頂個月（1/9）看著我的大漢小弟line：「屘姑仔往生了。」
阮叫伊「屘姑仔」，是阮阿媽上細漢的查某囝，自小漢予阿媽的妹妹，阮的姨婆做查某囝。阿媽生４个查埔，４个查某囝。
我這幾仔年想著，當初阿媽是佇想啥物？共家己的查某囝予無翁婿，閣愛拜３个姓，抱３个查某囡仔來姓３个姓的妹妹。雖然家己的厝內嘛散赤，上無也有翁婿，有囝。
姨婆的養查某囝大漢了後，大查某囝的翁婿是招的，生的囡仔就會使有的姓老母的姓。毋過，彼个囝婿去報戶口的時，逐擺攏共囡仔姓家己的姓，大查某囝就一直生。姨婆到誠老的時抑佇煩惱這件代誌，驚彼的姓後擺無人拜。
古早的人，為著拜祖先的代誌守寡一世人，艱苦一世人，犠牲家己的幸福，我想起來心內感覺足艱苦。
屘姑仔真𠢕（上敖下力）讀冊，成績誠好，小學畢業的時陣，伊的老師欲出錢，予伊讀初中，姨婆講：「莫欠人的人情。」叫屘姑仔去食頭路，趁錢。
姨婆年老了後，佮屘姑仔蹛，厝內也有姑丈的老母，佮姑丈的阿兄，阿兄小學畢業就精神不正常，一世人攏蹛佇厝內，姨婆講in的肩胛頭的擔真重。
講到墓仔的代誌，屘姑仔講：「干焦阮兩个。」２邊的祖先，不管培墓、揀骨、拜拜，較遠的深山林內嘛愛去。
（2024.2.25.）
