一、納指（NASDAQ）尋晚已經升到10500點，原來2008年大約1500點，剛好升咗6倍，特此紀錄一下。
二、點解納指會升到咁？首要原因一定係QE，基本上08年打後好多優質資產（美股、港樓、黃金、美債）都係升升升。價值係相對嘅，如果各類資產都大升，可能只係銀紙大跌緊，令到資產用現金計價（denominated in cash）時相對上升。即係，如果有一日你發覺日圓、澳元、英鎊、人仔同時貴左，可能只係港紙跌緊。揸日圓去兌換澳元可能無升無跌。
三、但，點解QQQ升得勁過SPY(升咗3倍)同#2800.HK（升得50%）咁多？我用例子答你。FAANG入面嘅N（Netflix），本身只係一間美國土炮實體DVD租碟鋪，07年先開始搞串流影視；10年先第一次衝出美國（去加拿大）；13年自己原創拍左第一季《紙牌屋》（House of Cards）攞晒獎項，同年納入埋NASDAQ成份股；今年，全球190個國家1.83億人俾月費subscribe緊。
四、香港得兩間電視台－tvb同viutv，但兩間近年都年年蝕錢。非正式統計，依加10個朋友8個都有睇，食飯都會傾下Netflix節目，反而無乜人睇本地電視台。但，Netflix服務埋香港（甚至台灣）個邊際成本好低，唔需要投資起個電視城、請演員拍港劇，只需要租多D server，將原本D片譯做繁中字幕，拍／收購多D亞洲片for成個亞洲，搞掂。而且，佢賺全球1.8億觀眾嘅錢，財雄勢大，通常拍出來/ 收購返嚟D片都高質過本地電視台。
五、科技公司，威力在於喺全球化之下一嘢就可以食晒人地本地傳統行業建立多年嘅market share，而且邊際成本（marginal cost）極低。以上Netflix個case就係全球化之下好多科技公司嘅縮影。
六、又睇下Apple，07年先出第一代iPhone（就咁叫iPhone），09年中先推出劃時代嘅iPhone 3GS（記得小弟當時仲用緊下圖呢部Nokia手機… 第一次見人用iPhone 3GS係驚為天人），之後好快就食晒傳統手機巨頭（仲有冇人記得Nokia、Sony Ericsson同Motorola）嘅market share，演變成今日Apple、Samsung、華為三分天下嘅局面。但唔同嘅係，只有APPL可以喺iOS、MacOS同Apple Pay度賺錢，其他牌子呢條水都要俾Android（即係Google）食。今日，APPL已經成為NASDAQ龍頭股（佔比>12%）
七、Facebook，04年只係一個哈佛大學學生社交網，06年先開始公開註冊，12年先IPO，同年納入納指。今日，每月活躍用戶（即係一個月最少上一次）已經去到26億人（全球人口77億，上網人口46億，即係會上網嘅過半都會上FB）。回頭一睇，FB依加係NASDAQ第4大成份股（佔比>4%），但原來08年連市都未上。
八、Amazon本身係一間網上書店，94年開張，97年IPO，98年開始賣音樂同影片，之後愈做愈多，賣埋電子遊戲、電子產品、家品、軟件、玩具etc。06年開始搞埋亞馬遜物流（Fulfillment by Amazon）， 12年做埋庫存管理自動化，17年收購埋Whole Foods Market連鎖超市。18年Amazon Prime（兩日送貨）全球超過1億用戶。今日，Amazon係全球收入最高嘅互聯網公司，Jeff Bezos係全球首富。
九、Google 98年先開張（當時仲係早3年開嘅Yahoo嘅天下），04年先IPO。Google投資搞好多業務，唔係樣樣賺錢，最賺錢始終都係廣告－單靠Google Ads 2019年賺US$1620億。
十、NASDAQ 3月後V型急彈，衝破疫情前高位（SPY仲未）。個人認為合理，因為疫情之下，實體經濟幾時真正恢復都係未知之數，但科技股就肯定受益。學Cathie Wood話齋，疫情迫咗許多公司下定決心革新，令採用創新科技的進程突然由幾年壓縮到幾個月。馬雲尋日亦話，疫情迫使人類創新料數字技術加快至10至20年完成。
十一、如果短線回調一D都唔出奇（其實技術分析上，間中有小型回調，升勢仲健康）。但，無限QE之下，NASDAQ長遠會點走？相信08年打後已經示範過一次。
十二、有人質疑FAANG已經太大隻，增長只會減慢。指數有汰弱留強機制，成份股係會隨時勢改變，後浪推前浪，睇下以下2000年、2008年同依加嘅NASDAQ top 10成份股，十年人事幾翻新。比起金融、能源、房地產呢D傳統行業版塊，科技版塊嘅新陳代謝係特別快，死氣沉沉嘅公司好快自然淘汰。
十三、個人認為，一係自己研究美股科技股，搵出下一隻阿里巴巴；一係就買QQQ呢種汰弱留強嘅被動型ETF；或者相信科技女股神Cathie Wood眼光，買佢旗下嘅主動型科技ETF(ARKW、ARKK、ARKF、ARKG、ARKQ)。
十四、Btw，香港W股同排緊隊返香港上市個堆中資科技美股，個人繼續透過美股ETF KWEB間接持有未賣，但理由同上面有D唔同，主要係因為準備納入恒指成份股，即係有強積金同被動型基金幾貴都要接貨。
