小故事Sió kò͘-sū《niau!》(台文)

《niau!》

走健(cháu-kiāⁿ)，或者講 寬走(khoaⁿ-cháu慢跑)，對一(it)般人來講，應該是一(chi̍t)項較簡單通做的運動，有閒的時，我嘛會去小走--一-下，抑是慢慢仔散步。

佇彼山區的鄉道。

參市內的公園相比，我較佮意山路的清幽，有時，閣會搪著一寡大自然的"住民"。

譬論講，路邊懸懸的樹尾有跳來跳去的猴群仔、十捅隻相連紲飛--去的長尾山娘，有時，毋免攑頭，一个斡角兩、三隻hông驚--著的竹雞仔，抑是運氣好才通看著一擺ê烏雉雞(o͘-thī-koe帝雉) 佮紅跤仔(âng-kha-á藍腹鷴) 。

彼工，天烏陰烏陰，我照常佇山路邊寬寬仔走咧(terh)運動，毋過，走無偌遠，就敢若(kán-ná)聽著頭前有"幼幼閣尖尖"的叫聲。

彼聲音聽--起-來毋是人咧叫，我無停--落-來，繼續走--過-去，聲音嘛那來那近。

「niau!」

結果，佇路邊淡薄仔崎的山壁跤，有一隻細隻貓咪覕(bih)蹛草部邊仔，量其約兩、三個月大nā-niā，直直niau，若咧哮，我行倚--過-去，想欲(berh)共看予 清楚，想袂到，伊若注意著我，隨逃走，我閣倚，伊閣走⋯⋯

想想--咧(leh)，我是來運動--的，無 你行你的，我走我的好--矣。

我越頭來--去，繼續浸佇大自然的芬多精內。

我慢慢仔行，寬寬仔走，彼哀叫的聲愈來愈遠，那來那細，強欲聽袂著彼(he) niau-niau叫的聲--矣⋯⋯

⋯⋯

本來，確實是按呢。

...

「niau!」

我走--轉-來--矣。

毋過，這改徛遠遠共看，貓仔囝閣跔(ku)蹛原來ê草部，kho̍k-kho̍k niau，niau 袂停。

論真，伊覕佇遐，進馬路，退山壁，我若(nā)較細膩過去共掠，伊應該"進無步，退無路"才著!

我沓沓仔行倚--過-去⋯⋯

「Sah!」

貓仔囝假甲雄kài-kài，共來到伊面前的我歹。

「Eh?」

我才拄到"位"，伊煞(soah)雄雄越頭，那niau那爬起去(khír-lír)山壁，想欲逃走，而且，速度閣誠緊! 我連鞭三步做兩步踏--起-去，伸正手共掠!

「好佳哉!」我講。

山壁對伊來講傷懸--矣，爬一睏仔伊就爬袂起--去，予我掠著。

「niau。」

我輕輕仔共抱--咧，隨緊行來轉。

路中，一對老翁仔某佇馬路對面行--過-去咧(terh)散步。

「彼(he)敢毋是拄仔路邊彼(hit)隻貓仔囝?」我聽著某共翁講。

原來，伊可能佇遐有一陣仔--矣。

⋯

「Sah!」

佇厝內，一人一貓，相對相。

「是講，欲按怎處理才好?」

想想--咧(leh)，我決定來去問阿姊in兜敢有法度飼。

我共貓先囥--咧，就行去隔壁。

「姊夫!」干焦看著姊夫佇--咧，我隨共問「我掠著一隻貓仔囝，有興趣--無?」

「唅? 佗位掠--的?」

「去運動路邊掠--的，欲來看覓--無?」我講。

「好--矣，若柑仔色--的我就飼。」