Kloster Maulbronn 毛爾布隆修道院
Um das Gute zu lesen, ist eine Bedingung, dass man Schlechte nicht lese.
Bueh 讀出好 ê 代誌，一个條件，就是莫讀出歹 ê 物件
Arthur Schopenhauer
Gún 翁仔姐無論感情抑是錢項齊行無仝爿 ê 有才調相佮牽手到目今，無一个人需要 kā 剖 buē 開 ê 橫柴捎來做練身體健康 ê 器具抑是 kā 開喙 ê 六月蛤捎來做飯頓食補，我想這交 gún 兩人經濟齊獨立，無一个人需要食對方 ê 月光下看人影交月光跤看人影，另外 mā 無一个人無要意出錢 ê 人伊趁 ê 錢是毛管空出汗 ê 錢，kan-ta 要意你交我牽手你就愛負責我 ê 大細漢，像𪜶兜透世人 kan-ta 結婚前捌做過幾冬穡 ê 勥母，想 bueh 挃 ê 物無 hōo 伊挃得隨歹油厚滓，歹豬母厚面屎。
德國 ê 法律確實有立法規定查某人做穡需要查埔人同意，總是勥母出世 ê 年代已經無這條法律，社會 mā 無時行查某人就是愛跍厝扞家。別人兜代閣講落去是歹瓜厚子，歹人厚語 m̄ 通熥 buē 離。
自戀愛到申請結婚簽證、來德國做家甲我 m̄ 捌 hōo gún 翁出過一條數，我 ê 意思是伊出伊 ê 機票錢來台灣，我出我 ê 機票錢來德國，準備結婚需要行 ê 德國行政程序準做伊 kā 我舞甲喝 buaih 登記，我猶是無 hōo 伊出過一仙五銀 kā 伊認為 ê 程序愛按呢行 m̄ 是我講 ê buē 使得按呢做清彩 kā 錢放水流。行過德國結婚行程 ê 人合該然理解，一个文件空榫無峇伊隨成做未來 ê 舊件新數。所致當鹹掛澀 ê gún 翁大大典典講我 bueh 按水鬼升城隍升做你 ê 財神爺，我是做先生 kā 節脈掠伊罔講 buē hōo 白賊七 ê 講古騙去。伊 mā 知影伊興半暝仔食西瓜，天光反症 hōo 我 buē 信任直頓胸坎講我 m̄ 是閰羅王出告示，鬼話連篇，我是十二月 ê 芥菜 m̄ 是六月 ê 芥菜。
人講機關安 tī 倉庫，其中必有緣故，代誌無關公賣豆腐 ê 簡單，我愛細膩。
這月日我讀著交阿母仝鄉 ê 作家陳胤先生出新詩本《日子》捌投資交阿母 mā 仝鄉 ê 陳思宏《鬼地方》ê 我，準做詩 tuì 我無路我 mā 想 bueh 按六月芥菜假做十二月芥菜 kā 投資隨請講伊 mā 是十二月芥菜 m̄ 是六月芥菜 ê 翁成做我 ê Nikolaus 聖誕阿公。
Tī 北港廟壁猶未 hōo 我𫞼出來做背景，伊己經破甕內大龜，龜跤趖出來講「這月日我需要 uī-tio̍h 你開遮 ê 錢」，伊一條一條數拆 hōo 我聽，我 mā 一條一條鏨 tī 心肝穎，起因遐 ê 物件無半項是我出喙講我 bueh 挃，像彼坩框金 ê 露營烘爐，我人 tī 台灣講甲清清楚楚我無需要這項物件，伊綿豉講「你需要，起因 gún 老母 mā 有一坩」押尾發見 200歐圓真正 hōo 牽手放水流，開始傳世佛經世世(踅踅)唸，唸甲我應伊既然遮爾仔對頭冤家主，看我礙目咱就隨人付米隨人落鼎，各人行各人 ê 路，莫 tī 戲棚做翁仔某，假恩愛，伊 tsiah 放棄𪜶兜 ê 傳統，出錢 ê 人主意。是講𪜶兜 m̄ 是 kan-ta 出錢 ê 人主意，𪜶兜是無出錢 ê 人 mā 主意，因為你是我生 ē 過 ê 麻油芳，你愛寶惜我 ê 較橫蔡牽。
本底講甲喙角全波 ê 伊，凡勢想著這件代誌清楚知影粟仔烏去，䆀仔，隨轉喙 tuì 若一身柴頭尪仔無反應 ê 我講「咱 m̄ 通戇狗顧山草」hōo 柴頭尪仔轉身成做妖怪 tuì 伊嚷，總是烏去 ê 粟仔食久 mā-ē 慣勢，嚷無幾句戇猴感覺繼續搬石頭是一件比食飽傷閒閣較食飽換枵 ê 無意義，擲這段話「疑人，m̄ 成賊，你講恁爸母無我講 ê 阿兄徛樓頂，哥哥(高高)在上，看人 buē 上目，𪜶 kā 年歲比𪜶閣較長 ê Opa Stoll 當面當做空氣 buaih 回應伊 ê 挨拶，這是我講白賊抑是事實，你腹內知知 ê 啞口硩死囝，無話講 ê 事實，棺柴內伸手，死愛錢是人之常情，總是你 buē 使得萬項萬代齊講是我半暝出世，害死你。」
伊串講攏講伊有問題齊是別人造成 ê 哭呻 tuì 我是一耳空入，一耳空出，據在伊講，我 ê 老道士放屁，句句真言敢 mā 是伊 ê 串講攏講 gún 兜 ê 歹話，免要意，我 m̄ 知影，huînn-ti̍t 準做生活 tī 德國無伸手 kā 討所費 ê 我日子 mā 無過甲坐佇馬桶齧瓜子，伊交我 ê 田園從來 m̄ 捌相扯 ê 正港各人行各人 ê 路。
阿母 m̄ 捌字，總是阿母 ê 教示 tī 這久成做救命仙丹，我免 uī-tio̍h 錢 hōo 伊草踏蹧躂並接受𪜶兜彼隻五錢豬仔，掛一支喙 ê 人做天文仔舍是天經地義，你來 gún 遮 m̄ 值 gún 一支跤毛無 hōo 你做乞食你就愛偷笑閣要求啥物福利，buē 見笑。
清清楚楚知影踏著牽手 ê 紅線交十限九無影 ê 隨綴來唔唔睏，隔工水鬼揣城隍講「咱敢 ē-tàng 莫豬八戒拜天公？」
人生譀譀，不過如此，我無才調牽尪姨，順話尾交伊經絲，我只好 kā 問題交 hōo 阿母在生上捷講 ê 好事來，歹事煞，觀音佛祖來擺撥，時到我就知影我敢有才調 kā gún-ê 問題一帆駛甲到。
自囡仔阿母就教示查某人會使得無查埔 buē 使得無厝交無錢 hōo 我培養這个性地，家己有才調處理 ê 錢項就家己處理 buē 望穿秋水𥍉𥍉看向望別人 ê 鬥相共，所致隔工精神隨處理這條數。交我來往遮 tsuē 冬清楚知影牽手性地 ê gún 翁見我處理這條數隨行倚講「這條數我出。」
「出山了請醫生，buē 赴」我文文仔笑應，斡頭款早起頓。
早起頓款好請伊上桌做陣食飯，伊目眶紅紅講「我知影我閣 kā 問題舞甲五斤番薯，臭八十一兩。」
「咱自來往就五百人當軍，五百人當賊，互相有家己堅持 ê 能力，總是我確實 m̄ 捌六月天，講變就變兼一四界開菝仔票」我微微仔笑講。
「我知影，我愛耍套頭像 gún 爸母」翁講。
「我無按呢講」我隨紲喙。
「你講了著，我願意冇手做阿舍 kan-ta tī 番薯臭芳僫處理 ê 時陣」翁講。
「雞是討食焦，鴨是討食澹，我無食你飯，自然 buē 犯你問，總是慼花之花蓼(liauˊ)慼甲連回應 mā 感覺家己是膠(gauˊ)多毋黏，話多毋甜，食飯」kā 這个我 m̄ 是刁意故主顧摻酸醋 ê 話題拊掉，畢竟問題已經解決甲清氣啖啖，家己 ê 田園，家己佈田，免看別人 ê 大細心。
巡田園翻田園，巡著這篇心行尞，目今 ê gún 翁 buē 閣手曲曲入無曲，牽手擲一爿，串驚串講 ê 阿爸阿母那慼那惜命命。我 m̄ 知影伊呔討有這款變化，我想交我清楚劃紅線有關係。
未歸三尺塗，難保百年身，已歸三尺塗，難保百年墳，咱 ê 姻緣是天註定 m̄ 是媒人跤𠢕行，咱 ê 姻緣 mā m̄ 是恁爸母見本 ê 延續，我更加 m̄ 是恁兜傳統 ê 繼承者，人講銅錢無兩个 buē 霆，我莫跟綴恁上童，手自然 buē 攑刀，心自然就閒囉囉，簡單來講我自本就無興做恁兜 ê 公親更加無想 bueh 做恁兜 ê 事主，我想 bueh 解決咱兜目前 ê 木蝨食客，我 ê 斤雞，斗米，所致我 buē 閣回應恁爸母 ê 問題抑是要意你按恁爸母遐毒 hōo 我 ê 毒，不過你愛清楚知影我 m̄ 是田螺死也一个殼，活也一个殼 ê 性地，所致你想 bueh 綿豉田螺疼尾溜，我 mā 大丈夫，愛情是有限制，感情是日佮眠培養出來 ê 燒烙。 我揣著家己 ê 對頭有主，自彼日開始 m̄ 捌交伊辯話骨兼做開喙蛤，粒粒臭達成伊 ê 願望咱莫豬八戒拜天公，家己刣家己。
巡田園翻田園看書櫥 ê 冊《二七部隊》伊投資，《落西北雨的下晡》mā 伊投資，俗語講大狗盤牆細狗趁樣，伊按𪜶爸母遐趁樣來 ê 毒，我解 buē 掉，總是我有才調 uī 家己揣解藥莫 hōo 伊毒毒，𫝛時我按我家己做起，伊若真正要意翁仔姐感情，伊自然某變翁綴，牽手做陣愈來愈好。目今 ê gún 總算勻勻仔行向這條道路，我是一个有智慧 ê 女子。
