【開講讀者投稿】：杜聿鎧〈歹勢〉〈Pháiⁿ-sè〉

阮感覺誠歹勢 恬恬仔沒法度放過
Gún kám-kak chiân pháin-sè. Tiām-tiām-á bô hoat-tō͘ pàng-kòe.

時間總是按呢 慢慢仔越看越淡个
Sî-kan chóng-sī án-ne. Bān-bān-á lú khòan lú tān ê.

雲會飛 雨會𤲍
Hûn ē poe. Hō͘ ē kheh.

別人个面頭前 𪜶敢袂講話
Pa̍t-lâng ê bīn-thâu-chêng. In kám-bōe kong-ōe.



目睭若是驚水 風嘛應該愛驚冷
Ba̍k-chiu nā-sī kian-chúi. Hong mā eng-kai ài kiaⁿ-léng.

為啥物 車班一定愛叫著阮
Ūi-sián-mih. Chhia-pan it-tēng ài kiò-tio̍ h gún.

沓沓仔沓沓仔踅 因為海猶是會寂寞个
Ta̍ uh-ta̍ uh-á ta̍ uh-ta̍ uh-á se̍ h. In-ūi hái iá-sī ē siok-bo̍ k ê.

夜車來看阮 時間定定佇遐
Iā-chhia lâi khòan gún. Sî-kan tiān-tiān tī hia.

你敢袂按呢 敢袂按呢咧想
lí kám-bōe án-ne. kám-bōe án-ne siún.



親像薰頭仔 敢有法度放落
Chin-chhiūn hun-thâu-á. Kám-ū hoat-tō͘ pàng-lo̍h.

寬闊世界 若毋是你所想个
Khoaⁿ-khoah sè-kài. Nā-m̄-sī lí só͘-siūn-ê.

愛按怎對阮來講 阮想記憶是毋是你
Ài án-chóan tùi gún lâi kóng. Gún siūn kì-ek sī-m̄-sī lí.

心愛个是毋是阮 提著沉重个光
Sim-ài ê sī-m̄-sī gún. The̍ h-tio̍ h tîm-tāng ê kng.

這時是毋是應該 得欲感覺歹勢
Chit-sî sī-m̄-sī eng-kai. Tit-beh kám-kak pháiⁿ-sè.

用阮所有个一切 看海閃爍
Iōng gún só͘-ū-ê it-chhè. Khòan hái siám-sih

彼幾冬个暗暝
Hit kúi-tang ê àm-mî.

你是毋是愛阮 愛阮向望所無个
lí sī-m̄-sī ài gún. Ài gún ǹg-bāng só͘-bô-ê.

今仔日所無个彼時 海光親像天星
Kin-á-ji̍t só͘-bô-ê hit-sî. Hái kng chin-chhiūn thin-chhin.

敢若咧落雨 干焦落雨
Kán-ná leh lo̍ h-hō͘. Kan-nā lo̍ h-hō͘.

阮想佇遮 想無上遠个一个所在
Gún siūn tī chia. Siūn bô siōng-hn̄g ê chi̍t-ê só͘-chai.

雄雄仔 想欲講个
Hiông-hiông-á. Siūn-beh-kóng-ê.

永遠攏有捌个 無講个字
Éng-oán long-ú pa̍ t—ê. Bô-kóng-ê jī.

親像彼陣魚 所無講過个天光
Chin-chhiūn hit-tīn hî. Só͘-bô-kóng-kòe ê thin-kng.

薰頭前漸漸暗淡个你
Hun-thâu chêng chiām-chiām àm-tām ê lí.

免歹勢 彼嘛袂要緊
Bián-phái-sè. He mā bōe-iàu-kín.

阮擱去 Seven 買 你就愛等
Gún koh khì Seven bé. Lí tio̍ h ài tán.

這一生 一支薰个時
Che-it-sin. Chi̍t-ki-hun ê sî.

【寫流成河】為刊登讀者投稿的專門欄位。作為本期《開講Khai-káng》的壓軸系列，為的就是鼓勵台文系學生嘗試寫作——我們認為，持續書寫不僅能夠精鍊筆鋒，更是梳理思維與觀點的必要途徑。 《開講 Khai-káng》期許你我在這條思想與對話的長河中，能透過文字留下清晰可見的刻痕，讓河的路徑不只是靜靜流過，而有粼粼波光。

【寫流成河】是專門刊登讀者投稿ê欄位。這个專區成做每期《開講 Khai-káng》ê煞尾，是為著鼓勵台文系ê學生來寫作——阮認為，不斷ê書寫m̄-nā會當磨練文筆，koh是整理思維kah觀點ê必要途徑。 《開講 Khai-káng》期待大家tī這條思考kah對話ê溪流內底，會當用文字刻下一痕koh一痕ê記錄，予溪水毋若是恬恬leh流落去，koh閃爍著淡薄波光。