星期五...

終於到星期五, 我又捱左一個星期, 12月去搞份政府文件等撚到而家, 今日打去遺產承辦處度問, 同我講仲要等多2個星期, 政府做野實在太有效率, 到時文件拎到又要交比稅局等佢搞律師文件, 點解想做一件事要搞咁多野?

我諗起我阿哥, 佢轉左新工之後, 成日都講planing, 有日我問佢可唔可以星期四幫我返公司等人黎裝寬頻, 佢就話我冇planing, 我話你唔得既可以改日子, 但係要話我知邊日, 我就同人講, 點知佢話我亂黎, 話我冇plan過要幾時做d乜野, 咩料先? 而家我同你係做屋企人呀, 唔係公司同事呀, 你唔得可以話我知, 而唔係話我冇planing, 我真係冇planing就唔係問你邊日得啦, 咁樣叫亂黎咩? 即係做屋企人都要plan下岩唔岩做? 阿哥, 你係咪返工返到short左?

其實我知我阿哥係錫我, 不過佢自稱佢要照顧佢既家庭先, 要照顧佢既老婆, 我既家庭同佢唔同, 唔可以同佢相提並論, 我諗起真係好嬲, 佢當下好明顯係講比佢個老婆聽, 但係我真係好嬲...咩叫我既家庭同佢既家庭唔同, 唔可以相提並論?
我唔使你照顧我, 但係我既家庭都真係一個我好愛既家庭, 我同你唔同只係我既另一半係同我同一個性別, 除此之外, 冇野唔同...

而家我阿嫂對我如同默路人, 其實我冇乜所謂, 反正我唔係要討好你...

唔知幾時開始, 我d正能量冇晒, 我係有去開工, 但係我力不從心, 我好掛住有妳係我身邊既日子, 好想妳再比一次機會我, 我地大家互相照顧大家, 妳冇同我講分手, 只係同我講左句要我搞好晒d野先再搵妳, 妳仲等唔等我? 我真係唔知, 我淨係知我每日行行下會突然爆喊, 同妳一齊, 我唔係想要年輕時既愛情, 我想同妳一齊安穩過活, 每日可以見到妳, 捉到妳, 大家手挽手行每一日既路, 開心既, 艱難既都係一齊行, 有時我行得快左, 我會企係度等埋妳, 有時妳行得快左, 妳又會回望等我, 一到大家變老...

我到而家都會諗, 點解我要做呢件事出黎, 點解我一開始唔敢講出黎, 我有諗過會唔會因為我太驚冇左妳? 其實我都好嬲自己, 好憎自己, 好想殺死自己, 內心冷靜唔到, 如果我真係咁驚冇左妳就應該一開始就同妳講, 呢個講法冇錯, 但係一開始我講出黎, 會唔會提早冇左妳? 呢個世界冇如果, 我當刻選擇咁做, 唔代表我係要傷害妳, 我只係用錯方法去愛妳, 我知我的確係傷害左妳, 但同時我都傷害左自己, 我第一次因為傷害自己而暴瘦, 我食野只係唔想凍死, 到目前為止我半夜依然會壓醒, 每晚我都拖住隻公仔既手訓, 每晚都諗起我返香港同妳一齊訓既時候都會拖住妳, 每日都係咁過...

曾經我同妳一樣, 好想去一個冇人識我地既地方一齊開始, 因為由唔知幾時開始, 我既世界只有妳就夠...老婆, 我真係唔知之後會點, 但我都好想同妳講多謝妳, 多謝妳呢十年黎比左一個咁溫暖咁安心既家我, 多謝妳對我咁好, 多謝妳咁錫我, 多謝妳咁愛我, 多謝妳咁支持我, 雖然我地會鬧交, 但每次我地都唔捨得嬲對方太耐, 我自問我接受唔到冇左妳, 我承受唔到冇左妳既痛苦, 我唔知妳係咪同我一樣, 畢竟我做左一件傷害妳既事, 只係發生咩事都好, 妳永遠都係我愛既家人, 我愛既老婆.

每次打日記其實我都喊到仆街, 但我只可以靠打日記黎支撐自己, 表達自己.
今晚我決定將日記既link比妳, 之前用過whatsapp當日記打野比妳, 因為有d野我只係想話妳知, 當妳睇到條line唔知妳會唔會入黎睇呢?

今日我有守到同主講既承諾, 我早提起身做晒全屋既家務再返公司做野, 亦應承了主今晚一定返屋企煮野食, 成日出街食290円拉麵, 一係食唔過200円既特價飯, 要比返d營養自己.

老婆, 我愛妳, 科豬都愛妳.