Chng-kha v.s. Chháu-tē

Chăng tha̍k bûn-chiuⁿ tha̍k tio̍h chi̍t kù "chng-kha chháu-tē só͘-chāi", góa sim-lāi chi̍t-ê gî-būn: "chng-kha" kap "chháu-tē" kám m̄ sī kāng ì-sù? Ūi-siáⁿ-mih beh kóng nn̄g pái?

Kin-á-ji̍t tńg-khì chhù--nih, tú-hó gún pâ kap a-má lóng tī chhù, góa tō thàn ki-hōe mn̄g in. Tú khai-sí in mā kóng chit nn̄g ê sû kāng ì-sù. M̄-koh gún pâ siūⁿ--tah-kú-á koh pó͘-chhiong: chng-kha sī khah tiong-sèng ê sû, chng-kha ū "hó só͘-chāi", mā ū "chháu-tē só͘-chāi", chháu-tē tō khah ū pí-kàu, ún-hâm "hó", "bái" phoe-phêng (sīm-chì sī kî-sī?) ê ì-hâm, piáu-sī-kóng chit-ê só͘-chāi khah bô hiah chìn-pō͘, bô hiah hoân-hôa, ū khah sông.

Góa koh tńg-khì tha̍k hit-phiⁿ bûn-chiuⁿ, khak-si̍t chok-chiá ū siūⁿ-beh kiông-tiāu hit ê pí-kàu ê kám-kak. Koh siūⁿ-tio̍h gún pâ in tiāⁿ-tiāⁿ kah chi̍t-kóa hó-pêng-iú teh kún-sńg-chhiò kóng "lí sī chháu-tē chhin-chiâⁿ, chia̍h-pá tō beh kiâⁿ", mā ū hit chióng kā lâng chhiò ê khì-bī.

Chng-kha, chháu-tē, kāng ì-sù bô kāng khì-bī, beh thang hun ē chhut-lâi, che ŭaⁿ sī gí-kám ê koân-kē ah~

*Āu-kì: Hit-kang e-po͘ góa chái a-má khì bé kóe-chí, sīn-sòa sì-kè se̍h-se̍h--leh. Beh óa O͘-khe Tōa-kiô hiah, ū chiok chē sió-lō͘, nn̄g-pêng lóng chèng tiū-á kap kóe-chí-chhiū, kui tōa-phìⁿ ê chhân-hn̂g. A-má ká-ná siūⁿ-tio̍h thâu-tú-chiah ê ōe-tê, kóng: "Che tō sī chháu-tē lah."

Góa teh siūⁿ, kap "chng-kha" sio-pí, chháu-tē khó-lêng ke ū "lông-chhoan" ê ì-sù, tō sī kóng tī hiah ê lâng chú-iàu sī chò-chhân-lâng. In-ūi ū lâng ê in-sò͘, ka-siong í-chá siā-hōe tùi chò-chhân-lâng ê khî-sī, "chháu-tē" chiah ē ū a-pâ kóng ê hit-ê kî-sī ê khì-bī tī--leh.

M̄-koh, chit-má siā-hōe hong-khì bān-bān-á kái-piàn, chò lông-gia̍p í-keng m̄-sī "sông" kap "bô-tì-sek" ê hêng-siōng, só͘-í "chháu-tē" ê iōng-hoat khó-lêng mā ē kái-piàn, kám m̄-sī? Hi-bāng "chháu-tē" ē piàn-chó chi̍t-ê tāi-piáu súi, un-loán, chhin-chhiat, choan-gia̍p, hó-gia̍h ê bêng-sû!! :)