我一禮拜轉去一擺的房間，逐擺開門，就有一隻虼蚻佇塗跤行，我入去，伊嘛無趕緊走，繼續行來行去。我坐佇桌仔頭前的椅仔頂的時，伊會爬［足百］起來我的跤盤，氣死我，大力頓跤，伊嘛慢慢仔行，一點仔攏無驚惶。
曷無，伊就佇桌頂，伊準做干焦伊一个，沓沓仔散步，我共物仔囥佇桌頂，伊一點仔反應嘛無，我拍桌仔頂，伊仝款，拍真大力，伊才行去邊仔。昨日，半工了後，啥？我看伊覆佇２個物仔的中央，有烏影的所在，伊掠做無人看會著，哈！
猶有放屎的代誌，伊的屎有２種，細粒仔黑黑的，另外一種是黏佇桌上的，嘛是黑仔，愛用澹桌布去拭，才會清氣。
黏黏彼種屎，毋但放佇桌上，我的簿仔紙、書頂嘛放過，有一擺，我囥佇椅墊仔頂懸的衫，佮床巾頂懸嘛黏著屎，予人受氣，後擺開始，衫愛吊起來，袂使囥平平，眠床頂愛用被仔崁好。
我共囝仔講，後生講伊有虼蚻藥仔，叫我去提來囥佇壁角，我無欲共伊毒死啦！
我看過一篇文章，作者講伊有一陣仔蹛２个所在，伊逐擺拖行李箱仔開門入去，塗跤的蟲仔攏佇沓沓仔行，愛半天了後，蟲仔才會覕起來，伊講：「厝嘛會稀微，彼仔蟲仔佇替我佮厝做伴。」是喔？有這个講法，我想嘛有道理。
虼蚻蹛佇我的房間，我無佇咧的時陣，共我鬥相共顧厝，佮伊平安鬥陣就好。
寫完才想著，屎有２種，敢講虼蚻毋但一隻？
（2023.10.25.）
（請指教！）
