Es ist eine Woche her, dass wir Bulgarien verlassen haben, die Geschichte, die ich schreiben will, ist bereits so, wie der Diamant-Sutra sagt,
Vergangenheit Unverfügbar
Jetzt nicht verfügbar
Die Zukunft ist unerreichbar
Ich habe nichts erhalten, aber ich bin zufrieden.
一目𥍉離開保加利亞 mā 一禮拜外 bueh 寫 ê 代誌 mā 已經成做金剛經，過去心不可得，現在心不可得，未來心不可得 ê 我啥物攏無得著，m̄-koh 滿足。
Schipka 倚位 tī 保加利亞中部，城市名稱是玫瑰(Rosa/Hagebutte)，遮除了出產知名 ê 保加利亞玫瑰，遮 mā 是歷史上出名 ê Schipka pass ê 所在 mā 是發見 Казанлъшка гробница/Thracian Tomb of Kazanlak ê 重要角勢。
寫著玫瑰，遮 ê 玫瑰果子醬足敆 gún-ê 喙斗。
Schipka 是 Казанлък 其中一个鎮 mā 是保加利亞上重要 ê 玫瑰種植區域，sóo-tí tī 遮 ê 亞洲人真𠢕 hőng 認做是日本人，起因遮 ê 亞洲遊客大多數是日本人。
是按怎我 ē 知影這个問題，自我跤花栽到遮搪著 ê 當地人百分之九十齊是日語在先，英文在後。
「Gún 遮 ê 遊客大多數是日本遊客」人 tī Шипка - 露西亞式東正教教堂 出現 ê 時間 mā 對對 hōo 等待日本人客 ê 當地引路人掠我是伊 ê 人客，那破豆那引𤆬我行出是按怎逐家見著我齊講日文 ê 雺霧森林。
Казанлък 除了玫瑰出名，伊 ê 溫泉 mā 是頂港有名聲，下港上出名，gún 選擇 ê 露營地 mā 提供相𫝛 ê 服務，浴間仔 kan-ta 提供溫泉水洗浴。
「洗 gún-ê 溫泉水保證恁佮頭家仝款少年」kā 阿公號做頭家 ê tsa̋u-sun 那紹介環境那講。
「頭家 m̄-tsiah 50 捅仔」gún 翁某做伙出喙。
「頭家 70 外外，自一出世就用遮 ê 溫泉水洗浴。」
跤花猶未栽到我保加利亞，我 tuì 伊 ê 溫泉 m̄ 捌一个呼，經過當地人 ê 紹介佮驗證 hōo 我實實櫼櫼感受歐洲第二出名溫泉區 ê 魅力(bī-li̍k)，人實實櫼櫼感覺家己少年二十歲。
另外，遮 ê 山泉水 mā 是接捷克山泉水 hōo 我感覺上甘甜 ê 角勢，雖罔一寢開始膽膽...
Казанлък mā 是世界文化遺產色雷斯人墓壙 ê 出土角勢。色雷斯人 ê 墓壙自 1979 就成做聯合國世界文化遺產。
「遮 ê 墓壙 tī 保加利亞會使得講是一四界攏看 ē 著，總是無文化保存意識抑是阿貓性地，伊只是一个阻礙人做穡 ê 山崎。Gún 保加利亞人長期以來一直認為伊就是一堆塗，這个認為一直到外國團隊來遮考古 gún 遮知影家己有這个寶藏，一个自羅馬年閣就 hőng 捎甲 bueh 無見半項 ê 寶。所致恁這久徛 tī 恁面前 ê 色雷斯人面目攏是考古學家推測 ê 見本。」
Gún 那聽色雷斯寶藏引路人 ê 分張 mā 好玄伊是按怎愛去西班牙學習遮 ê 智識。
「因為 gún tuì 家己 ê 歷史無理解就愛請教別人」伊雄雄成做見笑草 ê 表情 hōo 我想著我家己佮咱番薯島，咱一直捎別人 ê 歷史佮眼光看家己 ê 紅龜生蟲，龜怪。
「墓壙內底敢無任何一項按色雷斯人留下 ê 遺物」我請西語 mā 講甲若母語 ê 翁向西語 mā 講甲若西班牙人 ê 引路人請教。
「有，總是無 tsuē 就是。」
聽兩个外國人 kā 西班牙語講甲攏比家己誠實 ê 母語閣較好，我 mā 想著家己，爸母一个無學習，一个講甲 2266，按學校學來 ê 系統到今猶是大舌 buē 輾轉，總是我比色雷斯人較好字運，我猶有機會揣著家己 m̄ 是成做別人 ê 推測。
Gún tuì 這个博物館捎無一个摠，紹介 gún 來遮 ê 露營頭家 tsa̋u-sun mā kan-ta 知影家己無聊甲掠蝨母相咬 ê 家鄉有世界文化遺產通參觀，所致當 gún 翁仔姐徛踮資訊服務站門跤口四目向內金金相，引路人隨行出來請 gún 先行一逝園區 tsiah 決定敢 bueh hőng 𪜶𤆬導覽，gún mā-tsiah 有機會使用網路請教 Google 啥物是 Thrace。
遮 ê 導覽是無料，總是跟綴專業人員沓沓仔 kā 跤花栽 tī 這古老 ê 土地兼添新智識，gún 隨決定以感謝來寄付。引路人小姐一見著 gún-ê 感謝隨擛手講「M̄ 免，m̄ 免客氣，gún 是做 gún 愛做 ê 代誌，而且遮 ê 導覽費用攏算 tī gún-ê 薪水內底。」
我因為聽無西班牙語就成做柴頭人恬恬看 gún 翁佮引路人小姐 ê 挨推，押尾按引路人小姐手搭胸坎 ê Muchos Gracias，我知影這份頭路並無法度 hōo 𪜶遮 ê 引路人過較好 ê 日子，m̄-koh buē 餓死。
保加利亞外移人口是歐洲上嚴重 ê 角勢。
拄開始踅遮 ê 見本，我感覺伊誠有印度味，請教維基百科 ê Thraker mā 證實我 ê 推測無走精，色雷斯人佮印度確實有相干 hōo 我想著達爾文進化論。人類 ē 進化交本底相𫝛 ê 族群成做兩个完全無相𫝛 ê 群體，歷史 mā 是。
「色雷斯人墓壙自發現到今猶 teh 出土，gún 保加利亞人 tuì 這个文化 mā 無一个認捌，所致目今 ê 資料 m̄ 是真 tsiâu-tsn̂g，真歹勢」離開進行引路人小姐閣 kā gún 會一斗失禮 hōo 我想著目睭永遠看人兜 ê 人，應當 buē 遮要意遮 ê 細節。
願保加利亞佮臺灣交其他有𫝛款問題 ê 角勢攏有法度 kā 消失 ê 記持揣轉來 hōo 咱 ê 世界真正多元，真正豐沛。
Казанлък 除了玫瑰、溫泉、色雷斯人墓壙掠外，伊 mā 是保加利亞按 Osmanlı 獨立重要 ê 角勢 mā 是保加利亞人 ê 藍綠。
我是外國人行踏遮主要 ê 因由是伊是通人認捌 ê 觀光地區，伊佮台北中正廟 mā 有相𫝛 ê 問題。
伊 tuì 無向望保加利亞繼續倚向露西亞 ê 當地人來講就像見著中正紀念堂，一聽著名規个面腔佮聲調隨無仝。
像露營地主人家交古錐 ê tsa̋u-sun 一聽著 gún 來遮行踏，隨換話題。
「共產制度無好，民主制度有缺點，總是民主 hōo 人有機會長短跤話交三人共五目，日後無長跤短話」行過 40 外冬共產制度 ê 露營地主人家請 tsa̋u-sun kā 話翻譯 hōo gún 聽，紲落來以拍破散赤 ê 貴人國語言講「Nichts gut, nichts gut」(無好，無好)。
稱呼家己阿公是頭家 ê tsa̋u-sun 紲話講「阿公一直 tuì gún 分張共產時期 ê 保加利亞，hōo 我更加珍惜目今 ê 自由。」
聽看起來真正少年 ê 序大分張伊 tuì 人生上美麗 ê 年歲齊關 tī 櫳仔 ê 故事，我 tsiah 雄雄想著，一路按匈牙利車日子到保加利亞，這个前蘇聯 ê 兄弟是這逝車日子唯一一國見著 kā 露西亞國旗交總統緣投 ê 相片成做觀光紀念品 tī 賣。
家己 ê 歷史 m̄ 捌半項，別人 ê 歷史更加 m̄ 捌一箍芋仔番薯，sóo-tí 免 buē 博假博，總是向望咱世間無一个人需要閣 uī-tio̍h 一个人 ê 幻想跳童來受著傷害。
He who falls while fighting to be free
can never die: for him the sky
and earth, the trees and beasts shall keen,
to him the minstrel's song shall rise...
Uī 自由戰鬥倒落來 ê 人
永遠 buē 死：天佮地
樹木佮野獸將 uī-tio̍h 伊成做猛火
Uī-tio̍h 伊，吟唱詩人 ê 歌聲將響起
1868 保加利亞佮 Osmanlı tī Бузлуджа 喝最後一拳，Osmanlı 喝輸就此離開這个按別人遐轉過來 ê 角勢。
Бузлуджа mā 是保加利亞共產黨開第一屆黨會 ê 所在。
Паметник на Бузлуджа/冰峰紀念碑是 uī-tio̍h 紀念保加利亞共產黨創始人 Димитър Благоев Николов 交伊理路相仝 ê 戰友 tī 1974 起造 1981 完工。
1989 保加利亞放棄草鍥仔佮摃槌仔，這个本底妝娗甲氣派兼媠噹噹 ê 重要建築隨成做過街 ê 鳥鼠。
伊現此時 ê 狀況交臺灣飛碟厝𫝛款是 tsuē-tsuē 電影抑是電動畫面主要靈感來源 mā 是網衝想 bueh 翕出超現實相片 ê 好所在，gún 行踏 ê 彼日就搪著 tsuē-tsuē 組人 tī 遮攝影。
冰峰紀念碑有明確 ê 告示禁止入訪，彼日人 tī 遐看閣閬閬 ê 山群吹山風兼看逐組攝相，我又閣成做一隻貓，是攝相 ê 人驚 gún 四目金金相 ê 見笑所以守規矩抑是𪜶本底就守規矩，畢竟保加利亞 ê 醫療是歐洲有出名 ê 䆀。
是佗一个因由我 m̄ 知，總是見著彼日逐家攏無超過告示牌 ê 界線，我有一種珍惜性命比得著無感情 ê 讚閣較重要 ê 感動。
翁 tuì 保加利亞有一種龜怪 ê 偏見，這个偏見交台灣人見著台語正字、客語正字、原住民羅馬字齊 m̄ 是相𫝛 ê 拒絕閣來行踏。我個人因為年歲愈行愈大所致烏貓時期 ê 愛盤車旅行成做目今 ê 懶屍就順其自然，目今 ê 伊講 buaih 閣來遮探訪，未來 ê 伊敢閣有這个心 hōo 我繼續看落去。 畢竟喝 buiah 去 ê 波士尼亞押尾 mā 去兩逝，而且閣搪著美人。波士尼亞 ê Mostar 到 Sarajevo ê 火車路線正港媠甲 hōo 我準做忝目蚶 mā bueh 挾衫挾仔。
過去心不可得，現在心不可得，未來心不可得，既然過去交未來齊不可得，我就得目今，擺工 buaih 扞鼎食餐廳。
保加利亞交波士尼亞、阿爾巴尼亞遮 ê 角勢𫝛款，食食佮文化攏受著 Osmanlı ê 影響，總是伊猶是保加利亞，伊猶原保留家己 ê 食食文化像 Кирково(Kirkowo/Kirkovo/基爾科沃)食著 ê Tshì-sù。伊好食甲自來喙白 ê 我隨反形想 bueh 閣來一盤。
保加利亞 hōo 我數念 ê 食食 mā m̄ 是這味 niā-tiānn，𪜶䆀䆀 ê 麭佮山羊優格 mā 是我數念到今 ê 滋味。
Kā 行跤花遶山花栽來部落格，翁又閣掛有色目鏡講「保加利亞若是使用羅馬字，這个角勢就心適好耍矣。」
「希臘文字 mā 無羅馬化，呔討你 tī 遐旅行就 m̄ 捌青盲過」無興六月蚶，開喙臭，總是一想著伊又閣滓著𪜶爸母 ê 症頭，我無掠蛆 ē 著災。
「可憐 ê 恁阿母 uī-tio̍h 展伊會曉講恁兜牽手 buē 曉講 ê 德語，硬 kā 伊看 buē 上目 ê 舌接轉來交新婦練仙，可惜新婦 tī 恁這个箍仔 kan-ta 會曉通用德語，所致伊是 tuì 牛彈琴，無較縒。」
人講搪著歹大家(官)忍一下就過，我若忍遮 ê 問題早就去塗州揣 gún 爸母交二位阿姊。𫝛款 ê 問題我無治療 gún 翁 ê 問題，我 ê 氣 buē 比伊長。𪜶兜是戰車基因。
離題，總講一句，六月蚶，粒粒臭愛用 tī 著 ê 所在，保加利亞咱掠日再相逢 Bis dann。
2022.09.08
