07-10.08.2024|Plitvice Lakes_Zadar_Zagreb|讓我愛上格仔國的旅程

經過奧地利六日嘅行程後，我地就嚟到呢趟旅程好期待的克羅地亞。克羅地亞對我呢個住在亞洲既人嚟講係比較陌生的，對佢地最深刻印象就係近年克羅地亞足球國家隊同埋摩迪好犀利，最近兩屆世界盃都拎到獎牌。但當在網上睇到一些KOL介紹呢個國家的風景和美食後，就覺得呢個國家一定要去，所以就把這個國家放進了我的旅行清單裏面。

克羅地亞係一個沿海的國家，毗鄰斯洛文尼亞及巴爾幹半島的其他國家。今次行程，我哋就去咗首都薩格勒布， 扎達爾以及世界遺產十六湖國家公園。

完成咗維也納嘅行程之後，我哋就乘坐長途跨國巴士Flixbus前往首都薩格勒布，車程大約五個鐘，上車時就留意到呢架車嘅出發地係喺捷克的布拉格，即係代表呢架車喺我哋上車之前已經行咗五個鐘。不過我哋喺維也納上車時巴士都有好多空位，代表唔多人由捷克搭10幾個鐘頭車去到薩格勒布。

巴士沿途會經過不同奧地利的小鎮，以及斯洛文尼亞。當巴士駛到斯洛文尼亞的時候，就去咗一個休息站停下來，讓乘客們去洗手間和稍作休息。雖然五個鐘巴士車程聽落有啲長，但是巴士的座位空間寬敞，喺車程期間用吓社交網站，搵吓資料和休息吓好快就去到目的地。

呢一次長途跨個巴士的體驗是不錯的，如果將來有機會喺歐洲去唔同國家，我都會考慮搭呢啲長途巴士。

十六湖國家公園(Plitvice Lakes National Park)

十六湖國家公園係我繼國王湖後，另一個十分期待的景點。我睇YouTuber Bob叔先認識呢個景點，睇片的時候，發現呢個世界竟然真係會有湖水色的湖水，就將呢個景點加入我嘅人生旅遊清單。

十六湖國家公園顧明思義是由十六個湖組成。由於克羅地亞政府發現呢個人間天堂可以成為國家的皇牌旅遊景點，所以將呢帶總共十六個湖區規劃，鋪上簡單易行的行人步道，更安排遊船，讓遊人在湖上欣賞如畫搬的風景。

十六湖國家公園官方就按唔同程度設計左唔同遊歷路線，而我地就選擇左中級的B路線。B路線可以欣賞到十六區大部分具標誌性的景點，包括澎湃的大瀑布，美如仙境的下湖區，以及湖上小船。

當日我地一行五人係薩格勒布乘坐巴士前往十六湖，車程大約兩小時就去到一號入口（十六湖有兩個入口的）。進入公園後，就已經見到第一個著名景點大瀑布。從高而下俯視大瀑布的畫面真的是何其壯觀，呢世人真係未睇過如此美麗的自然畫面。

然後，我地沿住行人步道去到瀑布的底下，近距離接觸下呢份震撼。欣賞完瀑布後，就跟住B路線的指示，行過一個又一個湖水綠色的湖區，沿途發現湖水清澈得望到水底一條條的魚。天呀！原來呢個世界真係有咁靚嘅景架。行到前往乘坐遊船的碼頭前的大草地，我地就稍作休息及食午餐，然後再去坐船。

休息過後，我地就坐船前住上湖區，船程大約20分鐘，我地就好似係一架明信片上的船在美如畫的風景穿梭（咁樣形容一啲都冇誇張）。

落船之後，行多大約20分鐘到就去到公園嘅二號出口，亦都接近呢一趟旅程嘅尾聲，我哋就坐返園區的巴士去返一號出口，正式完成十六湖國家公園之旅。

總括而言，如果你喜歡大自然，十六湖國家公園係係人生中必去的地方，呢種渾然天成的自然景觀真係不得了。公園規劃得十分好，即使冇行開山嘅人，都可以應付到呢一個探索大自然之旅。

「日月會催 別要追」

扎達爾(Zadar)

在十六湖國家公園附近住左一晚之後，我哋就繼續搭巴士去南邊嘅城市扎達爾進發。雖然扎達爾唔係克羅地亞最出名的旅遊城市，但擁有被世人驚嘆的世界上最美的日落。我喺香港都好鍾意睇日落，如果講香港最靚日落，我會揀西九龍海濱。我喺嗰度睇過無數次嘅日落包括係自己睇，同朋友或者係同女朋友睇。克羅地亞有啲呢一個號稱全世界最靚嘅日落，當然要去一睹佢嘅風采。

穿過扎達爾的舊城區後，就行到望向Adriatic Sea的大海。對岸有一些小島，我哋一度以為對面就係意大利，因為地圖上意大利就係喺正我哋嘅前方，當然意大利梗係冇咁近啦，對岸是克羅地亞小島。當日日落時間是大約晚上8:15，我哋食左晚飯，就慢慢行去睇日落嘅地方霸返個靚位。

坐低之後，就聽到四周不斷傳來一些類似空靈鼓的聲音，當時我以為附近有人玩緊樂器，後來才發現呢度就係扎達爾另一個令人讚嘆的設計海風琴，當海浪衝擊座位下的管子，就會發出優美和諧的聲音。

太陽亦隨着聲音慢慢落下變成夕陽，當太陽落到接近海面的時候，就明白點解呢一個就係全世界最靚嘅日落，因為呢度有一個一望無際嘅海，讓我們可以慢慢咁睇住太陽落到海平線，而太陽更會變到鮮橙紅色，相信呢一個真的是我人生入面睇過最好的日落之一。

薩格勒布(Zagreb)

1. 薩格勒布舊城區(Upper Zagreb)

在十六湖及札達爾遊歴後，我哋就回到首都薩格勒布最後兩天的行程。薩格勒布的舊城區對比其他城市的舊城區規模比較細，不過細有細嘅好處，去到旅程的最後幾天，其實體力都開始有點透支，自然都唔想行太多路，簡簡單單行一個細細地嘅舊城區，睇吓紀念品，去吓超市買嘢，何樂而不為。

2. 洛特爾薩克塔(Lotrscak Tower)

薩格勒布其中一個可以從高俯瞰整個城市的地方。從高以下望落去的時候，發現薩格勒布的城市面貌好似捷克布拉格（雖然我未去過），呢個亦算係我心目中歐洲舊城的面貌。當日天氣非常好，藍天白雲加上薩格勒布的美景，令到我完完全全地對克羅地亞呢個國家加分。

3. 聖馬可教堂(St. Mark's Church)

聖馬可教堂係薩格勒布另外一個著名的景點，佢嘅屋頂係以克羅地亞國旗紅白藍三色的格仔組成的，我諗呢個世界應該都冇乜會將自己國旗配飾砌上去外牆的教堂。屋頂上的馬賽克為教堂，為薩格勒布帶來繽紛。喺呢10日嘅旅程都睇過形形色色的教堂，我最鍾意呢個別樹一格的聖馬可教堂。

美食

1. Franko’s Pizza & Bar

Franko Pizza喺呢一次旅程嘅其中一個驚喜，喺安排行程嘅時候，我哋都冇諗住幫襯。餐廳係喺我哋第一日住喺薩格勒布民宿附近，我哋安頓後，就想搵吓附近有咩餐廳。我哋就搵到呢一間喺Google評分頗高的意大利餐廳。行入餐廳之後，見到佢展示一些獎狀，原來佢近呢幾年都係歐洲五十大的Pizza餐廳。

我地當日食咗四款Pizza，而其中令到我哋最深刻嘅係一款有開心果味加風乾火腿的Pizza，以及一個有黑松露味的Pizza。Pizza的皮係由酸種麵包造成的，有一種外脆內軟的感覺。材料方面無論黑松露或者開心果的味道都做得十分好，食完會有種好滿足嘅感覺。有時候旅行就係咁，亂打亂撞都會試到一啲好東西。

2. Vindol

Vinodol係主打地中海菜的餐廳。出發前，我哋就已經預約好。餐廳第一樣吸引到我嘅就係佢嘅氣氛同埋裝修，佢令到我哋好似置身喺一個古老地底餐廳，而又有Fine Dine嘅氣派。價錢方面亦十分親民，沒有因為餐廳的環境而索取天價。

當日我哋就嗌咗烤兩條鱸魚，炸魷魚，意粉以及一個克羅地亞傳統的小食。首先講吓鱸魚，條魚非常新鮮，克羅地亞呢個島國真係非常適合食海鮮，佢煮嘅火候亦啱啱好，並冇將魚煮到好老，所以十分好食。成餐飯最好食嘅非炸魷魚莫屬，佢將新鮮嘅魷魚炸得卜卜脆，配上佢一個特製嘅醬汁和有一些類似薏米的東西，魷魚同醬汁配合起上嚟非常合拍。

整體嚟講成餐飯嘅體驗都好好，雖然侍應的服務冇其他餐廳咁殷勤，但係考慮到食物質素，環境同埋價錢，呢一間餐廳都係十分值得推介的。

3. Vincek

食咗好味嘅克羅地亞菜，當然梗係要食埋好嘅甜品。Vincek係薩格勒布最出名的雪糕店。以我呢一個非雪糕愛好者嚟講，呢一間雪糕店俾到驚喜我。當日我試咗同雪糕店同名的招牌雪糕（焦糖，朱古力的香滑雪糕配上朱古力薄脆的雪糕筒）。雪糕嘅質感是非常Creamy，味道又岩岩好，冇嗰種死甜嘅感覺，啱晒喺炎炎夏日嘅克羅地亞食。

4. Garden Brewery

Garden Brewery係薩格勒布手工啤酒的品牌，佢嘅工廠就位於市郊，我就喺市中心搭大約半小時的路面列車前往啤酒廠。由於啤酒廠喺偏遠地方，所以佢嘅空間都非常之大，而佢都有一個花園可以讓遊人暢飲。

當日我飲咗佢自家品牌嘅Pale Ale，手工啤的麥味及果香味充滿了我嘅口腔，價錢只需3.8 歐，即係大約30蚊港紙一杯，平得來又好好飲，誠意推介喜歡飲酒的人到這間手工啤廠一趟。

住宿

1. Pansion Danica

遊歷完十六湖國家公園之後，當晚我哋去咗公園附近嘅一間民宿居住。民宿就喺一個山頭附近，有一種喺台灣清境農場居住民宿的感覺。

我哋被安排到2樓的房間，我和女朋友的房間有一隻天窗，晚上熄咗燈後，我哋望出天窗，欣賞天上的繁星，有種同大自然連接的感覺。

民宿的食物都是非常好，海鮮和意粉都煮得好好食。民宿更提供不同嘅活動，包括羽毛球，踩單車，射箭等。我喺香港都玩過射箭，但係已經完完全全唔記得點玩，當日不斷射箭出外太空，最終有一箭射中紅心，總算有個安慰獎。

射箭場隔離有一個羊棚，嗰度養住五六隻羊，啲羊見到有人過去欣賞佢地時，就好得意咁會走過去同人玩。行完十六湖國家公園之後，喺郊外民宿住一晚都不失為一個好選擇。

「讓我掌控一切的次序」

短短四日嘅克羅地亞之旅令到我完完全全喜歡在呢個國家，無論係美味的食物，美麗的大自然，以及遇到的人，都令我回味這一趟旅程。克羅地亞仲有好多好靚嘅城市我哋未去過，所以我一定會再來的！！

寫在旅途後的兩星期

丹尼