爭取民主已是「港独分子」　你我何不向政權極限施壓

8.5 大罷工後大家又陷入分歧：勇武定和理非，口號係「五大訴求」定「光復香港」，包圍定遊擊等等。其實呢D問題無答案，亦唔需要有答案，不過總可以有參考，而且可以一併討論。

你我都已是亂港禍國

唔好激嬲共產黨？對唔住，由大家爭取普選、撤回、林鄭下台等，希望攞返我地應有嘅自由民主時，已經令中共睇唔過眼。睇下國新辦個口風，同埋一眾藍絲嘴臉，無論你爭取啲咩，你同我都已經被定性為亂港禍國嘅港獨分子。

大家可以參考以下係 Wechat 瘋傳嘅信息：「重磅：港独明星清单！！」。入面講到「港獨藝人清單」，分別有：「港獨第一」張敬軒、「死派港獨」何韻詩、「死硬港獨」黃耀明、「老牌港獨」黃秋生、「鐵杆港獨」杜汶澤、「老牌港獨」葉德嫻，「隱性港獨」周柏豪、「撈金港獨」楊千嬅、「隱形港獨」佘詩曼，仲有「藏的最深港獨」吳彥祖，以及高調港獨分子阿 sa、鄭秀文、容祖兒。

不用分得那麼細，其實凡係爭取自由民主，唔係唯唯、阿叻之流，已被視為港獨，係要被打壓、口誅筆伐、同針對。中共要打壓你，就算你係親中都會被抄家。睇返「港独明星清单」，已投入中國懷抱嘅大導彭浩翔被稱為「投機兩面人」，都係要被杯葛嘅一分子。難道你仲要介懷「光復香港，時代革命」會比人有藉口嗎？

賭上一切不分化

對於革命、港獨，接受或成功與否每個人心中都有唔同答案。但相信無人會否認，係呢個政權一步一步將人民推向反抗：103 萬人、612、201 萬人，得到嘅係「壽終正寢」、元朗白衣人、警察濫權⋯⋯若當時政府肯做嘢，仲會有遍地開花、全民大罷工，或者咁多年輕人上前，異口同聲高呼光復香港，時代革命嗎？

要記得，無大台唔代表大家做咩都得，大家做所有野至少都有在場手足同意，否則會被眾人阻止；任何口號都係大家同意，先會一呼百應，否則只會石沉大海。所以對現場有意見，自己有咩提議，可以落返現場講同號召。

官逼民反，當日嘅運動已升級至此，係林鄭一手逼成，亦返唔到轉頭。佢地落好大嘅注，同我地對賭，大家都係賭上一切。切記要提防，中共最鐘意玩分化，打稻草人，搬龍門，拉一派打一派。我地已輸過一次，好多次，已經無得再輸。

中國忌諱極限施壓

搞革命又好，搞港獨又好，爭取民主都好。大家對「光復香港，時代革命」都有不同解讀，對於好多年輕人嚟講，呢個係未來，係理想；對於中共，呢句口號同香港人嘅勇武，係港獨，係一種「極限施壓」，亦好忌諱。

極限施壓係中美貿易戰經常出現，係美國對中國常用手段。簡單嚟講就係「大你」：一方面比壓力你，拋你浪頭，另一方面比條路你同我 Deal，唔得就繼續施壓。在呢場對賭中，中國就話自己敢於亮劍，不過屢屢處於被動。

若你都想香港好，但不同意革命獨立，不妨暫時將佢當成一個極限施壓籌碼，睇下香港可以爭取到幾多，反正大家都已無退路，只有放手一搏。係呢個危險存亡之秋，同坐一條船嘅你我，都已經係被逼上梁山嘅義民，「All in or nothing」，相信大家會有答案。

文：立場新聞 2019/8/7 讀者投稿