更新於 2021/12/30發佈於 2021/12/30閱讀時間約 7 分鐘

[華田一人票選] 2021 年十大零售銀行大事回顧 (上)

年尾又係做吓大事回顧呃稿費既好日子，2021 年零售銀行界發生咗咩大事呢？有咩新 product 值得喺零售銀行史上留下一筆呢？

以下係我一人票選既 2021 年十大零售銀行大事，佢哋又係咪你既心水呢？

10. 虛銀瘋狂優惠不再，你還有在用虛銀嗎？

如果話 2020 年係 VB 派錢年，2021 就係虛銀收水年，極高定期利率不再、活期利率一減再減、消費 11% 回贈買少見少，都係 2021 年 VB 既主旋律喇。

始終銀行唔係善堂，優惠都係為咗用最短時間吸客啫，到數好唔到數後，都暫告一段落，剩低就係點樣用創新既產品同服務模式維繫住客戶關係，再口耳相傳咁吸客咯。

隨住螞蟻銀行將會喺年底取消 2% 存款保利率，我仲有錢既 VB 剩低最後 2 間 (你估吓邊 2 個？)，大家又仲有幾多間 VB 係有錢既呢？

Patreon 傳送門：

9. 跨境理財通，到目前為止仍然是個理想吧

繼 Stock Connect 和 Bond Connect 後，Wealth Management Connect (WMC) 跨境理財通應該係零售銀行界最翹首以待既國策，亦終於喺 9 月開通喇。

WMC 分為北向 (港澳至內地) 同南向 (內地至港澳) 兩種，各自總上限為 1,500 億人民幣，個人上限 100 萬人民幣，容許大灣區居民跨境購買三地既銀行理財產品。

大家明白內地人最想就係將錢「走出去」，WMC 就係一道半開既門，畀內地市民透過香港買到全世界既資產，港澳居民又可以將手上既離岸人民幣變成在岸，投資內地既人民幣計價理財產品 (息率高好多架)。

咁成個過程邊個最受惠呢？當然就係銀行喇！可惜無論係南向定北向喺申請程序上都仍然係一個理想 (if not a joke)，以北向為例，基本上香港只有中銀一家暫時係可以做到既，一年上限得 20 萬，仲要我等足 2 個星期咯！

要咬到跨境理財呢嚿肥豬肉，各家銀行仲有好多配套要做好喇。

Patreon 傳送門：

8. 個個都話做ESG，終於有少少 ESG 產品喺零售層面面世喇

唔少 consulting firm 都喺年頭預期 2021 年將會係銀行業既 green inflexion point，都真係畀佢哋講中咗。

世界各地既監管機構都密鑼緊鼓咁叫銀行要預備好提供 ESG data，除咗會成為銀行監管既一部份，仲會進一步要求銀行收緊同唔符合 ESG 原則機構既業務來往，例如滙豐就率先宣佈會逐步停止向燃燒煤炭既企業放貸，都幾兇狠架。

至於零售層面，香港都開始有零售銀行整色整水整咗啲 green product 出嚟，例如中銀同渣打就有 green mortgage，渣打仲有「可持續發展儲蓄戶口」添。

我既 comment 就都係豉油撈食、整色整水啦，至少喺零售層面，銀行賣大包又何需要你 ESG 呢？唔怕蝕本既幾時賣都得啦係咪？背後動機除咗 regulatory risk，仲有就係 brand image 啦。

一齊睇吓 2022 年零售層面會唔會有啲好有新意既 green product 面世喇。

Patreon 傳送門：

7. 消費券 2021，Bank Worker 真係嬲嬲豬咯

大概喺一年前既今日，行內人稱 FPS 2.0 既功能面世，FPS 除咗容許以電話號碼、電郵地址、FPS ID 做 addressing 以外，FPS 2.0 新增以身份証號碼作為 addressing 標識，容許公營機構透過身分証號碼向市民已登記既銀行戶口放款。

原本打算第一隻 use case 係咩呢？咪就係 2021 年既派錢計劃咯！可惜最後銀行無辦法分一杯羹，一切交由電子錢包負責，箇中原因各位看倌自有想法啦。

咁 FPS 2.0 最後有咩 use case 呢？唔知道，可能有，不過至少我自己就無登記過，亦無幸收到公營機構既錢 (交稅就有你份)，希望 FPS 2.0 唔會最後成為一個笑話吧。

Patreon 傳送門：

6. 鄭經理卡不再，渣打同國泰關係更進一步

隨住 Asia Miles 正式回顧國泰，長期儲 Asia Miles 必備既神器「渣打 Asia Miles 卡」亦步入歷史，變成新一代既 Cathay Card 喇。

貌似改個名無咩特別啦，其實代表住國泰同渣打關係更進一步，用「糖黐豆」嚟形容都真係一啲都唔過份，除咗渣打進一步將 Cathay Card 既定位由 Mass 升級為 Priority 同 Priority Private 客層，仲因為渣打正完整地將整個 reward system 外判咗畀 Cathay，同匯豐系既 reward system 私有制形成咗強烈既對比喇！

無獨有偶，滙豐喺 2021 年亦向 Miles 黨埋手，所以話今年真係香港 Miles 市場巨變既一年喇。

Patreon 傳送門：

第十至第六位，又係咪大家心水呢？

數一數榜先，我心中 2021 年十大零售銀行大事第十至第六位分別係：

第十位：虛銀瘋狂優惠不再，你還有在用虛銀嗎？第九位：跨境理財通，到目前為止仍然是個理想吧第八位：個個都話做ESG，終於有少少 ESG 產品喺零售層面面世喇第七位：消費券 2021，Bank Worker 真係嬲嬲豬咯第六位：鄭經理卡不再，渣打同國泰關係更進一步

如果大家既心水未出現，唔使擔心住，可能都係我心中既頭五位喎！

下篇同大家繼續數吓 2021 年零售銀行界大事，全部都係我覺得 2021 年不得不提既新 product，你又有無用緊佢哋咁呢！？

華田簡介

支持華田銀行，請訂閱 Patreon (www.patreon.com/watin)，多謝你嘅支持！

華田銀行 FB: facebook.com/WatinResearch 華田銀行 IG: https://www.instagram.com/bank_of_watin/ 華田銀行 HKET 專欄： https://wealth.hket.com/sraw116/華田銀行

關於華田：兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。

分享至

成為作者繼續創作的動力吧！

華田銀行 X 華田士多

追蹤

從 Google News 追蹤更多 vocus 的最新精選內容