［性別講看覓］—「我是查某囝，本來無我的代誌」

誠濟年前，外媽過身，阮想著阿妗佇上班，有人建議阿媽的孫這沿的，逐家排班，輪流去阿舅兜鬥相共。

有一工，我拄著表妹，阿舅的第二个查某囝，伊講：「阮是幫忙的。我是查某囝，本來無我的代誌，是因為小弟猶細漢。」啥物？話是按呢講的？阿媽過身了後，無伊的代誌？我一句話攏無應。

彼个表妹結婚了後，in蹛的厝是阿舅阿妗進前買的，離阿舅兜行路會到。伊有囡仔了後，逐工下班了後，去奶母兜接囡仔，２个翁仔某攏轉去阿舅兜食暗頓。阿妗嘛佇上班，下班了後，愛趕緊趕轉去煮飯。

飯食完，伊２翁仔某坐佇客廳的膨椅看電視，無管囡仔，予囡仔佇厝內蟯蟯趖，𬦰來𬦰去，阿妗共碗箸洗好，袂放心，就去顧囡仔。

有一擺，我𤆬我的３个囡仔去看阿妗，嘛予阿妗看我的第三个囡仔。伊留我食暗頓，講：「你轉去就毋免閣煮。」阿妗講著伊叫表妹規家伙仔逐工轉來食暗：「看in逐頓攏佇外口食……」

阿妗煮飯的時，表妹共我講：「阮媽媽講，轉來同齊食飯較鬥熱。」喔！敢講伊轉來食飯是佇共伊老母鬥相共的代誌，予伊老母兜食飯較鬥熱？彼是阿妗毋甘in逐工食外口，叫in來食飯揣的理由啦！表妹是真正毋知，抑是假戇？

表妹是查某囝，阿妗阿舅予伊的資源，為伊做的攏是應該的，攏總收收落來。拄著阿媽的喪禮，伊做的是「鬥相共」，「本來無我的代誌」有這款的人？我聽著規身軀起雞母皮。

猶閣有，我老母講，佇寫訃音的時陣，表妹伊誠無歡喜，講：「阮爸爸是查埔的，應該寫頭前。」我媽媽上大漢，閣來是阿姨，in爸爸是第三的，初稿毋知是啥人寫的？按怎寫？我毋知影，我老母共伊講：「這毋是欲領獎，寫頭前，抑是後面，有啥物關係？」

拄著伊的老爸是查埔，伊就知影要寫頭前，較重要；伊是查某囝，外家有代誌「本來」攏毋免做，誠巧矣！伊無想著的是伊逐工攏轉來老母兜食飯，敢講in毋是「實在的」一家人？

𝔥𝔦𝔩𝔩𝔞𝔯𝔶 𝔭𝔢𝔯𝔞𝔩𝔱𝔞 on Unsplash