［性別講看覓］—勥跤

khiàng-kha

我是誠慢，大漢了後才聽著這个詞。一个人誠𠢕是真好的代誌，毋過若是查某人，伊若「傷」𠢕，就變作予人剾洗，是無好的代誌。我想無彼是啥物意思？哪會有這號講法？

近來想著的講法，我臆的是：有一寡查某人真𠢕是天生的，另外一寡人是予人佮環境逼的，伊愛誠𠢕才活會落去。伊若傷𠢕，表示伊身軀邊彼个查埔人無遐爾𠢕，一寡責任予查某人佇擔，對查埔人來講，是袂堪得的代誌，所以就用攻擊、剾洗查某人傷𠢕是無好的代誌來顧家己的面子。天下間有這種代誌，拄著查埔查某無仝性別做的仝款的代誌，這款莫名其妙的講法就發（puh）出來，毋免動頭殼想一下，嘛誠紲喙。

毋但查埔人按呢講，連其他的查某人嘛綴著講。

這佮查某人生做媠是好代誌，毋過那傷媠，就予人講是「禍水」的意思差不多。查某人不管是媠抑是𠢕，攏愛拄拄好就好，袂使傷媠、傷𠢕。毋捌聽過查某人傷𠢕、傷緣投有啥物䆀的講法。

無意中看著這句：

「斷掌查埔做相公，斷掌查某守空房。」

釋義：斷掌的男子可以做大官，斷掌的女子會獨守空房。意為男子斷掌則個性比較果斷，所以適合當官；女子斷掌是剋夫命，會守寡。「斷掌」是指手掌有一條橫向貫穿手掌的掌紋，按命相言，斷掌者乃有決斷力、能幹之人，這種舊思維是以往命相師的無稽之談，不宜輕信。

Polina Kuzovkova on Unsplash