台語文學
去予鬼王燒甲烏焦的虎爺，本底是五虎將，加哈囉這个屘虎爺，成做六个，排踮後步口虎爿的壁堵角，神軀烏趖趖，倒坦笑，四支跤繃直直。
「哈囉⋯⋯哈囉⋯⋯攏是我的毋著，傷過靠勢，想講鬼王的火就欲去予龍鰲滅掉矣！想袂到，彼个鬼王遐韌命，水沖袂化，彼葩火顛倒旺起來，若毋是你來救，我早就去予火舌燒死矣！哈囉！哈囉！攏是我的錯！」挩窗那哭那講。
眾神的心情䆀甲無底，土地公和城隍煞相諍，一个嗙嗙叫、一个搐搐彈，就起跤動手：土地公攑柺仔去揬城隍，城隍用手骨二節共弓，兩个捙來捙去，諍甲咬牙切齒相回目⋯⋯
挩窗坐踮烏焦的哈囉邊仔，大聲吼。
阿媽坐踮大士爺廟的塗跤，大聲吼。
挩窗喝：「我足想阿媽！我足想阿媽的啦！」
阿媽喝：「我足想挩窗！我足想挩窗的啦！」
眾神明祀佇遐，束手無策。
廟方人員徛咧，束手無策。