羅志祥為何要拆散我和我女友？

常有偽人說，他們沒有秘密，因為一言一行也會被記者挖出來，造大眾的下飯菜。

偽人總是無奈的說，自己沒有私生活，因為都被大眾入侵了。

選擇當偽人的是你自己，完全不明白你是要怪誰，但我只是一介草民，為何偽人就有權入侵我的私生活？

其實我從不看娛樂版，因為我完全不想去了解偽人的私生活。我不是那些滿口仁義道德的人，只是真的不感興趣，誰誰跟某某在一起又怎了？分手又怎了？隔空罵戰又怎了？關我屁事？

反正偽人就只是讓大家看到想讓人看的一面，所以我向來只看「基本面」，我喜歡的偽人，要不他功夫了得，要不她外貌出眾，完全跟他的為人無關。
所以我對偽人們私生活的認知，大多是來自女友偶爾的提起。但偏偏，偽人們總是愛入侵我的人生。

吃完晚飯，開車送女友回家的時候，她沒頭沒腦的問：

「BB，你係咪一個壞左既人呀？」

「我緊係一個壞人啦，嘿嘿，妳一陣會唔會請我上去飲杯咖啡？」這樣奇怪的問題還是小心為妙，但在高速上，又難以分心查看女友的眼神，還是盡全力把球打走再說。

「你覺得黃心穎靚唔靚女？」

啊！我的咖啡呢？

「那誰？」又是哪個新人嗎？

「學是學非果個喎！」

「唔好意思，學是學非我淨係識森美咋喎，啲女冇留意呀，好靚架？」

我下次留意下先！這句硬生生吞回肚子去。

「唔知喎！可能你地男人覺得好靚啦！」

「咁如果佢有妳一成既美貌應該都算靚既。」來人救駕呀！為什麼車子裡就我們兩個？我恨不得把油門踏到底，幻想車尾箱是一板板的豆腐。

「佢俾人影到係的士入面同許志安又摸又鍚，之後重一齊落車添呀！」我的讚美招數完成被無效化。

「下？許志安喎……」我只能著實地回應，但連我也知道許志安是個實力派，而非偶像派。

「係呀！......你有冇車過第二個女仔！」話鋒又一轉，差點就一頸血。

「咁有時都會車下同事既。」這是合乎經濟效應又非常正常的行為吧？

「哦！即係有啦！係咪坐我個位！」女生總是會在這些地方表示強烈的佔有慾。

「咁讓女士坐車頭都係好合理既事姐，我咁有風度點會要佢坐後座呢？而且如果坐後座就會好似當我係司機咁架喇！」

「哦！即係重有女仔單獨坐你車添！」一時口快，說漏了嘴。

「佢會唔會摸你架！」

「傻瓜，同事黎架！你到站喇！我地係咪一齊落車呀？」極速把車開到她家，明明還沒到，還是先把話題扯遠一點比較好。

「咁我屋企暫時都冇人既......」好棒棒，連消帶打扳回兩城。

「BB，你有冇性上癮呀？」

女友又這樣沒頭沒腦的一句，害我差點把飯都噴出來。

「有呀，而家就想食左妳！嘿嘿！」我只能順勢而應，雙手亦抓住了她的肩膀，作狀要咬她。

女友輕輕推開我：「依，唔係呀，張致恒話自己性上癮，所以先食咁多女喎！」

張致恒？那誰？

女友看到我一臉黑人問號，貼心地說：「張致恒喎！成日偷食果個張致恒喎！」

「Steven呀！boyz果個Steven呀！」

「哦！變左個麻甩肥佬果個嘛！男人中年發福真係好可怕！」雖然我是真的不知道張致恒是誰，但防雷器掃到「食女」、「偷食」等詞，還是急忙想辦法來個全疊打。

「BB，你有冇周圍食女呀？」

我就像全力揮了一棒，還想看看球會被哪位幸運的球運撿到，後面卻實實在在地傳來「啪」的一聲。

「有呀！周圍食妳囉！」我繼續張牙舞爪，腦內不停想著要如何逃離這個大黑洞。

「攞部電話出黎！」女友突然就板起臉說。

「兩個人一齊最重要係信任，點解妳唔信我呢？」我就果斷繳械。

「我都係講笑姐，BB你做咩咁認真喎！」她溫柔地推開了我的手機。

「妳咁曳，妳性上癮既BB決定今晚要好好咁懲罰下妳！」扳回不止兩城，我心裡大笑了三聲。

「BB，知唔知邊個小豬？」我馬上十分警覺，每次牽扯到偽人的話題好像都不是什麼好事。

「我知，幾靚仔果個『中人』嘛，偷食呀？」八九不離十。

「BB你咁醒既？」女友十分驚奇。

「估架咋！妳提得偽人多數都係呢啲架啦！」我沒好氣地說。

「佢女友，呀唔係，前女友先岩，話佢周圍食女，重『多人運動』添呀！」

「咁刺激？」偽人界這些事其實應該不罕見吧？只是有沒有浮到水面上來罷了。

「你又想呀？」女友又警察上身。

「冇啲咁既事！一對一開心啲！」還要勉強把食物都推到左邊，鼓起了臉頰也要擠個笑容出來，這個氣氛還是小心為上，警察做事沒有底的。

「重話佢去到邊到都有女食，但仍然三更半夜同女友講晚安，真係唔知佢點解可以唔洗訓！」

「係囉！我都想好似佢咁唔洗訓！」疫情下，工作量有增無減，最近又的確是身心疲憊。

「係囉！你成日話忙，成日都OT又唔夠訓。」成功！成功！成功轉移話題！

「但我真係好鍾意訓，尤其同我女人訓！」黔驢技窮，其實我也只有這一招看家本領。來！再扯遠一點！

「咁其實會唔會你話OT既時候都係去左食女？」Orz……放過我好嗎？

「點會呢？」

「羅志祥一直同佢女友講要互相信任，所以佢女友一直冇check佢手機，我記得你都講過同一番說話！」

可恨的羅志祥，可恨的偽人們！為什麼你們總要令到我如此難堪？你們偷食不能再小心點嗎？

「電！話！」

「咩？」我還沒回過神來，口裡的豬肉也被我狠狠地啃得失神。

「拎！部！電！話！出！黎！」我只好乖乖地再次繳械。

「做咩冇左Face ID換左用密碼！係咪唔想俾我開到！」

「咪講左廢事俾狗查囉，用Face ID好危險架，雖則俾佢地打完Face ID都未必認到我個樣。密碼係我地紀念日呀，日月年。」我也是累了。

女警，不，女友仔細的翻查電話內的短訊、相片。

「呢個係邊個！做咩佢會翹住你影相！」女友聲音越來越大，幸好有限聚令，只有半間餐廳的食客看著我們。

「咁有啲女仔係晚宴到係會翹住男仔既手影相架啦，唔好諗咁多啦。」下班後頭已經有點痛，實在沒心情去處理這樣的無理取鬧。

「你講大話！又唔見我會咁樣翹住人地影相！」女友把電話丟向我，但眼界不好沒有中，幸好還是限聚令，後面那枱沒有人，我就跑去拾回電話。

「分手啦！」女友卻在此時拋下一句，頭也不回地跑了。

我看著她飛快的背影，半間餐廳的食客看著我無奈的臉。

我坐下來，繼續吃那碗泡菜豬肉石頭鍋飯，繼續狠狠地啃那些豬肉。