時候覺得食得太多煎炸同埋肉類會有啲膩。奧地利的啤酒冇德國咁好飲，但質素都不算太差的。

其中一餐誤打誤撞去咗酒店附近的一間奧地利餐廳飲咗佢自家品牌(Fuxn)，嗰杯啤酒充滿麥味同埋啤酒的香味，我諗這是今個旅程飲過最好的啤酒之一。

2.IMLAUER Sky(天台餐廳)

其中一天的早上，女朋友家人去了另一個小鎮Hallstatt參觀，而我同女朋友去了一間位於米拉貝爾花園附近酒店的天台食早餐。雖然呢間天台餐廳不是薩爾斯堡最高的地方，但係都可以從高望到城市不同的景色。有時候我覺得喺外國去天台餐廳都係一個幾特別的體驗。特別是我呢啲來自香港嘅人，如果喺香港高的地方望落去，總會見到稠密的高樓大廈，但係在古色古鄉的小鎮從高而下望落去，會好似望到一幅畫咁樣。

呢一餐主要就食奧地利的傳統早餐，他們提供唔同種類嘅麵包，及提供唔同嘅醬和不同種類的芝士和火腿我們配麵包。另外留意到佢哋嘅早餐通常都會包一杯橙汁以及一杯咖啡，所以早餐係非常豐富。

3. NAGANO(日本餐廳)

食得多傳統嘅德國菜，都想食返一啲亞洲菜，我哋就喺舊城區搵咗一間日本餐廳。入到去呢間日本餐廳，可能啲侍應見到我們係華人的面孔，所以就同我哋講普通話，再仔細留意聽到佢哋都係用普通話互相溝通，即係代表呢一間係中國人開嘅日本餐廳。

講返食物，味道同香港的日本餐廳都有得比，我哋嗌咗照燒汁燒雞炒麵，煎餃子同埋一個卷物。雖然我而家喺日本餐廳返工，但始終舖頭的食物同真正日本食物味道是有出入的，所以好開心食到一啲好味嘅日本菜。

4. Asia Kitchen (中式任食餐廳)

除咗日本餐，我哋都喺酒店附近食咗一餐中式任食自助餐。招呼我哋嘅哥哥見到我哋喺香港嚟，就同我哋講廣東話，有時候喺異鄉去一啲餐廳聽到人講廣東話，其實都幾開心。

呢餐價錢大約20歐，以歐洲嘅物價嚟講係非常便宜。食物的種類款式都非常多，包括有一些炒雞，炸物，炒海鮮，壽司，甚至酸辣湯都有。總括而言，呢一餐係好抵食嘅中國餐，食到我捧住個肚離開。

蕯爾斯堡住宿

1. A&O(Hostel新體驗)

由於我比較遲先確實呢一趟旅行的行程，女朋友家人已經訂好了酒店。當我搜尋資料的時候，酒店價錢已經十分高，所以我有兩日就訂了Hostel。

這一次是我第一次住Hostel。入住前都有啲緊張，都擔心會遇到什麼種類的同房住客，或者使唔使同其他人傾偈等等。當入住之後呢啲問題就一掃而空，因為大部份住客都係喺Hostel度借宿一宵，唔會同其他人Social。每個人喺自己房都係沖個涼，然後就上床睡覺，有一些人更在下一天的晨早就已經出發了。

住在Hostel比較唔方便的是要將行裝鎖在大堂的儲物櫃，所以每一次拎嘢都要上上落落，而我將個人財物放入去一個小袋，無論我去沖涼，去洗手間都會拎住佢。

呢一次入住Hostel的經驗比我想像中好，如果第日再去唔同歐洲城市，我都會考慮入住Hostel去節省開支。

維也納(Vienna)

在薩爾斯堡玩咗四日之後，我們移動去奧地利首都維也納。到達維也納後，感覺到城市面貌跟薩爾斯堡與別不同。薩爾斯堡是一個小鎮，而維也納就繁華好多。市內有完善嘅交通網絡，不但有歐洲常見的路面電車，而且有地下鐵路，所以在市內四圍穿梭都十分方便。

1. 百水公寓(Hundertwasser Haus)

百水公寓喺一座人類同自然植物共全的住宅。當日我們都有猶豫過去唔去百水公寓，呢度同維也納其他的著名景點都有一段距離。但是當日天公不做美，去其他景點都欣賞唔到風景，所以最後都去咗百水公寓。到達後，令我有種詭秘的感覺，可能當日下着毛毛細雨，陰沉沉天配上這座佈滿植物的住宅，有點像參觀鬼屋。

不過不得不佩服設計這座住宅的人，將植物與住宅融為一體真是不容易，所以都值得一來這個景點欣賞這座特別的建築。

2. 美泉宮(Schönbrunn Palace)

美泉宮是維也納一座舊皇宮，曾經做過唔同皇朝嘅皇宮。當日我們就冇入去這一座黃色的皇宮，而去咗參觀皇宮的後花園。

這個後花園比薩爾斯堡的米拉貝爾花園大幾倍，花園四周佈滿了不同顏色，不同種類的花，真的讓人目不暇給。行過這個公園有一條斜路行上一個小山丘，可以從高而下欣賞美泉宮以至到維也納市內的建築。

在後花園欣賞花朵及打卡時，突然下起滂沱大雨，我哋就去咗樹林下的地方避雨。正當我們覺得要打消行上小山丘念頭的時候，天氣突然好轉，最後我們都上咗小山丘。現在回想，幸好天氣突然好轉，唔係就會錯過咗優美的風景。

上到小山丘後，就立刻諗起倫敦的格林威治天文台，又是一個小山丘可以從高以下望到一個公園同埋遠距離的建築。不過唔同嘅係喺美泉宮的小山丘係望到維也納市內一些古舊的建築，格林威治天文台望到的是現代化的高樓大廈。

3. 聖斯德望主教堂(St. Stephen's Cathedral)

聖斯德望主教堂位於維也納的市中心，從教堂外面睇非常宏偉，第一眼睇更有啲似科隆大教堂，但係入到去就有啲失望，因為教堂入面的壁畫比想像中少。或者唔可以用返科隆大教堂的水平嚟比較，我相信科隆大教堂應該係喺歐洲算係數一數二嘅教堂，如果同歐洲唔同國家嘅教堂比較，維也納的聖斯德望主教堂應該都是名列前茅。

4. 西班牙騎術學校晨操(Spanische Hofreitschule)

西班牙騎術學校晨操係女朋友悉心安排的節目，她知道我和她的爸爸喜歡馬仔，所以就帶我哋去呢一個冠冕堂皇的宮殿欣賞馬仔晨操。

節目非常精彩，騎師先會帶馬仔出嚟踱步慢跳，然後就慢慢加速在會場圍圈奔跑，騎師更會教導馬仔做一些花巧的動作，好像奧運會上盛裝舞步表演。

表演的馬仔全部都是白色的，雖然馬匹沒有競賽馬般充滿肌肉，但是馬仔配合着音樂在宮殿中練習，顯得出一種高貴。我好欣賞呢啲馬仔，如此溫馴聽話，乖乖地在眾多的觀眾面前表演。

維也納飲食

1. Ribs of Vienna

Ribs of Vienna 係維也納舊城區的一間主打食豬肋骨的餐廳。餐廳是在地底但是沒有冷氣的，當天溫度接近30度，所以喺餐廳進食嗰時都感覺有點侷促，不過夏天嘅歐洲就係這樣的，只可以好好接受。

我們叫咗一份豬肋骨，炸物拼盤，著名的維也納豬扒以及沙律。當豬肋骨和炸物拼盤送上來的時候，心想有冇咁大份啊! 總共有兩大條燒烤味的豬肋骨，味道是不錯的，但係食得多之後就覺得有點膩。炸物拼盤就更誇張，餐牌上係寫二人的拼盤，但是拼盤上的所有東西都有五至六件。最後我哋食到要問侍應拎個外賣盒打包回酒店作宵夜。

總括而言，這一餐豬肋骨大餐水準是不錯的，不過要再提大家食物的份量是很大的。

2. Block House

Block House係我呢趟旅程其中一間期待的餐廳，因為我都想喺歐洲試吓食牛扒。

結果冇令到我失望，我們總共叫咗三款牛扒同一個意粉。牛扒就叫咗T骨，西冷以及肉眼。當中T骨牛扒的質素是最高，香口得來，肉質嫩滑，而肉眼扒的肉質都鮮嫩，西冷牛扒就略嫌過熟，我們叫咗五成熟，但係上碟後就已經覺得似一嚿七成熟的牛扒，所以食落去就有啲韌。

不過呢一間都係值得推介的扒房，當食德國菜食到有啲厭，鋸扒都不失為一個好選擇。

3. Cafe Central

Cafe Central幾乎係維也納必去的打卡餐廳，金碧輝煌的裝修讓你將置身於一個宮殿。

餐廳主要主打食甜品，蛋糕。我們就叫咗一啲熱食，朱古力蛋糕，同配莓醬食的`鬆餅。熱食嘅味道就比較普通，但朱古力蛋糕的質素非常之好，濃厚的比利時朱古力，不過沒有過甜，呢件蛋糕算係我喺歐洲食過最好食嘅蛋糕。另外鬆餅配住酸酸地嘅莓醬都幾特別食，歐洲人做的甜品真的是有一手。

維也納住宿

1.Hilton Vienna Waterfront

在維也納其中一晚我們住咗喺多瑙河旁的希爾頓酒店，這座酒店零零舍舍坐落喺多瑙河旁的一角，遠望好似一座城堡。

我們其中一間房係海景房，從窗望出去就欣賞到恬靜的多瑙河。細個嗰陣，屋企樓下的富豪雪糕車都會播住藍色的多瑙河，依家終於來到多瑙河旁旅遊，心中自然唱起藍色的多瑙河。

除此之外，我們都食咗酒店的早餐，酒店自助早餐食物的質素好。坐在河邊欣賞着駚過的遊船，吃着豐富的早餐開始晴朗的一天。

「旅行有的時候是檢視自己走過的路」

總括而言，奧地利呢兩個城市比我想像中好玩，既有歷史建築參觀，還有不同種類的美食。或者因為我出發前的期望是比較低，所以就好容易滿足。

不過旅行的意義就是這樣的，當自己親身去接觸去了解過這個地方，才會知道自己是否喜歡。

寫在旅遊後的5天

丹尼