亂讀新聞(二十七)
亂讀新聞(二十七)
2024年3月20日
1. 開始之前，都係例牌頭盔架喇，英國新聞我係自己譯，所有正確既報導以原文為準啊吓。(今次都係懶到直接copy and paste之前果句，哈哈。)
2. 今日BBC既網頁頭條係有關美國響聯合國提出響加沙既停火協議被中國同埋俄羅斯反對無法通過。(BBC)
3. 據BBC所報道，美國呢次既停火草案係同要求哈馬斯釋放人質捆綁埋，而呢個正正係我響之前提過既觀點︰如果要停火既話，就應該要係哈馬斯放走晒佢手上面既人質先，明明係你哋屠殺平民再捉走生還者做人質，然後引咗個以色列呢個癲佬入加沙要搵返啲人質順便要剷除你班恐怖份子，佢哋係不惜一切代價，就算啲攻擊會牽連埋平民都唔驚，咁你想自己啲平民唔好受到任何傷既，你第一時間就唔該你放返晒啲人質走先喇，放完釋出善意係第一步，如果你放咗人質佢哋仲不斷攻擊加沙既，到時國際既壓力一定會好大。(BBC)
4. 而家哈馬斯咁樣死鬥落去，我睇唔出以色列會停手。佢哋唔同烏克蘭，佢哋唔需要借助外來既力量，本身既軍事力量已經夠強去剷平加沙，況且你哋先撩者賤之餘，仲有咁多人質響手，佢哋有晒正當既理由去攻擊加沙，哈馬斯再撐落去，純粹係準備攬住啲平民同埋以色列人質一鑊熟。
5. 都係果句，啲歷史問題唔會因為你而家攬住啲人質而解決，以色列擺出個咁強硬既態度，哈馬斯如果真係為平民著想既，就放咗啲人質先，到時以色列冇正當理由去攻打加沙，以美國為首既盟友自然好大機會向佢哋施加極大既壓力。
6. 至於俄羅斯同中國就算罷喇，佢哋一路都唔肯對哈馬斯既行為有任何既讉責，以佢哋而家響國際既形勢，分分鐘隨時真係想拉攏哈馬斯做佢哋盟友...
7. 寫寫下呢度突然收到突發消息，威爾斯王妃凱蒂王妃公開片段，話自己做完腹部手術之後驗出癌細胞，患咗癌症，接受緊早期既治療…白金漢宮聲明指佢哋好有信心，凱蒂王妃係可以完全康復。(BBC)
8. 真係好shocked，唔怪得之凱蒂王妃之前幾個月音訊全無喇，難為某啲英國傳媒仲係咁炒作佢既新聞，一時又離婚、一時又話佢P圖…不過like it or not，響英國，皇室永遠都係一個好有新聞價值既話題。
9. 英皇查理斯三世又係咁，凱蒂王妃又係咁，最後祝願佢哋可以早日完完全全咁康復喇。
10. 至於香港…行政長官李家超已經簽署刊憲廿三條…而家出文既呢個時間，應該就已經響香港生效咗…祝仲響香港既大家一切安好…
更多唔同既專欄內容︰https://www.leafopenleafopen.com/unprofessional9up
#不專業專欄 #亂讀新聞 #英國新聞 #香港新聞 #專欄 #時事 #時事專欄
#skynews #以哈戰爭 #哈馬斯 #加沙 #停戰 #以色列 #美國 #聯合國 #俄羅斯 #中國
#威爾斯王妃 #凱蒂王妃 #患癌 #廿三條立法
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
