Í-chá khì Tām-chúi koe-á chhit-thô, kiàn pái khòaⁿ tio̍h hang jiû-hî to̍h chok ài bé lâi chia̍h, tian-tò sī he chhut-miâ ê á-geh, kú-kú-á chiah chia̍h 1 pái, chia̍h kì-tî kap khì-bī--ê. Kóng tio̍h hang jiû-hî, ē kì-tit tī Tām-chúi hia lóng sī chia̍h kui-chiah--ê, mā ū jiû-hî-chìⁿ hit khoán--ê, pah-bīn lóng sī kō͘ chhiám-á chhǹg--kòe, chhah tiàm tàⁿ-á thâu-chêng pâi kui pâi, chit khoán--ê góa khah bô ài, ná-chhiūⁿ ū 1, 2 pái-á chia̍h liáu tńg chhù chŏaⁿ làu-sái, hoān-sè sī bô chhiⁿ-chhioh a̍h-sī khì hō͘ eng-ia òe--tio̍h, bô ōe-seng só͘ tì. Lēng-gōa 1 chióng hiān hang--ê, boah tāu-iû hang ho͘ se̍k, liáu-āu hē kóa môa-á phòe teh chia̍h, khiū koh tak-chi̍h, kiâm tài lio̍h-lio̍h-á bi̍t-tiⁿ, si̍t-chāi chok hó chia̍h. Ū 1 kiàn kap pêng-iú khì Ke-lang, chin kú chìn-chêng ê tāi-chì--ah, ē-po͘ se̍h biō-kháu iā-chhī, chhī-á-bóe 1 tàⁿ bē jiû-hî kha, hiān hang--ê, hoⁿh he 1 ki kha beh góa pòaⁿ-ki chhiú hiah chho͘, tn̂g-tn̂g 1 liāu téng-bīn khip-pôaⁿ-á-chhùi mā sī kui pâi--ê, thâu pái khòaⁿ tio̍h ū iáⁿ ē kiaⁿ 1 tiô, he sáⁿ siâu koh ē chia̍h--tit!? M̄ chai sī chia̍h bē koàn-sì a̍h-sī án-chóaⁿ, góa sī pō͘ kah chhùi-phóe sng, lō͘-bóe í-keng bē kì-tit sī siáⁿ-mih bī, kan-ta siūⁿ beh kín ka chia̍h liáu. Ìn-siōng tiong tī pat-ūi iā-chhī-á mā bô kài chē chit khoán bē tōa-ki jiû-hî kha--ê.

文化生活

Sàn-pō͘ ōe-sian散步畫仙

Lô-hàn hām-bîn tǹg pu̍t-toh,
Tio̍h-kiaⁿ cheng-sîn piàn siu-lô,
Thó͘-hoan chhiⁿ-kông hong-hóe-to̍h,
Khí-kha tāng-chhiú chhám sîn-mô͘.！  

Hoan-á-liâu番仔寮

創作

Sàn-pō͘ kì-sū_6

Ē kì-tit sè-hàn sî-chūn, pài 6 lé-pài sī tōa ji̍t, gún kui ke-hóe-á ē khì iā-chhī-á chia̍h-àm. Hit chūn-á chiâⁿ sî-kiâⁿ gû-pâi-koán, ho̍k-bū-oân kā gû-pâi hē tiàm toh-téng, khàm-kòa kheh--khiaih chìn-chêng, lóng ài seng kā chóa-kin-á gia̍h koân tī bīn-thâu-chêng, pī-bián hō͘ sio-kún ê iû-pho phùn--tio̍h, ìn-siōng tiong ài tò-ta̍h-sǹg sǹg 30 bió, chiah ē ēng-tit chia̍h, mā m̄ chai che kui-kí tó-ūi lâi--ê... Chit-má gún tòa ê hū-kīn ū 1 tàⁿ bē o͘-lián--ê, put-sî ē khì ka kau-koan, thâu-ke kap in khan-chhiú (khòaⁿ--khiaih èng-kai sī ū tàu-tīn ê khoán--lah) mā lóng chia̍h kah ē jīn--tit-ah. O͘-lián tian-tò m̄ sī góa sè-hàn sī chin chia̍p chia̍h tio̍h ê mi̍h, chit khoán kō͘ ji̍t-pún hái-chhài tīm thng chú--ê liāu-lí, tian-tò sī chhut siā-hōe liáu-āu, siōng kah-ì chia̍h--ê. Khioh-khí chia̍h gû-pâi, gún tau mā chin ài chia̍h jiû-hî kap hēng-jîn keⁿ, thâu-chêng kóng ê iā-chhī-á, lāi-té ū 1 keng biō, biō-kháu sī bē mī kap pn̄g hit khoán--ê, koh kòe hit tàⁿ to̍h sī bē ô-á-chian kap jiû-hî keⁿ, gún chha-put-to ta̍k lé-pài siōng bô ē khì hia chia̍h 1 pái. Lēng-gōa to̍h sī chhī-á bóe ū 1 keng lō͘-piⁿ tàⁿ-á, bē chhoe chúi-kiáu--ê, to̍h sī hit khoán Tiong-kok pak-pêng lâi--ê, chúi-kiáu-phôe ke chin kāu ê hit khoán, chá-chêng in 1 lia̍p lóng pau kah kài tōa-lia̍p, góa ē tàng 1 lâng chia̍h 20 lia̍p, kiàn pái gún bó--a lóng kiò góa m̄ thang chia̍h hiah pá, nā bô ē piàn tōa-kho͘-tai.

Sàn-pō͘ kì-sū_5

Chún-pī chiàn-cheng bô tâ-ôaOk-lâng chhù-piⁿ iau-pá-chháHiong-chhin nńg-sim siū thoa-bôaSiā-hōe soe-bái cho sim-koaⁿ

Tâi-bûn chhân-hn̂g台文田園

2026.04.26

Hoān-sè sī thiⁿ-kong-peh--a mā m̄-kam, m̄-kam lín siū siuⁿ-chē thoa-bôa, chiah ē thê-chá chio lín tò-tńg-khì kap I chòe-phōaⁿ, hō͘ lín ē-ēng-tit hioh-chhoán--1-ē, bián koh khòaⁿ-kò͘ lán chiah-ê gōng-lâng. Nā-sī goán 1 sì-lâng bat tú--tio̍h-lín, bat khì ak tio̍h lín phah-piàⁿ sî lâu-lo̍h-lâi ê kōaⁿ-chúi, hō͘ lín pá-tīⁿ ê ài kap jia̍t-chêng bak--tio̍h, lán chit-sì-lâng mā ū kàu-gia̍h--ah. He sī ùi Thiⁿ-pē hiah chah--lâi ê kng-iāⁿ, sī chhōa lán koh khòaⁿ tio̍h sìⁿ-miā chin-siòng, àm-iā--nih ê chiò-hái-teng-hóe, hō͘ choa̍t-bāng ē lâng tit-tio̍h thiàⁿ, hō͘ pēⁿ-thiàⁿ ut-chut tit-tio̍h tháu-pàng ê koa-siaⁿ, kám-siā--lín, hō͘ góa iáu ē-ēng-tit kō͘ ba̍k-sái kám-siū tio̍h sim, kám-siū tio̍h sìⁿ-miā ê hoaⁿ-hí kap hok-im, hō͘ lán ē-tàng koh kiâⁿ--lo̍h-khì.

E.L. and M.J.

Kóng tio̍h o͘-tó͘-bái chhah-chhia, bat-sái sī póe bē-lī, kiàn-pái beh lâi chhia̍t-ūn-chām hù-kīn chia̍h pn̄g, kan-ta o͘-tó͘-bái to̍h ài se̍h kúi-nā lìn chiah chhōe ū chhia-ūi, jî-chhiáⁿ chin chē tio̍h koh ài chhiâu-chhia, tò-pêng chhiâu--1-ē, chiàⁿ-pêng sóa--1-ē, he nā ji̍t-sî-á to bú kah kui sin-khu kōaⁿ, to̍h leh pak-tó͘ iau--ah koh... Koh ū to̍h sī, chit chām-á góa kám-kak kau-thong ke chin loān, m̄ chai sī siáⁿ in-toaⁿ, lō͘ --ni̍h m̄-nā chhia, kiâⁿ lō͘ ê lâng kap khiā kha-ta̍h-chhia--ê, chhiâng-chāi sī kiàn tsiūⁿ tio̍h sûi to̍h beh oat--kòe, pah-bīn sī chò i ti̍t-chiap ùi gōa-khau chhia-tō beh chhiat si-koe, beh khì tùi-bīn lâng kiâⁿ ê têng-á-kha khì, lóng bô beh khòaⁿ 1 ē-á āu-piah kám ū chhia, mā bē seng thêng kha lo̍h lâi iáⁿ--1-ē, tán chheⁿ-âng-teng lóng bián ê khoán...Si̍t-chāi chok khióng-pò͘, chún kóng kiâⁿ lō͘ lâng kap khiâ kha-ta̍h-chhia ê lō͘-koân iu-sian, kám kóng chŏaⁿ lóng bián siú kui-kí? Thài ē pìⁿ chò án-ne-seⁿ?

Sàn-pō͘ kì-sū_3

Teh lō͘-piⁿ kâng chih chúi sè-chhia, e-po͘-sî-á óa beh-àm-á, bî-bî-á hong chin sù-sī, chúi ka khui--khui chōaⁿ tī kha-pôaⁿ téng-bīn, un-tō͘ chha-put-to koh kàng 1, 2 tō͘ ê kám-kak, thiòng! Chá-chêng tăⁿ bé chit tâi Gogoro ê sio-chún, ka sioh-miā-miā ta̍k lé-pài lóng ài sé 1 pái, koh choan-kang bé sè-chhia choan-iōng ê ke-si, chúi-tháng, tōa-ki bín-á, chhit-chhia-pò͘, iù-ki bín-á lù 1 kóa khang-phāng ê só͘-chāi, siūⁿ kah gōa chiâu-chn̂g--leh, kiàn-pái chhia sé liáu to kám-kak chok ū sêng-chiū kám, he phēng siáⁿ-mih lóng khah hoaⁿ-hí...Taⁿ chū téng-pái kàu taⁿ í-keng m̄-chai gōa-kú bô sé--ah, hoān-sè ū chhiau-kòe pòaⁿ-tang ŏ͘...Nā m̄-sī kin-á-ji̍t khì hō͘ chiáu-á sái òe--tio̍h, m̄-chai ài koh thoa kah tang-sî chiah beh lâi sé koh.Ná sé ná kah chhù-piⁿ khai-káng, se̍k-sāi chin kú--ah, sǹg sī khah ē ha̍h--ê, hèng-chhù ū sio-siâng, kú-kú-á ē hō͘-siong koan-sim 1--ē hit-khoán koan-hē. Chin tú-hó koh tn̄g--tio̍h. Mā hó, ū lâng chò-phōaⁿ bóng thih, nā-bô, góa mā-sī iân-lō͘ siūⁿ ka-kī ê tāi-chì, bē-su chìm tī ka-kī ê sè-kài lāi-té hit-khoán. Tī leh Tâi-pak chit-khoán Chină lâng chò chú ê to͘-chhī, sì-kè choân Chină ōe ê siaⁿ-im, thiaⁿ kah tit-beh péng-pak, chok ià, chhiâng-chāi boài kóng-ōe, kiâⁿ ka-kī ê lō͘, chò ka-kī ê tāi-chì to̍h chún-soah--ah, thài koh ka-kī giâ-kê khì kap in kóng Chină-ōe, kám ū hiah giàn-thâu? Sui-bóng kap he chhù-piⁿ mā-sī kóng Chină ōe khai-káng, siōng-bō͘ sī kú-kú-á 1 pái, koh sī hō͘-siong koan-sim kap hun-hióng, tio̍h--lah, lín-pē to̍h sī siáng-phiau, án-chóaⁿ, kám ū hiah-ê pùn-sò Pe̍h-chha̍t Koa--ê kap KMTer hiah-nī ló͘, lán kám ū ûi-hāi siā-hōe? Hō͘-siong koan-sim m̄-chiah sī lán chiâⁿ-chò Tâi-oân-lâng ki-pún--ê, Kám m̄-sī?

Sàn-pō͘ kì-sū_2

Àm-tǹg chia̍h pá, ùi chia̍t-ūn ē-kha tn̂g-liâu-á kong-hn̂g sàn-pō͘, kàu chia̍t-ūn chām gōa-kháu lō͘-piⁿ, khòaⁿ tio̍h 1 sian tōa chiah pò͘-ang-á, to̍h sī hit khoán lāi-té ài ū lâng, kha-chhiú ē tín-tāng ē sái kap lâng ū hō͘-tōng ê hit khoán, che í-chá êng-kang sī kan-ta sîn-bêng chhut-sûn chiah khòaⁿ ē tio̍h, tōa-sîn-ang hit khoán--ê. Hiān-tāi siā-hōe khah chē sî-kiâⁿ bûn-hòa kap só͘ ūi COSPLAY chit khoán khài-liām, khah chē sī kō͘ siàu-liân lâng kah-ì ê Bàng-kà kap Anime, chiah-chò chong-pān ê kak-sek. Thâu-tú-á kóng tio̍h tī chia̍t-ūn-chām gōa-kháu hit--ê, i pān 1 chiah Panda, to̍h sī Chină kok-pó, góa kā hō-chò gōng-bīn-hîm-á, góa 1 ē ka khòaⁿ to̍h m̄-sī kài kó͘-chui, a̍h bô kóng chò kah gŏa te̍k-pia̍t ê khoán. Jî-chhiáⁿ, sī án-chóaⁿ i beh pān chò chê gōng-bīn-hîm--neh? Góa ê ti̍t-kak, che hoān-sè kha-chiah-āu mā-sī Chină siong-koan ê kóng-kò kong-si teh pháng--ê, siu Chină chîⁿ thè in soan-thoân, hō͘ Tâi-oân-lâng mài siuⁿ hoán-kám Chină-lâng kap Chină chèng-hú, án-ne in beh kā lán thóng-chiàn to̍h khah kán-tan, lia̍h-chún 1 kóa lâng ì-chì khah bô hiah kian-tēng, ē nńg-sim, ē tiû-tû, án-ne in to̍h ū ki-hōe thang chò-chhiú kâng sái-lōng... Hi-bāng sī góa ka-kī siūⁿ-khang-siūⁿ-phāng--lah, m̄-koh chit-má lán khak-si̍t siū Chină éng-hióng siuⁿ-kòe giâm-tiōng, kui ê siā-hōe lú-lâi-lú sêng Chină lâng ê siā-hōe, bô-ta-ôa lán bē-tàng tìⁿ m̄-chai, kek gōa-gōa...

Sàn-pō͘ kì-sū_1

Thâu-khak cheng-sîn jio̍k-thé soah iáu teh khùn, pí-lūn kóng lán teh kóng ōe kóng kah têng-tâⁿ--khì soah bô tì-kak--tio̍h, hīⁿ-á thiaⁿ bô ka-kī kóng ōe ê lāi-iông. Ì-sù to̍h sī chûn-sim ǹg gōa soah sit kak-chhat. 1--ê sī bô liān-si̍p ǹg ka-kī koan-chhat kap kám-siū, 1--ê sī chhùi kap jio̍k-thé bē-su teh hām-bîn, ka-kī teh pháng án-ne. Embodiment ê ì-sù, to̍h sī kóng lán jio̍k-thé ài ē ēng-tit ná tín-tāng ná ū tì-kak tio̍h ka-kī teh chò siáⁿ-mih, koh bô cha̍p-liām, che si̍t-chāi ài liān, chin bô kán-tan.

Thâu-khak chhut-chháu頭殼出草

"Embodiment" án-chóaⁿ kóng?

先跟大家說聲抱歉，雖是 “趣談台語”，但我今天這篇文章，是要嚴肅地 Challenge 某些 “莫名其妙“ 的人！！！

 

我寫趣談台語系列的文章，在臉書社群發表時。遇到某些 “莫名其妙” 的人，劈頭就用白話字（羅馬字）罵我 “黑白寫”。也有人罵我，怎麼不用白話字寫？

 


學習

國際

以行動支持創作者！付費即可解鎖

趣談台語

我，退休的醫師，大學老師，已生活在澳洲墨爾本 30 多年了！要到澳洲，特別是墨爾本來玩？墨爾本在地人，來與您閒聊語言，景點，美食，音樂，政治，經濟，股票，.... ，甚至高爾夫！

墨爾本/台灣人

政治與評論

台語

文章

這群人

羅馬

趣談台語 - 憑什麼 “台灣” 要寫成 “Tai-Oan“！！！？？？

這是台灣基督長老教會的白話字聖經！

 

大家不要小看這聖經，在基督教剛傳到文盲很多的台灣時，很多文盲的台灣人都變成，能讀 “書”（聖經，聖書）識 “字”（白話字，羅馬字）的 “知識份子” 了！厲害吧！？

 
