【香港隊疫情下添花劍教練　意籍教頭大有來頭】

香港花劍隊自法國教練Greg來港後，成績比以前更加突出。大師兄張小倫早前IG上載一個Stories加上一句「Welcome to HK」，撳入去tag個帳戶就會知道，小倫身邊呢位外國人叫Maurizio Zomparelli，自我介紹就知道佢係一名劍擊教練。

早前香港劍總同體院都有張貼招聘廣告，聘請助理劍擊教練，睇嚟Maurizio Zomparelli就係新請嘅教練，雖然未有任何官方確認，但留意小倫下一個Stories，入面一句「運動員練完到教練練」都略知一二，片中佢同Greg仲一齊做Gym舉鐵。

來自意大利嘅Maurizio，佢IG Bio加埋「2020 HK Olympic Foil Team」，呢個同官宣都無咩分別。睇Maurizio個IG都知佢猛料，事關佢Bio上面已經清楚列明自己嘅CV，由2005年開始執起教鞭，曾經教過意大利同俄羅斯花劍隊，2017年轉到美國發展，喺洛杉磯嘅《United Fencing Academy》執教，旗下劍手有名將Race Imboden。

教過國家隊都濕碎，Maurizio教呢兩支國家隊期間，曾為意、俄奪得9面奧運獎牌，其中5面更加係金色，名符其實嘅冠軍教練。Maurizio教意大利同俄羅斯期間，都係與名帥Stefano Cerioni合作，當時Maurizio擔任體能教練，提升劍手表現，Marurizio登陸香港後，都好期待港隊劍手同呢位冠軍教練合作有咩化學作用。