台語文學
故事轉來第十六集，廟頂三仙的冰角溶去，大港大港的水成做水沖，共挩窗和哈囉絞入去烏龍磅空。了後，牡丹柱仔就勻勻仔徙轉去，共喙口窒起來。飛踮空中的眾神落塗，後殿的門拍開，媽祖的宮女隨走出來，共水戽掉塗跤拭予焦。
仝一个時間，騎虎王爺廟，三川門和大殿之間的中埕，一對柱仔徙振動，現出烏lang-lang的喙口。水浡出來，中埕紲來入水，雄雄忽然間，一港水濺出來，袂輸出泉，共挩窗噴懸懸，飛踮空中。
挩窗去予水噴懸懸，飛踮空中。
目一𥍉，挩窗就對大士爺廟來到騎虎王爺廟。
佇民雄，阿媽擔頭，看天色已經烏矣，心情綴咧烏。頂一改，有這種相𫝛（siāng）的感覺，彼種失去寶貝孫的感覺，是咧溪底。
阿媽想起和挩窗去溪底的往事。