港隊賽後評 世界盃外圍賽 香港 0-2 烏茲別克 (21-3-2024)

港隊賽後評

世界盃外圍賽 香港 0-2 烏茲別克 (21-3-2024)

1. 其實之前響亞洲盃同省港盃時我響「不專業足球筆記」入面都有寫過類似既港隊賽後評，不過諗諗下應該直接開個topic寫出黎會更加有系統，所以我就即刻坐言起行喇。

2. 既然呢篇係名義上既第一篇，我當然要帶頭盔，就係我冇識波牌，同埋我係開緊工果陣睇，如果同你哋既意見有咩出入，一律以你哋既意見為準。

3. 對於呢場波既感想…四個字︰優勝劣敗。

4. 烏茲別克世界排名第66，而香港世界排名係第154，加上佢哋近年黎既足運發展唔錯，尤其是青訓方面做得好好，實力自然係響香港之上，但我都係今日聽旁述舜文同和哥先知佢哋陣中有意甲、法甲、土超效力既球員，仲要係有出場有入過波，呢樣我真係surprised，而我哋最勁既係中超兵同德國第五級聯賽既外流球員。

5. 實力唔夠，我希望可以踢返出亞洲盃果陣既士氣同埋戰術，只不過從今場波睇黎，班球員對比當時集訓咗成個月密密操，今次既狀態明顯跌咗唔少，連當時執行得好好既逼搶，今日都唔係點見到。

6. 安達臣響亞洲盃時期有句嘢講得好啱，港超既比賽，球隊之間既實力相差得太遠，有啲比賽唔駛睇都已經估到某啲隊會起碼輸三、四球，球員響港超可能好易就搵到機會入波，但響國際賽係兩個世界黎。

7. 我好認同佢既講法，雖然咁講有啲對有心搞波既人好似唔係咁啱聽，但事實係港超聯入面至少有四隊既水準係同其他球隊完全唔響同一個水平，而港超其實只有11隊，即係成個聯賽有超過1/3係啲比較弱既球隊，響太強弱懸殊既比賽之下，強果隊好難有進步。

8. 今場算唔算係反映咗呢個講法呢？正選十一個入面，有四個外流既中超兵，其中孫銘謙(係一開始有啲唔集中撻咗球Q差啲出事)、周緣德同埋茹子楠都明顯比其他球員黎得fit。而其他港超球員，我覺得得葉鴻輝同埋陳俊樂係比較特出，其他球員都被比下去。

9. 唔係屌其他球員踢得差，今場輸好正常，我哋點計都唔會夠對手勁係啱啱提過呢幾個球員突別sharp啫，不過同一個球員，對比返響亞洲盃時既表現，的確係同當時有落差。咁當然，亞洲盃當時成隊香港隊都打咗雞血，佢哋既表現係令人喜出望外，而家最多只係打回原型。

10. 今日你話香港隊好差咩？其實唔係架喎，雖然上半場全場都比對手壓制，但佢哋防線真係打得唔錯，血肉長城連環封阻對手既射門，加埋門將葉鴻輝出色既表現，成功守住零比零完半場。上半場尾段，香港隊憑住界外球手榴彈同死球響對烏茲別克門前製造到混亂，不過未能成功威脅到對手。

11. 比較要彈既，係正選前線三叉戟，今日港隊進攻既戰術都有啲似亞洲盃時候咁，即係好多時候唔經中場組織攻勢，而係直接瞄準前面果三叉戟斬上去，由佢哋做支點再分波組織，呢招今日響一班後備兵出黎之前真係唔太work，艾華頓好似將佢響理文既頹態帶返黎、祖連奴直接隱咗形、安永佳比對方中堅完全壓制一球都頂唔到，係米高同潘沛軒出黎先有改善。

12. 下半場人哋換咗隻右翼出黎，趁港隊唔集中，響港隊左面殺落底線，大力地波傳中，中間烏軍前鋒竟然冇人看管任射，呢下真係有啲輸自己兩個中堅走空晒…而另一個失波係角球，艾里奧竟然起步走甩對手5號，比佢輕鬆頂入二比零。艾里奧其實今日踢得唔差，但走甩人既情況其實唔係第一次，上半場都試過，係對手把握唔到。而兩個失波或多或少都關佢事，冇計，中堅同龍門都係咁，失誤而失波就會比人放大落講。

13. 換入米高、世姪同埋史堤芬彭利拿既港隊響失咗兩球之下反而搶返唔少攻勢，可能對方都有少少收油，但前兩者表現都好搶眼下，尤其是米高，多次響身體對抗之下控到個波落黎，係要有呢啲第一下，之後港隊既follow up先做到攻勢。

14. 雖然係搶返唔少攻勢，但真係威脅到對方大門既機會其實少之又少，我印象中只有艾華頓同米高既射門係中龍。呢個其實都係反映到實力上面既距離既，真係冇辦法。

15. 特別想講下英雄輝，今日佢真係痴撚咗線，除咗上半場中段有一次連續兩下擋出住對手響禁區入面連番施射，果種反應真係寶刀未老，雖然輸咗兩球，但真係非戰之罪，佢係我今場波既Man of the Match。

16. 最後嘞…我想講個南韓球證，佢真係吹得好鬆，甚至我有個幻覺，球員唔斷腳佢都唔會吹…

#不專業足球筆記 #足球專欄 #專欄 #我愛本地波 #世界盃外圍賽

#香港 #香港隊 #烏茲別克 #wearehongkong #足球 #賽後評

#香港隊勁揪 #香港加油

更多專欄內容︰ https://www.leafopenleafopen.com/unprofessional9up

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938