Kan-ta 知影 tuì 人點磺火情緒叨撚之者，合該然是真僫理解 Die Weltgeschichte ist der Fortschritt im Bewusstein der Freiheit 世界歷史是自由意識 ê 進步 mā 凡勢愛做先鋒者指導別人 ê 生住異滅，成住壞空，只因為𪜶認為 gún 是十八港跤行透透之者，食過 ê 鹽比你食過 ê 飯閣較 tsuē，摸過 ê 世界經典比歐洲東海 ê 蠓閣較厚，我按學校得來 ê 紙伊頓 ê 印仔比你 ê 階層懸百層，總講一句別人年久月深 ê 栽欉、翻草、薅草是 m̄ 值一仙五銀。
巡田園並剷草，剷到「鱈魚烘」直接 kā 翻塗，畢竟遐 ê 過了代是鴨卵擲過山，觀音佛祖免閣來擺撥。總是人兜孔子媽致心 uī 我點 ê 磺火燈智慧 hōo 我想著《真情99》走揣心靈的世界 ê 這段話。
一排一排黃色大葩的燈火，敢若衛兵仝款，顧佇遠遠的山頭，四箍圍仔零零星星白色細葩的燈火，敢若散兵仝款，堅守崗位，𪜶嘛敢若烏暗中的蠟燭火，共你我照路，予咱行光明的大路。韓滿是啥人？自《小王子》、《彼年的熱天》行入我 ê 閱讀世界，上博客來巡台文作品 tī 買了此商品的人，也買了....這格捷見著《酒蜜100》hōo 我成做貓順內容簡介、作品紹介 tuì 作者貓貓相，相完隨斡頭離開。
「Tsit-má逐家上欠缺ê就是你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58）
感謝台灣人台灣事 Hena Ma《台語．生活》電子報。
2023 請冊局鬥相共 ê 冊單寄出去久久無收著回應 hōo 本底就愛烏白亂想 ê 我，恢復自來遮愖遐想，然後順自來 ê 緊性殘殘 kā 冊單徙去博客來，順紲新添《真情99》交 Ich habe die Nase voll ê《酒蜜100》，起因無酒蜜100 我 buē 掘著真情99，紲落來 von den Socken 按襪仔來 ê Surprise，原來陪伴我無數紅霞 ê《戀戀曾文溪 台語文學廣播劇系列》伊 ê 第一集〈對一張相片講起〉ê 作者就是真情99 ê 韓滿老師。
順老師 ê 文字行入親情、翁某情、師生情、朋友情、有情、真情，我想著這段話 Die Philosophen haben die Welt nur verschieden interpretiert, es kommt darauf an, sie zu verändern 哲學家只是解釋這个世界，重點是愛改變這个世界。像楊逵先生「羊頭集」ê 這段話。
我認為阮愛寫文章毋是為著欲寫出啥物物件通來教示人。我感覺逐擺若欲寫一篇文章，總是愛先坐落來恬恬仔思考，反省咱ê日常生活，檢討所看著，聽著，做著，想著ê。寫煞著koh研究，毋但是大字上ê研究，更加愛研究ê猶有思考、生活上ê研究，按呢就有法度沓沓仔接近正道，kā咱ê生活糾正，予咱ê生活袂siunn離譜......對家己是有好無䆀。
跤帛跤剪做 4 x 4 就是 Hegel 講 Kreis von Kreisen，按圓湠圓 mā 會使解釋做一个圓是按無法度計算 ê 圓所生湠。真情99〈對一張相片講起〉寫著「逐擺見著魚頭魚尾佮雞頭雞跤，攏會予阮想起著阿母，嘛予阮感覺家己實在誠不孝...」hōo 我按這个圓湠去彼个圓，斟酌繩除了懊惱交咸豐三，講到今，我敢有改變。
〈人欲寫干焦兩撇〉hōo 我想著國中若無搪著這位老師，我這位自國校一年到六年攏 hōo 三个領𤆬 gún 班 ê 導--ê 專工請去講台做啥物號做豬比人巧範本 ê 我，敢有才調理解家己 ê 鵁領窮實是一種天份交祝福，m̄ 通因為別人 ê 無才調並剾洗咱是豬屎籃也敢捾出來品並，就擲挕捒行向交𪜶若雙生仔 ê 生張。
〈啉咖啡〉hōo 我笑甲吭跤翹，特別是「清糜張枵人」。2024 朋友邀請 gún 去𪜶兜過新正，慣勢一日食兩頓，早起頓又閣愛食甲若皇帝 ê 我，清楚知影這逝新正行春需要 kā 無糖法蘭西水當做正頓來止枵 ê 我，tī 假期結束 ê 前一暝 mā 是朋友款上腥臊 ê 一頓，我因為行春飯頓張枵人 m̄ 管身體著火 ê 抗議，一喙一喙 kā 聽翁講桌頂攢 ê 甜粅粅會使食甲月底，tī 彼三日兩暝食甲清氣啖啖無半項，紲落來轉到厝實踐暗時食西瓜，半暝仔反症，胃腸無四序兼火燒心閣牽拖到齒岸 mā 發癀。德國食物 ê 甜有偌甜，按捒 buē 振動 ê 議題 tī 2025 總算踏出第一跤步開始討論，就會使得知影 123。糖造成 ê ADHS tī 過去 ê 10 冬 m̄ 是坐 ICE 去巴黎抑是哥本哈根是坐火箭去火星。
Hippocrates 講 Let food be thy medicine and medicine be thy food，NDR Die Ernähnungs Docs mā 有相𫝛 ê 講法，食物是上時行 ê 藥品。喋過頭，總是我是按這个心情來處理磕 buē 著就上童 ê 人。𪜶 ê 規魂舒 ê 營養 kan-ta 加工食品交 Zucker Zaubert。
人生像舞台，欲演啥物角色有時由不得家己來安排，舞台的銀幕一幕一幕一直來。毋過，演完一幕的時，毋通袂記得愛小歇--一睏仔，彼毋但為著欲行閣較遠的路，嘛才袂錯過身軀邊綺麗的景緻。我是按底時成做 Hape 阿媽分張 ê 性地 Stecke niemals die Nase in anderer Leute Angelegenheiten 莫插別人兜代 ê 性地，tī 2025 冬尾 ê 這陣，我想 buē 起來，總是我發覺迵過別人分張 ê 家內事，雺霧罩心 ê 齪隨做水煙 hōo 日頭熁甲焦。
莫插別人兜代 m̄ 是講成做歹心烏漉肚，豬 m̄ 食狗 m̄ 哺之人，是我發覺我 ē 愈講愈踅金龜磨 mā 愈寫愈𠢕畫痕行路 kan-ta ē 曉咸豐三，講到今，清飯熥甲臭酸猶 teh 熥來食。簡單一句，這款感覺宛然你掠做心情無爽快出國行跤花，烏陰罩雺就隨散。結果得著按呢飼山羊 mā buē 大箍 ê 無較縒（Die hätte den Bock auch nicht fett gemacht）。所致我真感謝願意寫家內事 ê 人，迵過𪜶 ê 文筆 hōo 我有機會順原路消敨情緒，閣 buē 一日食飽閒仙仙，頂家下厝吐憐涎，六月蛤，開喙臭。
巡舊文 mā 䀐著記錄踅網路 ê 五四三「台文 kan-ta 有才調寫家內事 ê buē 出脫」，順自來 ê 性地，無佮意抑是過了代 ê 物隨愛擲挕捒，滑鼠 ê Select all 揤落去，紲落來 Del，陪我 Santiago de Compostela 睏天路車日子楊逵先生《春光閘袂離》 ê〈一粒好種子〉按腦發穎閣發枝，隨閣 kā 這篇五四三恢復。總是我 buē 閣 uī 伊耽誤寶貴 ê 時間重新寫一篇論文抑是熥清飯，畢竟十个囝仔十樣生，每一个人攏是獨立 ê 個體，家己有興趣 ê 代誌，愛掛骨愛妝娗 ê 戲劇人格自然 buē 相倚。
我佮意這本無掛羊頭賣狗肉完完整整 ê 台語家內事。
