實在真想你

頂站仔載一個少年仔去高雄允頭路。伊欲應徵彼間辦公室佇漁港路路尾。著，就是落高速了後愛閣超過六十五號碼頭貨櫃中心足遠矣才會到，已經咧欲看到海邊仔矣。到位个時陣猶未中晝，想講欲共伊斡入去草衙街仔，𤆬少年仔去食你較早攏𤆬我去食彼擔虱目魚糜。試看覓食予飽飽，食了好食个物件，會當予伊袂遐爾緊張，等咧面試个時才會較四序。

毋過人少年仔想个佮咱想个實在無仝款，咱拄才揣著辦公室佇佗位，伊就カバン捾便拜託我予伊落車，講伊無愛食中晝頓，欲先入去辦公室準備面試矣。看伊是有小可仔緊張，毋過真自信个表情，應該無問題，只好放心予伊落車入去拚。無毋著，少年仔就是恁大漢查某孫美雯啦，佇熱人彼站仔，已經大學畢業矣。畢業進前有去拚高考，毋過無著。共伊問講有欲拚研究所無，講伊欲先食頭路才閣打算。

這聲美雯入去考試，我只好家己去揣虱目魚糜來食。想袂到斡入去草衙街仔踅規晡，較揣就揣無彼擔虱目魚糜。原來幾若年前人就歇睏無做矣。腹肚真枵，只好凊彩揣一間來止枵。斡來斡去猶閣是去貨櫃中心口仔對面彼攤咱也定定去食的滷肉飯報到。拄才點菜點好，看著正對貨櫃中心門口彼位當在等我坐落去。等人送飯來个時陣，看到基隆來的拖車乒乒乓乓，若親像煩惱趕袂著碼頭歇晝，就愛鎖在港內袂當交櫃，也袂當食晝，時間就了去矣。

看怹趕緊出出入入、起起落落，連鞭跳落車交資料隨閣爬上車共車徙進前攄退後，抑是バック入去櫃仔縫，抑無就是共櫃仔搝去船邊等吊櫃上船。交櫃、領櫃，遐的攏是我曾經遐爾熟手个工課路仔。就想到彼幾年，你定定叫我禮拜莫歇睏，佮你做伙去公司，你正班，我代班，講咱兩個爸仔囝一對手做伙趁，也較有伴。兩隻拖車領了兩粒攏二、三十噸个重櫃，透瞑對基隆前後相綴拖落南，透早準時到高雄港六十五號碼頭交櫃仔，予我趁了袂少外路仔，猶閣有真好食的虱目魚糜做早頓通食。有當時若佮彼工仝款，什麼代誌攏猶未做，抑是傷慢到位，碼頭機械閣愛擋到下晡才有作業，彼工就愛擋瞑上北，足吃力矣。毋知是腹肚枵，抑是拖車車聲乒乒乓乓，塗沙粉坱埃，目屎忽然間就輾落來矣。

おじさん，一目𥍉仔，已經七冬矣。七冬經過，恁大漢孫美雯已經大學畢業，開始欲食頭路矣。我猶閣是想袂透，咱兜到底出了什麼問題，竟然規家伙仔六口灶，一人蹛一位，互相沒來去。

おじさん，一目𥍉仔，已經七冬矣。七冬經過，你也已經欲八十歲矣，雖罔看起來猶未影響到健康。你猶閣是家己煮家己食。我猶閣是想袂透，咱兜到底出了什麼問題。

おじさん，一目𥍉仔，已經七冬矣。七冬經過，你也共那隻阮牽予你使用免驚，閣一直共你開錢个老車報廢擲捒。講阮攏無體諒，予你無錢通好飼車，我猶閣是想袂透，咱兜到底出了什麼問題。

昨昏暗共下班買好的菜捾去予我彼个可憐个老母仔，順紲共伊做伙煮食攢晚頓。無錯，對伊離開到今，伊抑家己煮家己食七冬矣。精差伊有我加減共伊鬥攢生活用品，抑無伊彼個予你操甲強欲曲痀个身軀，早就無法度好勢行徙矣。

暗頓哪食哪講，我共伊講出我對你的思念。講有一工我忽然發現，阮老歲仔已經八十歲矣，猶閣家己一个，實在有一寡放袂落心，想欲轉去共伊看看矣，想看有辦法共這個必痕修補起來，予兩個老歲仔加食幾年矣。阮這個從來毋捌講歹話个老母仔，竟然面色變變共我講：「想罔想，你是毋通真的走轉去共伊看！你若共他弄起來，伊閣開始共恁兄弟仔找麻煩，你會予恁兄弟仔怨嘆一世人！無人會閣插你矣。毋通喔！」

おじさん，一目𥍉仔，已經七冬矣。七冬經過，我猶閣是想袂透，咱兜到底出了什麼問題。

おじさん，實在真想你。