8-10.5.2024 Köln_ Düsseldorf_Dortmund｜愜意德國遊

科隆大教堂

不經不覺已經在英國生活了三個星期。由短租的Airbnb搬到長租半年的單位，開始有工作面見的機會，生活都好似慢慢上緊軌道，而我都越來越喜歡外地的生活。

呢個時侯發現倫敦的景點去得七七八八，工作又暫時未搵到，所以就諗不如去一轉歐洲旅行。然後就打開Skyscanner，睇吓一個星期內出發的機票。

出發英國前，聽過好多人講歐洲內陸飛的機票係好平。搜尋的時候，我都有種平得有點難以自信的感覺，20-30英鎊就可以來回由細到大覺得要用好多錢先去到的國家。當然，現實啲諗我依家已經係歐洲，機程短咁多，自然都會平啲^^

搜尋結果就出現左好多我想去的地方，例如丹麥，匈牙利，克羅地亞等等。而最後考慮到航班的時間，就揀咗早機去晚機返來回德國科隆(Köln)啦。

科隆的舊城區

講下我對科隆的印象先，第一個印象當然係科隆足球隊，自小睇德甲或者玩足球遊戲都認識呢一隊德甲中型班球隊，每年都唔洗降班，但又打唔到歐洲賽。

第二個印象就係科隆大教堂，之前都聽過女朋友同家姐講過呢座大教堂係好雄偉，所以都想一睹佢真面目。

出發（8 MAY)

我買左朝早7點由Stansted Airport出發的航班，即係大約5點就要去到機場。買果陣我都有十五十六買唔買好，因為由我屋企出發去機場大約兩個鐘，途中要搭兩程巴士。另外我未試過係倫敦半夜條街出入，心入面都有擔心安全問題。不過呢張咁平，又可以玩足三日的機票實在太吸引了，所以最後都決定出發。

當晚兩點半就行去距離我屋企5分鐘的巴士站，路上一個人都冇，只見超市和咖啡店的貨車係度落貨，而最令我感到好奇的是街道上關門的店舖係冇熄燈的，可能佢想為街道帶點光？而香港所有店舖都會熄燈，呢方面真係好大相比。

巴士就按巴士站指示牌上的時間準時到達，巴士上都有幾位乘客，佢地應該都係出發返工或者收工回家的。經過左約一小時車程，就去到轉national express的車站。National Express 係一間長途旅遊巴士公司，而佢都會提供來回機場的服務。巴士的車票我係經Ryan Air訂，而佢係冇特定班次，只要起飛前24小時的巴士都搭得。到轉車站時，見到咁多人等緊車就知道大件事了，擔心會唔會冇位上車，因為巴士公司會先照顧劃位的乘客。幸好，最後都上到車，否則行程就會擔誤。

到了Stansted Airport，整個機場集合了大量同我一樣朝早出發的人，真係佩服大家的毅力。而我今次搭的航空公司是Ryan air。如果大家有係歐洲生活或者旅行穿梭，就一定對呢間公司唔會陌生，出名平，但係暗藏大量陷阱罰乘客錢。

簡單講下今次體驗，大致都順利，冇延誤，準時到達。而覺得好神奇的是直接在機底行樓梯上機，印象中好似第一次咁上機。

「大道上走走 別站兩旁」

今次旅程去了三個城市，有旅遊的熱門地方，有小東京，以及有德國足球的體驗。

科隆(Köln)

1. 科隆大教堂(Kölner Dom)

大量旅客慕名而來打卡

大教堂內的建築

科隆大教堂絕對是每一個旅客慕科隆之名而來的地方。當日步出火車站，就見到整座大教堂係自己眼前，覺得非常震撼。從來未見過如此雄偉的大教堂，教堂外牆上的雕塑十分之細緻，令我不禁停下腳步慢慢欣賞。然後，教堂係可以免費入內參觀的，入到去就更加佩服以前的鬼斧神工，究竟以前的人點樣整呢啲色彩斑斕的窗。

2. 三角大廈(Koeln Triangle)

俯瞰科隆的風景

如果想在高空睇晒成個科隆，三角大廈就係不二之選。只要俾5歐就可以將大教堂同鐵鎖橋，映入眼簾同相機內。可惜當日天氣一般，如果藍天白雲上去睇，一定會再靚啲。

3. 德國酒吧（Brauhaus FRÜH am Dom)

整個旅程總共食咗兩餐德國菜，兩餐不約而同都飲咗同款嘅啤酒（Fuhn)，以我所知，呢一款係當地最地道的啤酒，我一飲就已經喜歡了這款啤酒，佢清清地，唔算太濃烈，但係入口後有濃烈的麥味。

呢兩餐我食的主食就係德國豬手同香腸。德國豬手就同在香港食的唔同，以往在香港食的都是烤豬手，但係呢度有地道的烚豬手。（因為我唔識睇餐牌。，睇Google Translate先揀咗烚豬手）豬手嫩滑，配酸菜一齊食，非常之好味。

杜塞爾多夫(Düsseldorf)

1. 小東京(Little Tokyo)

出發前做research的時候，發現杜塞爾多夫是德國最多日本人聚居的地方，在科隆出發只需要20分鐘車程，所以就在今趟旅行去埋呢度食吓日本嘢。而杜塞爾多夫的日本餐廳集中在火車站附近，嗰度有拉麵，壽司，居酒屋，日式超級市場等等。

在這裏食咗兩餐拉麵，一解我嚟到歐洲之後，掛住日本食物之情。我分別食咗傳統的豚肉拉麵同埋日式拉麵。拉麵的味道同香港或者日本都有8分相似，唯一不足的是豚肉不夠香口，冇那份油脂的感覺。

2. 杜塞爾多夫舊城區(Altstadt)

去到德國，自然都想睇吓他們的舊城區。而杜塞爾多夫的舊城區在萊茵河旁，到訪當日，正值德國公眾假期，所有大型連鎖店都沒有開門，反而酒吧和餐廳就逼得水洩不通，大量德國人在舊城區的餐廳飲酒食飯暢敘。舊城區的建築明顯跟車站附近的不同，有種走到數十年前德國一樣的感覺。

多蒙特(Dortmund)

1. 德國足球博物館(Deutsches Fußballmuseum)

德甲的展品

Mario Gotze在2014世界杯決賽射入致勝一球的球衣

Raul在Schalke 04的經典球衣

去多蒙特的唯一原因，就是參觀足球博物館。由細到大無論打遊戲機或者睇波都會留意德甲嘅賽事，所以對當地嘅球隊都有一定的認識。

嚟緊2024年歐洲國家盃將會在德國舉行，無論我在科隆，杜塞爾多夫，甚至多蒙特都有鋪天蓋地的宣傳。在德國足球博物館外放有巨型的足球以及歐洲國家盃的獎杯展覽。

德國足球博物館，主要分成兩層。第一層，主要講述德國國家隊的足球發展，最令我感興趣的是關於德國最近2014贏世界盃的展覽，佢展出多樣當時德國國家隊成員的波衫，球鞋，甚至世界盃的獎牌。

第二層就講述德甲的發展，以及展出不同球隊在不同時代的球衣，最令我吸引的是魯爾在史浩克04效力時的球衣，令我想起當時我留意德甲的回憶。

總結

這三個城市除咗科隆之外，都不是熱門的旅遊地區。但是我幾喜歡這一種恬靜，而輕鬆的旅遊。第一次歐遊所有事情都很順利，提升左我將來繼續獨自旅行的信心。

期待下一趟旅行，希望快啲有平價機票啦^^