Gdynia（格丁尼亞）, Sopot（索波特） 佮向時 hōo 德國押做情人 ê Gdańsk(格丹斯克，德：Danzig)➀，𪜶是波蘭上饒裕(liâu-lū) ê 地區 mā 是波蘭全境搪著佮西班牙、摩洛哥想 bueh kā 徛𫝛位 ê 土地揣轉來 ê 角勢之一。
雖罔按遮行到康德 ê 故鄉 Königsberg 猶有 75 公里左右，總是無法度自在按家己土地接家己 ê 土地是一件紅龜生蟲，龜怪 ê 代誌敢 m̄ 是？
政治傷過複雜，歷史 buē 改變，未來 mā buē hōo 歷史停跤，未來 ê 遮 ē 成做啥物生張 hōo 伊家己決定。
Gdynia 自 13 世紀就行入歷史 ê 跤跡，總是伊佮歐洲 tsuē-tsuē 倚海 ê 漁庄𫝛款無人加持 buē 按塗炭仔成做皇后。
Gdynia 開始成做波蘭歷史重要主角之一，猶原是按厝邊德國遐來 ê 加持。1926 Gdynia 成做波蘭對抗德國重要港埠之一。1939 ~ 1945 伊成做德國反抗美軍佮英軍主要 ê 港埠 hōo 美軍佮英軍擲炸彈擲甲 kiōng-bueh 認 buē 出人。戰爭期間保護人民 ê 波蘭軍艦到今猶靠岸 tī 遐，提醒人民自由 m̄ 是按天頂來 ê 甜蜜。
Gdynia 自伊出現 tī 歷史 ê 跤跡一直是樸實 ê 漁庄，有機會第一斗按塗炭仔成做公主是歐洲結束。歐洲人開始發見歐洲 ê 北海重要，歐洲 ê 東海 mā 是，開始建設這搭本底無人 bueh 行跤到 ê 漁庄並按漁庄成做歐洲上重要 ê 國際碼頭。
寫到遮，想著打狗，咱臺灣 ê 漁庄比 Gdynia 閣較早發展 m̄-koh 城市面肉敢若有較頓蹬無閣向前行。我 tuì 臺灣海港最後一斗 ê 印象是高雄，現此時 ê 高雄敢猶頓蹬無向前行，我 m̄ 知影，總是遮 ê 文字記錄是我個人 ê 記持 。
這座城市 mā 行過 tsuē-tsuē uī-tio̍h 追求民主自由生湠出 hőng 看 buē 著 ê 紅河。
Tī 德國第三帝國佔領這座城市期間 tsuē-tsuē 智識份仔 mā 成做𪜶訓練槍法 ê 器具，押尾德國人 mā 因為領導者 ê 一句話，這座城市佮 Danzig 攏是咱自古神聖無法度分割 ê 領土 hōo tsuē-tsuē 人 uī-tio̍h 伊 ê 戇想提早消失 tī 這个世界，遮 ê 人 mā 包括對抗德國 ê 露西亞人。
這座城市 mā 佮其他歷史城市仝款，歷史算啥物，我講了 tsiah 準算 kā 伊按美人變甲秘雕，遮 mā 是平靜捒倒牆主要城市之一。
這个城市佮波蘭其他捌有德文城市名稱 ê 角勢相𫝛，往過對立無離開 ê 族群成做這時 ê 族群，往過 m̄ 捌加入 ê 族群跟綴歷史變化成做這个族群 ê 一部份。
Tī 波蘭搪著喬治亞人 ê 比率，應當是我行踏歐洲各國上 tsuē ê 一搭，mā 因為這个原因 hōo 貧惰動手做喬治亞料理 ê 我有機會用零星價數食著好滋味，像這看起來若鼎泰豐小籠包 ê Chinkali 佮 Chatschapuri。
歷史 m̄ 捌複雜，複雜 kan-ta 人類彼永遠食 buē 飽 ê 空思夢想，感謝 Gdynia ê 包容 hōo 我省去認真搜揣隨有機會窒數念並紮飽脹甲若九月 ê 腹肚繼續向 Sopto 出發。
我 tuì 海沙埔抑是游泳無興趣，所致 tī gún 猶未見著彼間設計特別 ê 百貨中心進前，我一直 tuì 翁目頭結結講「水療中心德國滿金界，白沙 ê 海沙埔西班牙抑是法國攏比伊燒烙，無差咱兩人」押尾 tī Danzig 見著冰箱吸石隨成做有紅嬰仔聲 ê 人講「遮是佗，咱愛來去行行看看」hōo 伊笑講我 mā 是五時做藥，六時做石，一日三市。
Sopot（索波特） 自 13 世紀出現 tī 歷史跤跡，伊是漁庄 mā 是宗教要地，伊 ê 主權扞 tī Danzig sóo-tí 伊 ê 歷史發展 mā 佮 Danzig 縛 bueh 600 冬。
17 世紀 ê Sopot 一位女性 hőng 講做尪姨隨成做烌，18 世紀 ê Sopot 一位醫生踮遮開醫生館並 kā 東海成做水療中心，就此 Sopot 按有尪姨 ê 海沙埔在升格做通人捌 ê 有醫療效果 ê 海沙埔。
Sopot mā 是德意志帝國(1871 ~ 1920)上重 ê 運動舉辦地，遮 ê 逐年 7 月攏 ē 舉辦若奧運 ê 比賽。
二戰期間 Sopot mā 是德國第三帝國重要 ê 造船要地。
Sopot 佮 Gdynia hām Gdańsk 相仝 tī 二戰受著嚴重 ê 破壞，不過重要 ê 歷史 m̄ 捌因為人為 ê 破壞就 kā 伊擲挕捒。
現此時 ê Sopot 有淡薄仔新 mā 有淡薄仔舊，不過百外冬前 ê 醫療驗證到今 m̄ 捌消退，規个海沙埔是人洘秫秫 hōo 無愛佮水大麵炒圓仔，膏膏纏 ê 我 mā 綴 leh 試驗百外冬前 ê 醫療。
無鹹水 ê 海，若正經比北海較燒烙而且 buē 咬皮膚。
Sopot tī 二戰進前號做 Zoppot，二戰後根據 Potsdam 會議 kā 名改轉來做 Sopot。
巡田園，翻田塗寫到遮想著咱番薯島，當時 tsiah 有家己真正 ê 名。
波蘭 tī 蘇聯年間成做抵抗西方北約第一个要角，蘇聯解體蘇軍敢有全數歸返原國，一直成做我個人小小宇宙 ê 好玄，起因平平捌有蘇聯駐軍 ê 前東德 bueh 揣著露西亞、烏克蘭、喬治亞遮 ê 較敆我喙斗 ê 美食是比唐三藏向西方取經閣較僫揣，所致只要有機會行踏波蘭，我就 kā 伊自動轉化做「補冬日」。
這斗行踏 Gdynia 除了搪著鯛魚燒 hōo 我樂暢甲 buē 記持 gún 翁 ê 勥爸勥母來上童，紲落來又閣見著若台灣籠床包仔 ê ხინკალი Chinkali Khinkali hōo 我實實櫼櫼相信天公是疼好人--ê，交這斗 ê 城市閱讀有伊 ê 啟發等待我成做愖題人 Le Penseur, Der Denker, The Thinker。
➀波蘭語號做 Trójmiasto，德語號做 Dreistadt，英語號做 Tri-City
2021.09.14
