不專業足球筆記（十三）

不專業足球筆記（十三）

1. 今期第一句首先要恭喜香港U23先，佢哋響球隊成立咗既第三個球季，終於響港超聯取得首勝。佢哋憑住林學曦既入球同晉峰梅田小太郎既烏龍球，以二比一小勝同樣係下游份子既晉峰。

2. 呢場唔係香港U23既歷史勝仗，因為其實佢哋響2021年10月17日既時候響菁英盃以二比一贏港會果場先係佢哋既歷史首勝。但講到真係正式聯賽，就要等多兩年半，先至響啱啱既2024年4月7日開齋。之前對深水埗其實都爭少少開架喇，不過響領先兩球之下比對方逼和，果陣香港U23教練司徒文俊仲話嬲到想講粗口添。而家終於贏波喇，唔駛講粗口喇？

3. 作為港超四支下游球隊其中之一，晉峰響1月同河赫俊因為成績欠佳同埋何俊賢話同哈sir理念唔啱而分手之後，不論聯賽定盃賽都冇贏過，聯賽更加係輸晒，今次面對理應係全個港超聯入面牌面最弱既香港U23，響出盡五個外援既情形之下，竟然都係不敵對手，呢次都真係幾大鑊。睇返賽程，佢哋如果真係想擺脫包尾呢個咁尷尬既排名，5月5號對住同級對手深手埗係最重要既一仗。

4. 頹既當然唔止晉峰，但今次講既就唔係下游份子，而係季前被視為港超黑馬之中既標準流浪。今次講既並唔係佢哋場上比賽既表現，而係響聯賽以一比四不敵大埔之後，佢哋總監李輝立既一席話。我直接copy and paste香港01訪問立立既文字出黎，咁樣原汁原味多啲。

5. "流浪總監李輝立賽後透露，球隊因信任日籍球員神田夢實，且隊中如林堂真、上形洋介等日援均由對方招攬，因此教練團今仗讓這位中場「話事」排陣，但他認為賽果證明了一切。「他一直不開心，認為自己的日本人得，唔想韓國（球員）踢，他們溝通上有問題。我們收起了（韓國球員），但效果如何？大家也看到中鋒（上形洋介）的把握力、與防守有多脆弱，只有伊巴謙很勤力，教練也很無奈。」"

6. 神田夢實咁樣比立立指控(我唔敢用個「屈」字，廢事跟車太貼)，佢第二日即刻響IG出文「反擊」。佢響文中表示立立的確有問佢意見，咁響職業球隊黎講，呢樣都時有發生，重要既係教練先係有決定權、做決定果個，佢只係比下意見。而佢淨係想日本人出場唔比韓國人出場佢更加莫名其妙，唔知點解會有呢啲報道，佢強調自己完全冇呢種諗法。最後果幾段就係承認球隊出現困難，講下啲鼓勵說話咁喇。

7. 老實講，我個人就偏向信神田夢實多啲既，首先立立鳩UP已經有唔止一次既前科，咁多年黎金句為數不少，加上佢話神田唔比韓國佬上場，但係正選名單上面明明就有大大個金旻奎係韓國佬，我覺得只不過係流浪呢排輸聯賽得太甘，所以李生要搵個人出黎發洩下啫。

8. 好彩既係4月10號菁英盃四強賽事，神田夢實和他的日本朋友們，冇受到立立風波影響，上形洋介雖然錯失咗一次空門機會，但佢將功補過，接應神田既妙傳為流浪射入先開紀錄既一球，而神田夢實策動攻勢全場表現活躍，最後加埋小將陳耀祖既入球，以二比零小勝冠忠南區打入決賽。

9. 其實以流浪上季既表現，應該真係值得拎到一個盃賽既冠軍既，不過今季就真係麻麻，又睇下響劣勢之中，流浪又可唔可以響菁英盃決賽對傑志有一番作為喇。

10. 花生就淨係得流浪有，東方都有。港超傑志對東方既賽事出現咗唔少爭議判決，除咗艾里奧同埋羅梓駿應唔應該拎第二張黃牌要被趕出場之外，仲有就係拉美治響防守馬希偉時候既手球。有睇開我之前既文，我都唔止一次評論過呢種情況，響最新既球例下，咁樣唔自然伸出手基本上十二碼係走唔甩，而事實上東方自己今季都硬食過幾次呢啲十二碼，但係當呢啲情況一發生響自己身上既時候，就變咗乜事都冇發生過，真係唔興過火屎就假。

11. 東方教練盧比度講得啱，任何人都會犯錯，領隊、球員都會犯錯，但佢哋要承擔返自己既責任，唯有球證真係權力傾天，錯咗？冇事喎。

12. 遠在以前港甲既時代已經係，我唔敢肯定係咪特登，但球證好多時都好明顯會受到一啲場上因素而影響公正性，例如邊隊既球員投訴得多啲，我就更加吹死你。唔止東方受過害，其實好多球隊都受過害，講到尾球證垃圾呢個問題我諗講足二、三十年都有，但根本就唔見有啲咩改善。

13. Quote返盧比度原文，佢最有力果一句係︰每個人都會犯錯，包括裁判、球員和教練，關鍵在我們會否承擔自己的錯誤。當我犯錯，我會承認；當球員犯錯，他們也會作同樣的事，我認為裁判也應如此。從我們的角度來看，這（判決）是不公平的，我們有權表達這一點。我們沒有針對任何球會的意圖，他們與這個議題無關。

14. 英超啲球證都係戇撚鳩垃撚圾，但係佢哋會解釋返判決、佢哋做錯會say sorry，我諗盧比度要求既已經唔係佢哋唔犯錯(呢點相信大家都明白係冇可能)，而係希望佢哋肯勇於承認錯誤。

15. 不過…呢班球證大部份都係做慣紀律部隊，要阿sir道歉？天方夜譚啊佢哋話！

更多專欄內容︰ https://vocus.cc/salon/leafopenleafopen

#不專業足球筆記 #專欄 #足球專欄

#香港U23 #晉峰 #林學曦 #標準流浪 #李輝立 #立立 #港超聯

#垃垃 #立立金句 #流浪 #冠忠南區 #神田夢實 #上形洋介 #菁英盃 #東方

#傑志 #盧比度 #盧比度叔叔 #球證 #垃圾球證 #港超

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938