亂讀新聞(二十一)

亂讀新聞(二十一)

2024年3月1至5日

1. 開始之前，都係例牌頭盔架喇，英國新聞我係自己譯，所有正確既報導以原文為準啊吓。(今次都係懶到直接copy and paste之前果句，哈哈。)

2. 3月1日星期五，俄羅斯反對派領袖Alexei Navalny拿華利響莫斯科，佢同佢既屋企人都住咗好耐既地區Maryino舉行葬禮，雖然有大批重裝備既俄羅斯警察stand by同埋天氣寒冷，但成千計既民眾依然出席咗拿華利既喪禮，佢哋高聲大叫口號例如「唔要戰爭」、「俄羅斯唔要普京」、「俄羅斯會自由」等等之前有人講完之後比人拉既口號都冇事，班警察並冇出手干預。(BBC)

3. 呢次係自從2021年拿華利被捕以黎，最大既一次反對政府既集會。曾經拿華利都能夠舉辦到同埋號召到好多人去參加呢類型既集會，但自從佢入獄之後，就未試過嘞。好多人都表示，呢次分分鐘就係響可見既將來，最後一次可以反對政府既集會，冇咗拿華利，之後都唔知仲會唔會有人搞呢類集會。或者係因為咁，所以佢哋先會冒住比人拉既危險，都要走出黎參加今次既集會喇。(BBC)

4. 不斷輪迴又輪迴無限loop既支持巴勒斯坦集會又響星期六英國唔同地方上演，今次係響英國首相辛偉誠話呢啲咁樣既遊行係可能被激進份子黎利用，佢又話2023年反猶太人既事件有成超過4,000宗，比起2022年上升147%，所以都會增加保安上既費用去保護猶太學校同埋猶太教堂。(Skynews)

5. 跟住果個倫敦市長，比Lee Anderson話比伊斯蘭份子控制住既Sadiq Khan點講？佢就話有啲政客，鍾意用把口玩語言藝術去分化啲少數族裔，去取得一啲政治上既利益。(Skynews)

6. 記得之前同個白人同事講過，佢開玩笑咁話英國係一個最容忍少數族裔、政治正確既國家，睇下我哋搵咗個印度佬做首相就知。當然佢係講笑咁同我私底下講，如果佢公開咁響公眾場合講，都唔知會唔會比啲英國左膠處決。不過咁都講出一個觀點，就係Sadiq Khan本身都係一個少數族裔，如果佢口中講既係真既，其實佢而家咪做緊同一樣嘢？況且啲支持巴勒斯坦既遊行響英國尤其係倫敦惡晒係事實，新聞都睇唔少，更加唔好提話Suella Braverman單嘢。

7. 係咪覺得上面兩條新聞係上個禮拜舊舊地呢？咁係因為其實我上個星期尾已經寫緊呢篇文，不過太忙所以出唔切，又唔想打完之後唔用，咁咪照po出黎囉，咁我既專欄系列叫擺到明叫不專業吖嘛，哈哈。

8. 前總統特朗普上年比科羅拉多州法院禁止參加黨內初選，因為佢哋引用憲法第修正案話侵侵牽涉2021年1月國會山莊騷亂，所以唔可以參選果個州既初選。共和黨人上訴，尋日星期一美國最高法院就推翻咗科州法院既判決，即係話侵侵係可以恢復返初選資格。(BBC)

9. 呢個對侵侵黎講可以話係一個好重要既裁決，而且其他有類似裁決既州份，如無意外都應該適用。如無意外，睇埋一路以黎既走勢，侵侵都好大機會代表共和黨出選美國總統大選。(BBC)

10. BBC中文就住香港人支唔支持23條立法進行街訪，但絕大部份既人都唔敢答，獨媒就住呢件事去問反駁隊隊長鄧炳強，佢就話唔評論喎，仲話好多人走埋去同佢講好支持23條立法添。(獨媒)

11. 老老豆豆吖，其實發生緊咩事，反駁隊隊長都應該心知肚明，其實佢自己都唔會信自己講既嘢喇，係咪？23條未出爐，大家都已經唔敢就住呢條政治敏感既議題提出意見，我相信日後既日子，大家只會更驚青。

#不專業專欄 #亂讀新聞 #英國新聞 #香港新聞 #專欄 #時事 #時事專欄

#skynews #BBC #獨媒 #獨立媒體 #拿華利 #巴勒斯坦 #左膠 #特朗普

#川普 #侵侵 #美國大選 #反駁隊 #廿三條

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938